Неень шкасто шкинемасо палыця цёраломанть вастат чуросто. Те тевсэнть яла седе икелеть тейтерь-аватне. Ды уцяскав се семиясь, зярдо тетясь теи сонсь эрьва кодат налкшкеть эйкакшонзо марто.
Михаил Зотовонь чачома велезэ – Отяжелень райононь Низовкась. Нинзэ, Любань, муизе Ицялбуень Вечкусы велестэ. Вана уш кода 22 иеть сынь эрить Саранскоень ТЭЦ-2 посёлкасо, косо Михаилэнь содасызь кода ёроков кедь ломаненть. Сон машты тееме, ловт, эрьва мезе, налкшкестэ саезь мебельс, чарькоди эрьва кодамо витнемас-петнемас, электроникас ды седе тов. Арась истямо тев, конась бу аволь топавтово сонзэ сырнень кедтнесэ.
Зярдо чачсь-кассь васенце цёрынезэ Андрей, тетят-цёрат васня кармасть тейнеме мазый налкшкеть эйдень кужонь, мейле школань покш читнес, эрьва кодамо пелькстамотнес. А кодат сонзэ кедь алдо лиссть письмаркудот, нармунень мельстуиця андомкат! А стяко ошонь конкурстнэсэ сынь свал сайнесть васенце таркат. Дипломтнеде ды грамотатнеде кудосост, кода корты азоравась, истя ламо, натой сатыть вельтямс нупалень стенанть целанек. «Сон минек пек сэтьме, чевте седей, эйкакшонь вечкиця. Машты мазыйстэ артомо ды свал кирди мельсэ-превсэ од арсемат», – шны мирдензэ Любовь Игоревна. Сонсь Михаил Владимирович эсь прядонзо кортамо а вечки, ды, паряк, а мезекскак. Седеяк парсте тень тейсызь теевксэнзэ, конатнень лангс ванозь, чарькодеви – те ломаненть чевте седеезэ ды мазый оймезэ.
Зярдо омбоце цёрынесткак тусь школав, сестэ сынь тусть седеяк васов. Колмоце классто саезь Даниил тетянзо марто кармась тейнеме налксемань техника «Школьный патент – шаг в будущее» раськеютконь пелькстамонтень. 2022 иестэ «Ловонь урядамонь сы шкань тракторонть» кис «Изобретения» номинациясонть сон сайсь натой Гран-при! Ды лиякс а кодаль, бути налкшкесь теезь целанек эсь кедьсэ картонсто, пластикстэ, ташто налкшкетнень пелькстнэстэ ды натой ардовтови ветямонь пульткесэ. Кода ёвтнесь Даниил цёрынезэ: «Те тракторсонть ули весемесь «важодеманть туртов» – панжтневиця кенкшкеть, ветямка, управлениянь панель, зеркалат. Капотонть потсо ашти «виев» двигатель, выхлопонь труба, валдомтомка. Ды мезесь эйсэнзэ од – те светоотражатель марто кечесь, конась «эждеви генераторсо». Те эряви сень кис, штобу кечентень токавомсто солазо ловось. Истямо тракторонь моделесь теезь сень кис – тельня ошонь китне улест ванькст».
Эх, пароль бу те тракторнэсь улевель алкуксонь! Паряк, китнеяк тельня улевельть седе ванькст… Арсетяно, сыця шкасто муеви истямо инженер, кона топавтсы те тевенть. Кие соды, паряк, сонсь Даниил карми содавикс инженерэкс ды карми нолдамо модернизированной техника…
А 2023 иестэ теке пелькстамонтень тетят-цёрат анокстасть ламо функциянь машинка, конань лемдизь эрзякс – «Лездыця». Теке номинациясонть сынь сайсть 3-це тарка. Тагояк фанерасто ды лия кедь ало уликсэнть эйстэ лиссь од «инженерной сооружения» липниця маячок марто. Фаратнеяк эйсэнзэ валдомтовить. «Тесэ ули ведень туртов чакш, шлангт ды ведень туртов насос. Весе те важоди батарейкасо ды ветяви пультсо. Велявтнемань платформанть лангсо теезь операторонь площадка. Тозонь куземань туртов теезь кузтема, конась педявтозь башка таркасо. Истя жо машинантень аравтозь трос марто лебёдка, щётка, редуктор ды ведень ожа (рукав)».
Те моделесь «топавты» ламо тевть: шли-ванськавты вальмат ды кудонь фасадт, пургси зыянов унжадо чувтот, шли пулев кить, мадсти аволь покш толт ды кепеди сталмот. Машинканть кувалмозо лиссь пельметрашка, сэрезэ малав 40 см, келезэ – 20 см. Нама, истямо покш машинкасонть эрьва цёрынесь налксевель паро мельсэ.
Те иестэ Даниил тусь 3-це № школань 5-це «Б» классос. Цёрынесь уш покш, секскак сынь тетянзо марто велесэ бабаст туртов анокстасть казне – эмежень-фруктань электрической костямка. Истя эрзякс лемдизьгак – «Костямка». Пелькстамонть туртов анокстазь видеосюжетсэнть цёрынесь паро мельсэ ёвтни эйстэдензэ. «Весть мон мария, кода кортнесть авам ды бабам. Бабань ульнесь мелезэ рамамс эмежень костямка. Мон тень коряс пшкадинь тетянень ды минь мартонзо арсезевинек, мезекс рамамс, эрь, тейтяно минсь. Мерезь – теезь. Костямкась лиссь пек вадря ды мазыйгак. Сэрезэ – 90 см, келезэ – 40 см, потмозо – 35 см. Лангозо теезь ДВП-стэ. Ушо ёндо мазылгавтозь артовкссо. Летькенть лисеманзо туртов вере теезь апокш труба. Оргсуликань кенкшкесь пекстави магнит вельде. Лембенть кирдеманзо кис потмозо чавозь фольгасо. Потсонть аравтозь колмо лотокт – чувтонь каркасос кемекстазь чова марля. Ули лампа ды термометра, конась невти шканть, числанть, летькенть ды температуранть. Лембенть алдо пани вентилятор.
Зярдо сы кизэсь, минь усксынек те костямканть велев бабань туртов. Сонензэ те карми покш казне ды седеяк мельспаро се мельденть – сонзэ теинек минсь тетянь марто».
Сёксень выставкас тетят-цёрат теизь Золушкань каретанзо, конась мазыйстэ керсезель дураккуярсто, чарытне теезь якстерькайстэ, сонсь лишмесь – зярыя пурькасто. Ансяк кучерэсь ульнесь пластилинэнь.
Ошонь эрьва иень «Якшаматянь мастерскоезэ» пелькстамонтень Зотовтнень семиясь анокстызе иень символонть – чувтонь лишминес кильдезь якстере нурдынесэ ардыця Пиже Дракононть.
Арсетяно те шкинемань семиянтень од мельть-превть, кеме шумбрачи, вейке-вейкень вечкема ды сыця шкасто ламо од арсевкст. Улевельтькак истят тетятнеде седе ламо, кодамо мазый улевель эрямонок!
Марина Агафонова