Пятница, февраля 26, 2021
Важное

Ютазь 2020 иесь республикань, кода весе масторлангонь ломантнененьгак кандсь ламо мелявкст од коронавирусонь инфекциянть коряс. Те орманть каршо бороцямо стясть здравоохранениянь весе организациятне.

Стака шкастонть сыненст покш лезкс макссть Мордовия Республикань Госсобраниянь депутаттнэ, «Единая Россия» фракцияс совицятне. Васняяк больницятнес пачтясть надобиянь эрявикс препаратт, сеть врачтнень ды медсестратнень туртов, кить важодить зыянов ормасо сэредицятнень марто, ванстомань кедьёнкст. Теде башка, ютавтозельть седеймарямонь ламо акцият, конатнень вельде истя жо максозель лезкс нужасо эрицятненень.
Кода содатано, стака ормась сась тенек ютазь иень чадыковсто. Самай се шкастонть МР-нь Госсобраниянь Экономической политикань, предпринимательствань ды собственностень коряс комитетэнь прявтонть, «КС БАНК-нь» президентэнть Владимир Грибановонь, «Мир цветов» АО-нь генеральной директоронть, МР-нь Госсобраниянь депутатонть Александр Болдыревень ушодксост коряс Саранск ошонь округонь лецямонь кемень учреждениятнесэ важодицятненень казезельть 5 тёжадо ламо цецят. Предпринимательтне истя жо макссть лезкс республиканской клинической ды республиканской инфекционной больницятненень ормадо ванстомань средствань ды надобиянь рамамс. Медицинань курок лезксэнь максомань станциянть туртов рамазельть контактонь термометрат.

Седеймарямонь акцият ютавтозельть С.В. Катков лемсэ республиканской клинической больницясонть. Лецямонь те учреждениясонть важодицятненень казезельть тёжадо ламо розат. Врачтне ёвтасть сюкпрянь валт депутаттнэнень ды мерсть, истямо стака шкасто цецятне паролгавтыть ёжост ды кепедить мелест.
МР-нь Госсобраниянь депутатось, «Единая Россия» региононь политсоветс совицясь, «Агрохолдинг «Новотроицкий» ООО-нь прявтось Владимир Руженков содавтынзе Рузаевкань ды Ташто Шайговань райбольницятнень. Неть медицинской учреждениятнесэ важодицятненень явсь ярмакт ормадо ванстыця оршамопелень рамамс.
«Лато» ОАО-нь прявтось, депутатось Алексей Чингалев лездась ярмаксо аволь ансяк Комсомольскоень ЦРБ-нь важодицятненень, истя жо ламо эйкакшонь триця семиятненень ды волонтёронь центрасо важодицятненень.

Аграрной кевкстематнень, пертьпельксэнь ванстомань ды строительствань коряс комитетэнь прявтось Николай Амбаев явсь мель Рузаевкань муниципальной райононь больницянтень. Истя, те ёнксонь центральной райбольницянтень сон питневтеме макссь 150 кг сывельстэ теезь ярсамопельть, Сузгарье велень школантень ормадонть ванстомань кедьёнкст.

