Эштё умонь шкатнестэ саезь ветеринарной врачось велетнесэ ульнесь васенце ломанекс. Сонензэ пшкадильть, зярдо эрявиль медицинань лезкс ракшатненень. Неень шкастояк ветеринаронь профессиянть эрявиксчизэ овсе эзь полавтово.

Эсь тевсэст ветеринариянь важодицятне аволь ансяк топавтыть ракшатнень шумбрачист ванстоманть, истя жо ванстыть ломаненть шумбрачинзэяк – пштистэ ванкшныть нолдавт продукциянть (сывелень, ловсонь, калонь ярсамопельтнень) вадрячинзэ, топавтыть мероприятиятнень, конат ванстыть эрицятнень сеть орматнеде, конат вейкеть ломаненть ды ракшатнень туртов, истя жо покш мель явови минек республикань территорияс зыянов орматнень анолдамонтень.

Сетнень ютксо, кить оймесэ кочкизь эсест туртов ветеринаронь а шожда тевенть ды кадовить кемевиксэкс тензэ вана уш малав 46 иетнень перть, башка тарка саи «Мордовская республиканская станция по борьбе с болезнями животных» ГБУ-нь ветеринарной врачось-эпизоотологось Вера Николаевна ВЕНЧАКОВА.

Вера Венчакова эсь профессиянть кочкизе 1975 иестэ, школасо кемень класстнэнь прядомадо мейле, зярдо мольсь тонавтнеме Краснослободскоень зооветтехникумов ветеринарной врачонь тевентень. 1978 иестэ дипломированной специалистэнть кучизь роботамо Орданьбуень райононь Большое Кузьмино велень колхозов. Тосо роботась аволь кувать, весемезэ ие. Ансяк самай те шкастонть эрямонь кинть лангсо вастсь истямо ломань, конась пек ламос тонавтызе.

– Большое Кузьмино велень колхозсонть санитарокс роботась атине, ней уш лемензэяк а ледстнян, конась тень макссь пек ламо содамочить. Мон бу меревлинь, сон тонавтымим профессиянтень, – корты Вера Николаевна.
Седе тов од специалистэсь кармась важодеме Сыре Шайговань райононь Новотроицкоень совхозсо. Сисемеде ламо иеть ульнесь тосонь совхозонь ракшатнень туртов вадря докторокс Айболитэкс.
– Колхозось ульнесь покш, сюракшов ракшатнеде трявсть ламо, – ледстни Вера Николаевна. – Весементь савсь тонавтнемс ды маштомс: скалтнэньгак лецямс, эрьва кодат мероприятият ютавтомс, конатнень ютксо вакцинациясь, шкань профилактической ванкшноматне ды ламо лия мезе. Невтемга, педиця орматнень профилактикась тееви вакцинациянть вельде. Тень весементь теема шкастонзо, лиякс весе стадась ормалгады. Нама, стакачитнеде ульнесть ламо, ансяк эсь тевенть эрявсь теемс.

Аламонь-аламонь, кода лия роботасояк, пурнави опыт, ды шкань ютазь од специалистэнтень ракшатнень марто важодемась кармась седе шождакс. Новотроицкоень совхозстонть Вера Николаевна ютась роботамо Саранскоень сывелень комбинатов, косо 7,5 иеть топавтсь ветсанэкспертэнь тевенть. 1992 иенть ушодовомсто предприятиясь лоткавтызе эсь важодеманзо ды Венчакова тусь Ялгань участковой ветлечебницас. Теке иень декабрясто сась ракшатнень орматнень марто бороцямонь республиканской станцияв, косо роботы неень шкас.

– Ней роботан ветеринарной врачокс-эпизоотологокс. Прявт тевем – педиця орматнень анолдамось – те сибирской язвась, ормазкадомась, туберкулёзось, лейкозось, – ёвтни Вера Николаевна. – Миненек совить Саранск ошонть юрсо улиця сисем велетне: Николаевкась, Ялгась, Пушкинась, Монастырскоесь, Зыковась, Полянкись ды Добровольноесь.

Кода тешкстась Вера Венчакова, неень шкане минек регионось ловови вадрякс ракшатнень ды нармунтнень педиця орматнеде ванстоманть коряс. Ды те весе сень кувалма, ракшань кирдема хозяйстватнесэ, эрицятнень эсест кардазсо свалшкасто ветяви КРС-нть ды МРС-нть ванкшномась, ютавтовить профилактикань мероприятият.

– Покш ды эрявикс тевесь – домкасто ваномс эсь территориясо тевтнень мельга, штобу а нолдамс стака орматнень, конатне вейкеть ломантнень ды ракшатнень туртов. Пштистэ ванан сень мельга, штобу профилактикань весе мероприятиятне улест ютавтозь шкастонзо. Сеедьстэ вастневан эрицятнень марто, толкован тенст ветеринариянь тевтнень эрявиксчиденть, – кемексты Вера Венчакова.

