«Защитники Отечества» фондонь прявт тевтнестэ вейкесь – велявтомс сэтьме эрямос специальной военной операциянь ветерантнэнь. Тень кувалма региононь фондонь филиалонь важодицятне пурнасть-тейсть киштемань коряс курсат СВО-нь ветерантнэнень.

Неть читнестэ Полежаевень ульцясо аштиця фондонь филиалсонть ютась эштё вейке истямо занятия. Те мероприятиянтень сакшность кото ветерант. Киштемасо омбоце ялгакс тенст кармасть социальной координатортнэ. Тренерэнть мельга сынь тонавтнизь бачата содавикс киштемань зярыя эскелькстнэнь.

Бачата киштемась ловови универсальноекс. Эйзэнзэ тонады эрьвась, кода одось, истя сыреськак, ды икелепелень кодамояк анокстамо а эряви. Неявсь, кода киштеме ушодомадонть мейле сеске киштицятнень чамасо налксезевсть мизолкст, мезесь кортась участниктнень паро ёжомарямодост. Киштеманть прядовомга уш весе тонадсть эскельксэнь вейкетьстэ тееме.

«Истямо мероприятиятнеде мейле стувтовить военной действиятне ды ушодат кецнеме вишка кеняркстнэс. Покш сюкпря Фондонтень истят лембе вастовоматнень кис!» – мерсь СВО-нь ветеранось Виталий Козеняшев. «Бачата – те седей витемань киштема, – мерсь киштемань коряс тренерэсь Юлия Слесарева. – Те мелень кепедиця вий, оймень ды рунгонь оймсема».

Киштематнес истят тонавтоматне кармить поладовомо седе товгак. Сёрмадстомась эйзэст моли социальной координаторонть вельде: Саранск ош, Полежаевень курось, 113 кудось, тел.: +7(8342) 39-28-82. Эх, пароль бу эрзянь-мокшонь киштематкак тонавтнемс!