Исяк топодсть 40 чить, кода тусь эрямосто Россиянь Журналистэнь союзонь членэсь, Мордовия Республикань ды РФ-нь культурань заслуженной роботникесь Татьяна Михайловна Ковалёва. Сон колоньгемень иеде ламо важодсь «Эрзянь правда» газетасо, кемгавксово иетнень эйстэст прявт редакторонь полавтыцяль. Малав кавксо иеть – «Сятко» журналсо.
Татьяна Михайловна Ковалёва (тейтерькс – Живаева) чачсь-кассь Отяжеле ёнксонь Таразбуе велесэ. Тетязо, Михаил Иванович, ды авазо, Анна Ильинична, трясть кемень эйкакшт, Татьяна чачсь кавксоцекс.
Тетязо, Михаил Иванович Живаев, ютась войнань толонть пачк. Ине Отечественнойстэ велявтсь ансяк 1946 иестэ, зярдо сехте покш тейтерезэ сёрмадсь М. И. Калининнэнь. Эйсэнзэ тешкстазель: «Семиясонть эйкакштнеде ламо, весе тонавтнить парсте, оршамс-карсемс а мейсэ, вачот, тетявтомо пек берянь». Ды теде мейле, кемень чинь ютазь, Михаил Иванович велявтсь кудов.
Живаевтнень тетяст-аваст весе эйкакшост туртов макссть образования, кавксотне тонавтнесть вузсо. Семиястост лиссть эрьва кодамо профессиянь ломанть: врачт, строительть, тонавтыцят, журналистт, экономистт, юристт, сюронь кастыцят. Татьяна Михайловнань лелязо, Виктор Михайлович, ламо иеть важодсь СССР-нь Гостелерадионь корреспондентэкс.
Татьяна Михайловна школасо тонавтнесь пек парсте. Секскак Орданьбуень педучилищав саизь тонавтнеме экзаментэме, сонзэяк прядызе якстере диплом марто.
– Орданьбуев якилинек комсь вайгельбеть ялго. Лавтовсот мезеяк кандат эштё. А уш кода сизят! Лембе шкасто эрьва субутасто кото урокто мейле якилинек. Телень якшамотнестэ – кавто недлянь ютазь. Кудосто чавонь кедть таго а сыргат – а мезде ули ярсамс. Сестэ кодаткак рюкзакт арасельть, лавтовонок трокс кескавт кандтнинек. Кескавонть уголтнэс чурькапрят содылинек, – ледстнесь Татьяна Михайловна. – Эрямс савкшнось ломань кедьга, сиведезь квартирасо. Удынек ве таркасонть кавтонь-кавтонь. Башка-башка кроватть весенень арасельть.
Се шкастонть педучилищань вете процентт прядыцятненень мерильть молемс тонавтнеме седе тов. Татьяна Михайловна понгсь сынст юткс. Н. П. Огарёв лемсэ МГУ-нь историянь-филологиянь факультетс (сестэ сон ульнесь пединститутонь литературань факультетэкс) саизь истя жо экзаментэме – ютась ансяк собеседования. Вузсояк тонавтнесь ансяк «ветес». Студентэнь шкасто комсомолонь путёвканть коряс якась важодеме Казахстанонь целинав, ардомс савсь товарной вагонсо. Меельце каникулатнестэ ялганзо марто роботасть Саранскоень мясокомбинатонть строямосо.
Тонавтнеманть прядомадо мейле Татьяна Михайловна пек моликсэль важодеме школав. Ансяк лиссь лиякс. Сонзэ кучизь «Эрзянь правда» газетав. Васенце шкастонть подчитчицаль. Газетасонть важодемстэ ютынзе малав весе должносттнень: ученица, литсотрудник, старшей корреспондент, отделэнь прявтонь полавтыця, отделэнь прявт, ответственной секретарь, прявт редакторонь полавтыця.
Те виев журналистэсь ламо сёрмадсь республикань содавикс ломантнеде: Степан Эрьзя скульптордонть, Гавриил Вдовин композитордонть, Марина Попович лётчицадонть ды ламо лиятнеде. Зярыя иеде икеле Татьяна Михайловна сёрмадсь «Тынь кортатадо эрзякс?» покш статья, конась лиснесь «Эрзянь правдасо», «Сяткосо» ды лия изданиятнесэ, путозь Интернетс. Те статьясь пек вечкевсь ловныцятненень, ламот ёвтасть сюкпрянь валт авторонтень, кона ёвтынзе те статьясонть тиринь келенть кисэ ризнэманзо.
