Ковдо ламо шка ютась Мордовия Республикань Прявтонть А. А. Здуновонь МР-нь Госсобраниянтень ды республикань весе эрицятненень Кучомадо мейле. Ледстясынек, Артём Алексеевич те иень Кучомасонть покш мель явсь специальной военной операциянь участниктненень, ветерантнэнень ды сынст семиятненень. Минь тиринь газетань лопатнесэ поладтано республикань эрицятнень мелест-арсемаст печатамо.
МР-нь Госсобраниянь депутатось, Саранск ошонь 26 № лицеень кадетэнь класстнэнь коряс МР-ва МЧС-нть пельде кураторось Сергей Павлович Екатеринин:
– Мордовия Республикань Прявтонть Артём Алексеевич Здуновонь МР-нь Госсобраниянтень ды республикань весе эрицятненень Кучоманзо кунсоломо тердтнимизь васенцеде.
Тешкстаса, Кучомасонть токазь эрямонь весе ёнкстнэ, сон максы кемема вандынь чинтень, вельдензэ тееви эскелькс икелев! Миненек жо а эряви стувтомс сень, што МР-нь Прявтонтень ськамозонзо весе ёвтазь тевтне а топавтовить. Эрьвантень юткстонок, васняяк эсензэ таркасо, эряви парсте важодемс. Невтемакс, неень шкане ламо пеняцямот общественной транспортонть коряс. Те стакачинть кадык изнясызь сеть, кинь эйстэ те ашти.
МР-нь Прявтось Кучоманзо ушодызе военной спецоперациянь участниктнеде кортамостонть. Те монень пек малавикс темась, монь цёрамгак, армиясо служамодо мейле, тусь масторонть кисэ аштеме, изнямонь чинть малавгавтомо. Минь сонзэ марто пек кемтяно тенень.
* * *
Покш Березникень муниципальной райононь прявтось Иван Иванович Игонов:
– МР-нь Прявтось МР-нь Госсобраниянтень Кучоманзо ушодызе специальной военной операциянь участниктнеде ды сеть ломантнеде пачтямосто, кить масторонть туртов аволь шожда шкастонть муить шка ды максыть лезкс минек ванстыцятненень. Сон тердинзе весень поладомс те тевенть минек цёратненень лезксэнь максомга.
Кучомасонть кармавтови паролгавтомс аволь ансяк течи топавтовиця тевтнень, истя жо сы шкастояк. Икеленек аравтозь ламо тевть минек региононть социально-экономической весе ёнкстнэнь коряс. Башка мель явови демографиянтень, пштистэ аштить эйкакштнень ламолгавтомадо, шумбрачинь ванстомадо, семиятнень кемекстамодо, духовно-нравственной койтнень-кирдатнень вельмевтемадо кевкстематне.
МР-нь Прявтось райононь прявттнэнь икелев путсь конкретной тевть, мерсь башка мель явомс кадозь кудотненень, конат пек а мазылгавтыть велетнень. Теде башка, кармавтсь теемс ули-паронь коряс инвентаризация школатнесэ, поликлиникатнесэ ды лия учреждениятнесэ. Миненек виевгавтома важодеманть квалифицированной кадратнень тердемга ды сынст туртов весе эрявикс условиятнень теемга, трудонь ломантненень эрьва ёндонь лезксэнь максомга. Нать, а стяко 2024 иесь Мордовиясо яволявтозь трудонь династиянь иекс.
Сы иестэ эряви ютавтомс спортонтень ды туризмантень алтазь ламо мероприятият. Икелепеле – Президентэнь кочкамотне, сынст ютавтомат весе вешематнень топавтозь.
Валентина Юдина