Образовательной учреждениянь прявтось, тонавтыцятне ды тонавтницятне ёвтасть депутатост лемс седейшкавань лембе валт.
Содазь, ютазь иестэ лецямонь ламо учреждениятнесэ шумбрачист витеме кармасть ковидсэ сэредицятне, аволь эрьвантень шождасто пачкодят. Невтемакс, республиканской госпиталесь ашти Саранскоенть эйстэ ве ёно, тов пачкодема Юго-Западонь вирьганть, транспорт икеле тов эзь яка. Ютазь сёксня те стакачинтень мель явсь Мордовия Республикань Государственной Собраниянь Председателесь, «Единая Россия» Политической партиянь Генеральной советэнь членэсь, партиянь Мордовской региононь отделениянь Секретаресь Владимир Чибиркин. 2020 иень сёксня сонзэ бажамонзо вельде кемекстазель эрявикс решения. Теде мейле тов ушодсь якамо транспорт.
МР-нь Госсобраниянь Председателень полавтыцясь, Законодательствань ды законностень коряс комитетэнь прявтось Валерий Алёхин ды депутатось Андрей Надейкин лездасть Зубова-Полянань центральной райбольницянтень. «Якстере зонасо» важодиця медиктненень сынь макссть зыянов ормадонть ванстыця 120 комплектт оршамопельть ды ёвтасть сюкпрянь валт врачтненень ды медицинской сестратненень, кить, эсь прядост апак арсе, идить лиятнень эрямост.
Высшей законодательной органонь «Единая Россия» фракциянь прявтонть, «Технопарк – Мордовия» АУ-нь генеральной директоронть Виктор Якубань ушодксонзо коряс сынст учреждениянь водительтне кавто ковс ильтязельть важодеме «Станция скорой медицинской помощи» МР-нь ГБУ-в.

Социальной
учреждениятненень – лезкс иень перть

Неень шкане ламо кортави сыре ломантнень шумбрачист ванстомадо. Покш Березникень сыре ломантнень ды стакасто сэредицятнень (инвалидтнэнь) кудонтень-интернатонтень лезкс макссь Мордовия Республикань Госсобраниянь депутатось Анатолий Бузлаев. Сонзэ ярмактнень лангс рамазельть кажов ормадонть ванстомань кедьёнкст.
Покш лезкс, 245 тёжат целковойть, явсь «Лидер-Компаунд» АО-сь эсест важодицятнень ды сынст семиятнень шумбрачист витемантень.
Законодательствань ды законностень коряс комитетэнь прявтонь полавтыцясь, «Единая Россия» фракцияс совицясь, «Тепличное» АО-нь прявтонь полавтыцясь Александр Храмов содавтызе республиканской эйкакштнень ды од ломантнень туртов «Надежда» социальной приютонть. Депутатось тосо эрицятнень ды важодицятнень туртов макссь антисептикть, медицинской маскат, перчаткат…
Неень шкане стакасто сэредицятнень (инвалидтнэнь) ютксто аволь весенень медицинской невтевкстнэнь коряс мереви максомс креслат-коляскат. Тень ловозь, Пролетарской райононь инвалидэнь организацияс ломантне секе-тев пшкалить нурька шкас сонзэ саемга. МР-нь Госсобраниянь Председателень полавтыцясь Иван Москаев сыненст тейсь истямо казне: макссь те организациянтень кресла-коляска.

Ине Отечественной войнасо маштовозтнень лемест ледстнемга

Ютазь иестэ Ине Изнямонь 75 иетнень топодеманть тешкстамсто МР-нь Госсобраниянь депутаттнэ явсть мель чавовозь воинтнэнь калмазыртнень ды мемориальной сооружениятнень паролгавтомга, Ине Отечественной войнасо маштовозтнень лемест пингеде-пингес ванстомга, истя жо сыненст алтазь уликс кеврунготнень витнемга.
Пингеде-пингес ледстневицякс кадови Кочкурбуень Семилей велесэ аволь умок теезь монументэсь, конась алтавсь весе войнатнесэ маштовозтненень, сынст валдо лемест астувтомантень. Те ине тевенть топавтызе МР-нь Госсобраниянь депутатось, «Агрофирма «Норов» группатнень компаниянь прявтось Александр Поздняков. Сонзэ эйсэ сёрмадозь те велень весе ломантнень лемест, кить идесть масторонть, казсть тенек уцяскав эрямо.

МР-нь Госсобраниянь Председателенть Владимир Чибиркинэнь кармавтоманзо коряс явозель лезкс Орданьбуесэ войнань
эйкакштненень ды тылэнь тружениктненень алтазь кеврунгонть теемс. Истя жо сон лездась зярыя книгань печатамс, ютксост кавто томтне, косо ёвтневи 326 Рославльской Краснознамённой стрелковой дивизиядонть.

