Сехте питнеесь, мезе ули ломаненть, те – эрямозо ды кеме шумбрачизэ. Ансяк мекс-бути те а сеске чарькодеви. Ды зярдо ёмавтови шумбрачись эли карми лавшосто важодеме кодамояк рунгонь пельксэсь, сестэ ушодтано ризнэме… Истя лиссь Игорь Кошкин мартояк, кона ёмавтынзе кавонест кедензэ ды пильгензэ. Сонзэ эрямо кизэ васняяк ульнесь кода весень – шумбра-паро цёраль. Вечкизе эрямонть эсензэ ладсо, эрясь, истя меремс, «олясо ломанекс». Зыянось мартонзо теевсь 2020 иень декабрясто…
Игорь Кошкин кассь тетявтомо, сон чавовкшнось милициясо служамсто. Секскак авазо покш мель явсь цёранзо туртов. Школасо тонавтнемстэ цёрынесь ванызе «Кадетство» суворовской училищань курсанттнэде сериалонть. Теде мейле седейсэнзэ кирвазсь мель улемс сынст ютксо. Ды, нама, мелезэ топавтовсь. Школадо мейле сон прядсь военной училища, конань прядомадо мейле бажась молемс Московонь вузсо тонавтнеме, ансяк тевезэ эзь лисе. Тень таркас понгсь Казанень танковой училищас. Ансяк пельиеде мейле чарькодсь, военноень профессиянь тевесь аволь сонзэ коряс. Армиядо мейле велявтсь Саранскоев. Сюлмиксэлизе эрямонзо IT-технологиятнень марто. Кармась тонавтнеме Н.П. Огарёв лемсэ университетэнь электронной техникань факультетсэ. 2020 иестэ идизе дипломонзо, максовсь тензэ од специальность – системной администратор.
Игорь шождасто муиль ялгат. Ризксэнтень, тонатне а содыльть, кода оймсемс лиякс, бути аволь симемапельтеме. Кода тесэ каршо молят? Пурнавкшность покш компаниясо ды истя «оймсесть» веньберть. Ансяк Игорь симемадонть мейле эзь маря прянзо кенярксовокс. Мекевлангт, кода сонсь ёвтнесь, саилизе ризкс, тошначи, ушодыль авардеме. «Те ульнесь теке верде кармавтома: симеманть эряви кадомс. Мерят, теке кияк кардась берянь тевде. Ансяк мон эзинь арсе сестэ теде…»
2020 иень декабрянь вейке чистэ Игорь оймсесь ялганзо марто. Пия, телевизорга футбол, сауна... «Кода пачкодинь се чокшнестэнть чугункань кинтень, а ледстяви допрок. Кадовсь пряс вейкесь: молемстэ авардинь, простнинь ломантнень марто… Прясь, нать, лоткась кирдевеме ды мелесь ульнесь мадемс. Ансяк эзинь арсеяк, што сутяман рельса лангс». Машинистэсь зярыяксть макснесь сигнал. Ансяк Игорь сыргозсь поездэнь увтто, конась уш ардсь ланганзо. Покш сэредьксэнть эйстэ прясонзо велясть арсематне: «Кода мон тезэнь понгинь? Мезе мартон? Кода поездэсь тусь, карминь эсь прям ванномо ды чарькодинь – арасть кедень ды пильгелапатне. Тандадомадонть ды виев сэредькстэнть маштсь ёжом. Ёмавтокшнынь ламо верь… Сась чарькодема: эрьва минутасто монь учи кулома. Самай истямо шкасто сы покш мель – эрямс…»
Кить тень весе неизь, аштесть таймазкадозь. Игорь стиксэль сеть пелькстнэнь лангс, мезе кадовсь пильгензэ эйстэ. Ансяк тензэ кармасть сеереме: «Иля лыка, курок сы «скороесь»! Седе тов весемесь ульнесь прок онстонзо.
Ней Игорь ёвты покш сюкпря хирургонь колмо бригадатнень туртов, конат тейсть тензэ операция, конань пингстэ кадызь кенерепакартнень ды кумажатнень. Сынст лангс, кода кармась содамо мейле, тонговить бионической протезтнэ.
Медсазортнэ яла кепедсть ёжонзо: «Ансяк иля нусмакале, протез мартояк эрить…» Нама, аволь весе капшасть оймавтомонзо, муевсть истяткак ломанть, конат тандавтнесть, келя, ней куломазот кармат аштеме мадезь ды мельгат санитаркатне кармить ливтнеме начкот…»
Зярдо цёрась пачтязель кудов, эрямозо, мерят, ушодовсь одс. Игорь чарькодсь, икелень шкань ютавтомазо пешксель чавочиде. «Свал пек шожда киньгак чумондомс эсь апаротнесэ, – тешксты Игорь, – вана те лисезь кажосонть чумось монсь. Ды бути Верепазось кадымим эрямо, сестэ эряви се шканть, кона кадовсь тень, ютавтомс лезэвстэ ды уцяскавсто». Больницядо мейле перьканзо пурнавсть нусманя чачо марто ялганзо. Вейкесь снартнесь кенярксовсто пшкадемс лиятненень: «Мезе тынь кода калмамсто аштетядо? Кияк эдь эзь куло, – бажась сон оймавтомс сыцятнень. – Ну мезе, кедтеме-пильгевтеме, прязо эдь таркасонзо. Лиясо мейсэ лездатано». Игорь кепедезь ёжосо кармась тонадомо од эрямонтень. Протезтнэнь тензэ максомадо икеле натой лиснесь ушов кудонть перька кумажа лангсо якамо. Паро ёжонзо неезь, оймась авазояк. Игорь симемантькак допрок ёртызе превстэ, а зярыя шкань ютазь апак фатя кармась содавикс блогерэкс.