Теке марто, кода тешксты ветеринарной врачось, эрицятнень марто лиясто сави ламо ды кувать кортамс сень коряс, што ракшатнень вакцинациясь – пек эрявикс тев, эдь сынст истя жо эрявить ванстомс стака орматнеде. Берянь, зярс тень чарькодить аволь весе. Эдь лиясто лиснить, невтемга, ормазкадомань (бешенствань) тевть. Сонзэ кандтницякс сеедьстэ эрсить идем ракшатне. Теке марто сынь те орманть педявтыть кудонь ракшатненень, ормасонть сэреди ломанеськак. Сонзэ а нолдамга республикань ветслужбась теи покш ды эрявикс робота. Эрьва ие январьстэ саезь апреленть прядовомс частной секторсонть ютавтови кудонь кискатнень ды псакатнень вакцинациясь. Неть мероприятиятне ветявить аравтлувонь коряс ды питневтеме.

– Ормазкадомась – зыянов орма ломаненть туртов. Сонзэ кандтницякс седе сеедьстэ эрсить идем ракшатне (верьгизтнэ, ривезтне, еноттнэ, ашо ривезтне ды лиятне), азортомо кискатне ды псакатне, – ёвтни ветврачось. – Эряви меремс, минек тесэ истямо ормась вастневи чуросто. Бути жо миненек пшкадить эрицятне ды пеняцить сень лангс, што кискаст эли псакаст прянзо вети а истя ды сынь мелявтыть, аволь педя тензэ ормазань ормась, пекстатано кудонь ракшанть карантинс. Тень мереви теемс кудосояк, бути жо ломанесь пели, сайсынек эсенек «Карантинникс», конась важоди минек станциянть юрсо. Кемень чинь перть кискась эли псакась кирдеви те помещениясонть ды мельгаст якить минек санитаркатне.

В. Н. Венчакова, кемекстазь участкатнесэ важодемадонть башка, эсь пациенттнэнь ванкшны республикань ветеринарной клиникасонть. Тезэнь эрицятне сакшныть эсь вечкевикс ялгатнень – кискатнень, псакатнень ды лия ракшатнень марто, конатне ормалгадсть эли мартост лиссь зыянов тев. Вера Николаевна тейни эрьва кодат операцият, леци ормалгадозтнень. Сакшныть эрьва кодамо мелявксонь коряскак. Минек вишка ялгатне пильгест-лапаст синдтнить, верьсантнэнь керить ды ламо лия мезе лисни. Пек сеедьстэ пшкалекшнить сень коряс, азортнэ макссть андомапель, конась ракшатненень овсе а лади.

– Эрьва мезе эрси. Лиясто а чарькодяткак, кода те томбавомась эли ормась лиссть, – тешксты Вера Николаевна. – Ламо пшкадемат миненек улить, невтемга, каткатнень кальцевирусной инфекциянть кувалма. Сон истямо жо, кода ломантнень коронавирусонь ормась. Симптомтнеяк истят жо, лецямоськак истямо жо, кода ломантнень. Ансяк вана ломантне ёвтыть, мезест сэреди, ракшатне жо тень толковамо а маштыть.
Истя жо Вера Венчакова кемекстызе, неень шкане ламот лецямопельтне кармасть седе вадрякс: ормалгадозь ракшанть стявтсызь пильге лангс уш колмоце-ветеце чистэ.
Зярдо кевкстинек Вера Николаевнань, мейстэ сон ушоды важодеманзо, сон мерсь:

– Эсь тевенть ушодан ракшанть марто содавиксэкс теевемасто: вадяшаса, ёвтан тензэ лембе валт, оймавтса. Ансяк теде мейле ушодан ванкшномонзо. Истямо аравтлувонь коряс роботан весе эрямон перть.
Ламо иень перть парсте важодеманзо кисэ Вера Николаевна казезь эрьва кодамо наградасо, конатнень ютксо – Ветеринариянь управлениянь Почётонь грамотась, МР-нь Велень хозяйствань ды продовольствиянь министерстванть пельде Почётонь грамотась, РФ-нь Велень хозяйствань министерстванть пельде Благодарностесь ды Почётонь грамотась. Венчакова – трудонь ветеран.

Декабрянь 6-це чистэ Вера Николаевна Венчакова тешкстызе юбилеензэ. Мартонзо важодицятне, истя жо тензэ пшкалицятнеяк, сондензэ кортыть ансяк лембе валсо ды ёвтыть седейстэ ютыця поздоровт. «Эрзянь правда» газетань важодицятне вейсэндявить неть паро валтнэс ды арсить тензэ кеме шумбрачи, эрямосо уцяска, важодема таркасо од изнявкст!

Юлия Еремина