Т. М. Ковалёва сёрмадсь пек вадря очеркть рузонь кельсэяк: «Родная улица моя», «Частица Родины великой», «Есть такая служба» ды лият. Вадря важодеманзо кисэ Татьяна Михайловна казезель «За доблестный труд. В ознаменование 100-летия со дня рождения В. И. Ленина», «Ветеран труда», «Дети войны» медальтнесэ, Мордовской АССР-нь Верховной Советэнь Президиумонь Шнамонь грамотасо, МР-нь Журналистэнь союзонь премиянь кавксть лауреат, М.А. Кастрен лемсэ Суоминь культурань вейсэндявксонь конкурссо ды лия пелькстамосо изниця. Россиянь Журналистэнь союзонть пельде казезь «За заслуги перед профессиональным сообществом» почётонь тешкссэ.
Минь, тиринь кельсэ лисниця газетань важодицятне, аштинек покш мельспаросо эрзянь ды рузонь кельсэ парсте сёрмадомо маштыця эрзянь аванть марто содавиксэкс улеманть, ниленьгеменде ламо иень перть ояксчинь сюлмотнень ванстоманть коряс.
Самай зняро шка ютась Татьяна Михайловна марто васенце вастовомастонть саезь. Н. П. Огарёв лемсэ МГУ-нь филфаксо тонавтнемстэ ледстневи, 1982 иестэ сынь васенцеде практикав «Эрзянь правда» газетас. Те шкас эзь стувтово, кодат талномат ютасть седеем пачк, а пряван – кода вастсамизь редакциясо. Допрок сеске сынь ютасть прявт редакторонь полавтыцянть Татьяна Михайловна марто вастовомадонть мейле. Сон, теке тиринь ава, Лида Годяева ялгам марто совавтымизь эсензэ кабинетс ды кармась чайде каванямонок. Теке шкасто тенек ёвтнесь, кодат тикшеть лопавтсь ды косто сынст пурнынзе. Нать, сеске редизе ламонь содыця (опытной) журналистэсь талноманок ды чарькодсь, кода минек эрявсь оймавтомс. Истят арсематне ульнесть сестэ, мейле жо шкань ютазь чарькодинек, те Татьяна Михайловнань истямо обуцязо. Кодамо ломанесь бу сонензэ аволь сова, кинь марто бу аволь карма кортамо, прянзо прявтокс эзь невте, эрьванть марто маштсь валтнэнь ладсеме истя, прок икелензэ ашти умонь ялгазо.
Текенень поладсынек, зяро од ломанть сон тонавтсь тиринь кельсэ сёрмадомо, апак покорда публикациянь анокстамо ды прявт марто кортамо маштомо. Ды весе тень свал тейсь шождасто, чевте мизолксонь казезь ды эрявикс темань коряс ледстнемань ёвтнезь.
Ламо иетнень ды пандемиянь шканть лангс апак вано, сон ялатеке яла сакшныль минек редакцияс, пачтякшнось тенек меельце кулятнеде, ёвтнесь лезэв превс путомат печатазь публикациятнень коряс. Лиясто шнасынзе, эрси, сёвномскак понгилинек, ансяк тень теиль аволь кежейстэ, тевень содазь, лезэнь кандозь.
Важодемадо башка, сон пингень перть ветясь общественной робота. Кеветее иетнень перть Татьяна Михайловна ульнесь журналистэнь ветеранонь организациянь прявтокс.
«Эрзянь правда» газетань редакциянь музейсэ те шкас ванстовить Журналистэнь вейсэндявксонь первичной организациянь протоколтнэ, косо Татьяна Михайловна сёрмадсь эрьва кодат вешемат-энялдомат те коллективсэнть важодицятненень эрямо таркань, транспортонь ды лия эрявикс мелявкстнэнь коряс.
Меельце иетнестэ сон сеедьстэ гайневтиль «Эрзянь правда» газетань редакцияв. Ёвтниль тенек, одтнэнень, икелень эрямодонть, содавикс ломантнеде. Ды, мезесь дивавты, сон шождасто ледстниль умонь шкатнестэ лисезь тевтнень, кинь марто вастневкшнесь ды мик мезде кортась. Сон пек ламо кирдиль мельсэнзэ ды бажиль кадомс минек туртов.
Тевензэ домкасто содыця журналистэсь секе-тев ёвтакшнось тенек од темат, мезе ланга пароль бу сёрмадомс тиринь газетань лопатнесэ. Истя жо минь свал вешилинек кедьстэнзэ публикацият эрьва кодамо темас, сехте пек минек газетасо икелень важодицятнеде, сонзэ историядонть. Неть кевкстематнень коряс седе домка каршо валт сондензэ башка ней миненек а кинень ёвтамс…
Валентина ЮДИНА