Васенце видеонть теизе самай се ялгазо, кона оймавтсь лиятнень больницясто васенцеде лисемстэ. Лемезэяк истямо жо – Игорь. Васняяк, Игорь Кошкин эзь мере сонзэ снимамс, ансяк мезеяк а теят, кедтне арасть, телефонось ялганть кедьстэ а нельгеви. Снимазь сюжетэнть ялгась путызе Интернетс. Апак учне роликесь пурнась пек ламо ваномат. Истя Кошкин кармась тееме эрьва чинь нурька видеот. Мейле те теевсь важодемакс. Каналозо кармась кандомо аламошка ярмакт. Кавтошка иес аудиториязо пачкодсь малав колмо миллионс. «Бажан од ломантненень ёвтнемс иредстиця симемапеленть зыяновчидензэ. Паряк, монь ёвтнемам киненьгак максы вадря урок… Эдь сестэ рельсатнень лангс мадинь аволь эсень мельсэ, ды тень натой кемекстызь судсо. Монь арасель мелем маштомс эсь прям. Теньс тулкадимим иредстицяпелесь, кона допрок веляськавтокшнынзе превень ды цють эзизе сае эрямом», – ёвтни Игорь.
Неень шкасто цёрась якси протез лангсо, конатне рамазельть Социальной страхованиянь фондонь ярмактнень лангс. Тешкстасынек, протезтнэнь питнест пек покш, неень шкасто малав пельмиллион целковойстэ саезь кеменде ламо миллионс. Ды кедтне тень пингстэ пильгетнеде седе питнейть…
Игорь эри ськамонзо, лавкав якси сонсь. «Ансяк вана шкань ютазь икелень ялгатне кармасть аламонь-аламонь ёмсеме… Алкуксонь ялгатнеде кадовсть ансяк колмо…»
Эрьва чистэ Игорь Кошкин невти ломантненень, кода изнямс стакачитнень ды улемс уцяскавокс. Те аволь стака, эряви ансяк путомс питне эрьва чинтень ды кецнемс эрямонтень. Ды, теде башка, бажамс топавтомс эсь мельтнень.
2022 иень октябрясто «Россия-1» каналсо Игорь ульнесь Андрей Малаховонь передачасо. Сюжетэнть лемезэль «Победил смерть!». Тосояк цёрась ёвтнизе мартонзо лисезь зыянонть ды невтнизе, кода тонгони протезтнэнь. Эряви тешкстамс, бионической протезтнэнь марто, конат важодить аккумулятор вельде, сон теи эрьва мезе: ялгаксни спортонть марто, пиди эстензэ ярсамопель ды натой тевс нолды смартфононть – печаты, теи видеот. Важодить сынь истя: протезэнь датчиктне максыть сигнал кадовозь сантнэс, сынь кирить (сокращаются), пряудемесь нерватнева кучи электрической импульс ды кедесь ушоды лыкамо.
Аволь умок Игорь кармась важодеме эсензэ проектэнзэ лангсо, конась алтави сеть ломантнень туртов, кить вастовсть истямо зыян марто. Те проектэнть марто сон якась «Территория смыслов» образовательной форумонтень. Ансяк федеральной лезксэсь эзь учово. Те тевесь эзизе нусмакавто од цёранть ды сон пшкадсь минек республикань Прявтонтень. Артём Здуновнень сон толковась, кодамо лезкс теевель ломантненень: «Проектэсь сюлмавозь сень марто, штобу лездамс сеть ломантненень, кинень эрявить истят протезт. Теде башка, ёвтнемс тенст, кода а ёмавтома паро ёжонть (мотивациянть) ды тонавтнемс эрямо кода весе, ансяк протез марто». Арсесть лездамс Мордовиянь од ломантнеяк. Од центрасонть кармить важодеме лавшо шумбрачисэ ломантнень марто. Лезксэсь карми максовомо эрьва ёндо:
инвалидностень коряс документэнь теевтемстэ – протезтнэнь получамос ды икелень эрямонтень велявтомас. Те сехте пек эряви ней, зярдо СВО-нь шкасто ломантне лиясто кадовить кедтеме эли пильгевтеме. «Проектэнть мелесь вейке – а кадомс ломантнень стака шкасто, ёвтнемс, што улить пек ламо тевть, конатне теевить кедтеме-пильгевтеме», – кортась Игорь.
Проектэсь зярс прядовома лангсо, ансяк цёрась нейгак анок кортнемс стакачис понгозь ломантнень марто. Кода зярдо-бути сонгак ловнызе Ник Вуйчичень ды кедтеме-пильгевтеме лиятнень историяст ды эрямост, конатнень лангс ванозь, Игорь чарькодсь – сонзэ эштё аволь истямо стака уцясказо… Секскак сон свал панжадо весенень соцсеттнесэ ды анок эрьвантень максомс эрявикс лезкс. Эдь ансяк Мордовиясо лавшо шумбрачи марто кодгемень тёжадо ламо ломанть.
Марина Агафонова