Гражданской оборонань ды апак учонь зыянтнэнь а нолдамонь коряс мероприятиятне нень неень шкасто явови башка мель. Неть читнестэ Отяжбуесэ ютавтовсь Мордовия Республикань Гражданской оборонань ды чрезвычайной тевтнень коряс госкомитетэнь коллегиянь покш промксось ды весе районтнэнь администрациятнень представительтнень марто тонавтнемань методикань промксось. Эйсэст ульнесь Мордовиянь Прявтось Артём Здунов.
Ледстясынек, апак учонь зыянов тевтнень а нолдамонь ды витемань вейкине государственной системась (РСЧС) вейсэнди управлениянь органтнэнь, исполнительной властень федеральной органтнэнь, РФ-нь субъекттнэнь исполнительной властень органтнэнь, местной самоуправлениянь органтнэнь ды организациятнень, конатнень полномочиятнес сови апак учонь зыянов тевтнеде эрицятнень ды территориятнень ванстомань коряс кевкстематнень решениясь. Отяжелень райононь прявтось Константин Николаев невтизе республикань Прявтонтень, кода муниципалитетэсь анок ЧС-нь шкасто важодемантень: теезь администрациянь управлениянь запасной пункт, приёмной эвакуационной пункт ды гражданской оборонань лия объектт. Артём Здунов весемеёндо ваннызе, кода анокстазь те важодемась, кона ёнкстнэнень эряви путомс башка вийть. Республикань руководителесь истя жо ваннынзе апак учонь зыянов тевтнень а нолдамонь ды витемань вейкине государственной системань группировкань вийтнень ды систематнень. Коллегиянь промксонть панжомсто Артём Здунов тешкстась: Россиянь Федерациянь Президентэнть Владимир Путинэнь кармавтоманзо коряс регионсонть ютавтозь покш важодема ванстомань уровенень кастоманть, истя жо властень органтнэнь ды организациятнень тевтеемаст ладямонть коряс. «Раськеютконь террористэнь структуратнень ды омбо масторонь спецслужбатнень эряза тевтеемаст пингстэ республикасонть ванстови поражениянь средстватнень тевс нолдамонь ды экономикань, уштомань-энергетикань, комплексэнь, транспортонь, эрямонь ды критической инфраструктурань прявт объекттнэсэ диверсиятнень ютавтомань пелемачись, – тешкстась МР-нь Прявтось. – Секскак эряви чарь кодемс, кона ёнкстнэнь коряс виевгавтома важодеманть. Неень ванномась ливтинзе лангс талновтыця кевкстематнень, конат токшить весе районтнэнь. Целанек жо РСЧС-нь территориальной подсистематнень, весе уровентнесэ управлениянь органтнэнь вийтнень ды средстватнень парсте ладязь тев теемаст вельде апак нолда апак учонь покш зыянт». Ризксэнтень, эзь удала ванстомс кирвазематнень киртямост. Теде башка, талновтовты толонь мадстемань аволь пек вадря техникась ды депотнень таштомгадомась. Кода тешкстась Артём Здунов, истямо инфраструктуранть марто васов а туят, сонзэ одкстомтоманть коряс эрявикс мельтне совавтовить тевс. Башка тевтеемат, кода тешкстась республикань Прявтось, веши квартиратнесэ ды эрямо кудотнесэ кирваземадо автономной извещательтнень путомань коряс тевесь. «Нама, васенцекс эряви важодемс СВО-нь участниктнень семиятнень, ламо эйкакшонь ды сеть се миятнень марто, конат понгсть эрямонь стакачис, сыре ломантнень марто», – мерсь Артём Здунов. Мордовиянь Прявтось истя жо тешкстызе гражданской оборонань ды эрицятнень идемань коряс должностной лицятнень ды специалисттнэнь анокстамга исполнительной дисциплинань эрявиксчинть. Коллегиясонть кортасть МР-ва Россиянь МЧС-нь Главной управлениянь прявтось Сергей Репин, МР-нь Гражданской оборонань ды чрезвычайной тевтнень коряс госкомитетэнь председателесь Андрей Наумов, МР-нь здравоохранениянь министрась Олег Маркин, МР-нь велень хозяйствань ды продовольствиянь министрась Антон Илюшкин, муниципальной районтнэнь руководительтне.