Ветерантнэнь мартовастовомат

МР-нь Госсобраниянь депутатось Василий Кадакин кудова содавтынзе Ине Отечественной войнань ветерантнэнь. Василий
Иванович Рагулин ды Николай Егорович Самойлов ледстизь войнань стака иетнень ды пачтясть течинь мелявкстнэде. «Телефонт
– фронтовиктненень» акциянть мельс саезь, конанень ушодкс путсь «Единая Россия» партиясь, Василий Васильевич тейсь казне:
макссь ветерантнэнень питневтеме связь марто сотовой телефонт.

Республикань высшей законодательной
органонь депутатось Алексей Зубанов истямо жо казне тейсь Славань I степенень орденэнь кавалерэнтень, Отечественной войнань
II степенень орденэнь кандыцянтень, васенце Белорусской фронтонь танконь ветеце бригадань танкистэнтень Валентин Григорьевич
Загребельнойнень. Самай те чистэнть ветеранось тешкстась чачома чинзэ.

Алексей Зубанов теке жо шкастонть сотовой телефонсо кенярдовтызе войнань участникенть Дмитрий Иванович Видмановонь. 232 стрелковой полконь разведчикесь, Якстере Тештень (Красной Звезды) орденэнь
кавалерэсь ульнесь покш мельспаросо.

Саранск ошонь Октябрьской районсо
эрить Ине Отечественной войнань кевейксэе участникть, эрьвантень юткстост явови сатышка мель. МР-нь Госсобраниянь депутатось Анатолий Пинямаскин макссь сотовой телефон Ине Отечественной войнань ветеранонтень Мария Фёдоровна Романованень.
Ине Отечественной войнань ветеранонть
Василий Андреевич Синицынэнь кедьсэ ульнесь Роман Хайров депутатось. Казненть максомадо мейле сон ёвтась фронтовикентень сюкпрянь валт ине тевензэ кисэ. Од иень каршо читнестэ МР-нь Госсобраниянь депутатось Юрий Тутков вастневсь
Торбеева ёнкссо эриця Ине Отечественной
войнань ветерантнэнь марто. Сон эрьвантень
явсь седейшкавань мель ды макссь казнеть.
Ветерантнэ эсь ёндо ёвтасть ламо сюкпрянь
валт ды паронь арсемат.

«Лездак тонавтнемскудосо» акциясь

Саранск ошонь округонь Пролетарской районсо эриця ламо эйкакшонь триця семиянтень ноутбук макссь МР-нь Торгово-промышленной палатань прявтось, Государственной Собраниянь депутатось Юрий
Левашкин. Сонзэ валонзо коряс, «Лездак тонавтнемс кудосо» акциянтень вейсэндявсть ламот «Единая Россия» партияс совицятнень
ды сыненст лездыцятнень ютксто. Республикасонок эриця ламот семиятне вастовсть
стакачи марто эйкакштнень дистанционна
тонавтнемстэ.

Тень ловозь, кемекстазель арсема – лездамс эйкакштненень: рамамс ноутбукт, штобу сынь авольть кадово школань программанть
эйстэ. Те акциясь ульнесь ютазь иень сентябрянь 30-це чинть самс, лезксэсь максовсь сетненень, косо эрить колмо ды седе ламо
эйкакшт.

Рузаевкань ёнкссо нужасо эриця кавто
семиятненень ноутбуктнень казинзе «Единая
Россия» партиянь МРО-нть пельде Госсобраниянь депутатось Максим Автаев. Чарькодеви, те эпидемической шкастонть неень шкань
техникавтомо эйкакштненень стака ульнесь
тонавтнемс.

Казнетне максозельть Раськетнень вейсэндямонь чистэнть, эйкакштне ды сынст тетятне-аватне ёвтасть ламо сюкпрянь валт лезксэнть кисэ.

Анокстызе Валентина Юдина
Фототне МР-нь Госсобраниянь пресс-службань

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».