Эрямось чии ды чии, ве чискак а лотки лекстямо… Ней уш удалов кадови эйкакшпингесь. Кассть вишкапингень ялгатне. Эрьванть ули кудозо, семиязо ды вечкевикс важодема тарказо. Эрьвась эйстэденек капши эрямонь киланга, умок стувтовсть сахарсо ваднезь кшипечттне, конатнень явилинек котов-кавксов, ды вейсэнь кстыень-мастумарень кочкамотне, ней уш кияк а човси Ага бабань кузтемапетнень – минь касынек, тукшнынек веёнга ды вейке-вейкенек стувтынек…
Ансяк кинь тесэ чумондомс, бути эрьвась эйстэденек тусь эсензэ киява?! Весень свалшкань аюткот, кудонь мелявкст, певтеме важодема ды ламо лия мезе. Ялатеке а весе ялгатне стувтыть вейкест-вейкест. Неть читнестэ мон вастневинь эсенек куринкань цёрабай марто. Шумбракстнинек, пейдезевинек ды ушодынек аламонь-аламонь кортнеме, кевкстнеме, кие кода эри. Ламо мезе од маринь Аксёнов Мишкань эрямодонзо. Мартонзо кортамсто превезэнь састь рузонь содавикс фильмасто саезь валтнэ, конатне пек ладить сонензэ: «Спортсмен, комсомолец ды эрзянь мазый цёра!». Весемеденть седе тов.
Чачсь-кассь каршонок эриця цёрась, Миша Аксёнов, Орданьбуень райононь Орозбие велесэ 1990 иень ноябрянь 21-це чистэ эрзянь семиясо. Авазо ды тетязо ламо важодсть велень колхозсо. Тетязо, Владимир Алексеевич, колхозонть каладомс важодсь водителекс, авазо, Ольга Ивановна, тейтерькс роботась Алатырень электроприборонь заводсо штамповщицакс, мейле зярсыя яксесь колхозонь тевень тейнеме. Течинь чинтень Мишань кадовсь ансяк авазо, тетязо тусь эрямосто одсто. Тетядонзо цёрась ледстни пек лембестэ. Вана ледстнематнестэ вейкесь:
– Нейгак сельмень икеле ашти тетям ды сонзэ гармониязо. Вечкиль ды маштыль седямо. Сонзэ гармониявтомо велесэнть а ютниль вейкеяк свадьба ды лия ламо покш чить. Зярдо ульнинь вишкине, сон бажась тонавтомс монь налксеме те седямопельсэнть. Виде, варчакшнынь, ансяк тевень эзть туе. Пилесэнь нейгак гайги тетянь гармониянзо гайтесь, киньгак марто а тапави ды зярдояк а стувтови. Пазось казекшнесь тетянень киньгак ёнов а молиця сюпавчи: сонзэ ульнесь эсензэ моронь ды музыкань марямозо.
Гармониясо седямодо башка, Мишань тетязо эрямонзо перть кастсь умаринань садпире. Ней тосо кодамо ансяк умаринань сортт арасть! Сельметь кадовить. Ютак Орозбие велева ды костояк истямо садпире а вастат. Тетянзо куломадо мейле, Миша вансты ды полады те тевенть, шкань празь яла уски ды озавты кодамояк од сортонь умаринат эли грушань чувтот.
– Пек мельспаро, зярдо тунда сат велев малавикстнэнь марто, а умаринань пиресь ашо вельтявкс потсо. Маряви, ойметь максовлик те тантей чиненть кисэ, конась срады пертьпельга цветиця чувтотнестэ. Истямо тантей чине костояк лиясто а марят. Сон тапарятанзат прянек-пильгенек ды мейле чоп якат теке иредезь. Ёжось вадря! А вана кизэнть прядовома малав седеяк вадрялгады. Мик прят веляськады кенерезь умартнеде. Вейке-омбоце кепедят, токавтат судонтень ды чинедест а пештяват. Мон яла якан, якан пиреванть…
АНЕСТЕЗИОЛОГОСЬ – ЭРЯМОНЬ ИДИЦЯ
Неень шкасто Миша важоди С. В. Катков лемсэ Республиканской клинической больницясо. 2012 иестэ саезь полады медбратонь-анестезиологонь тевенть. Содави, цёранть важодема тевезэ аволь шожда. Ламо мезе юты прянзо велькска.
– Медицинань тевентень прям алтыя 11-це классонть прядомадо мейле. Авань кевкстеманзо лангс: «Цёрынем, мезекс кармат тонавтнеме?» – мон апак кавтолдо ёвтынь: медбратокс. Эйкакшчистэ саезь ульнесь эйсэнь истямо сяткине – лездамс эрьвантень, кодамо зыянс ломанесь илязо понго. Секскак, кочкамось прась Орданьбуень медицинской колледженть лангс. Тонавтнеманть прядомадо мейле Таня сазоркам марто сыргинек Саранскоев важодема таркань вешнеме. Меленек прась Республиканской клинической больницянть лангс. Ды вана уш кевейкее ие тесэ важодян. Ве чияк эзинь янксе, мекс кочкия те тевенть. Кодамо бу стака дежурства эли сэредиця илязо уле – прям а нолдтнян, капшан лездамо. Те монь призваниям, – тешксты Миша.
Михаил мельс ледстинзе ковидэнь иетненьгак. Сынст ледстямсто цёранть рунгозо сеске соракады.
– А сёпан, пек тандавтымизь те ормась. Васенце читнестэ кияк эзь сода, кода ды мейсэ идемс ломантнень те ормадонть. Мезе теемс, кинень пшкадемс… Ансяк сюкпря Пазонтень – цидярдынек! Ды ней сеть читне тень марявить берянь онокс. Минек больницянть теекшнизь госпиталекс. Ятокс жо ульнесь аволь ломань – киненьгак а содавикс орма. Ледстяса, кода чинек-венек эринек важодема таркасо. Сестэ кияк эзь арсе, кодамо ковкерькссэнть чись ды зяро шказо… Весе мелявтсть, кода лецямс ды лездамс сэредицятненень. Мельсэнь вейке коллеганть историязо. Васня пильге лангсто прась сонсь, мельганзо жо весе семиязо. Зярыя чинь ютазь ёжонзо витинек, а вана малавиксэнзэ эзть идеве. Мельга-мельцек кулость… Пек пелинек ваномс сонзэ сельмес, а содылинек, кодат валт кортамс. Ансяк истят ломантне маштыть пряст ветямо, эрямс мелензэ эзизе синде, важоди течинь чис, кияк а соды, мезе седейсэнзэ, ансяк минек ютксо сон свал васенце, кедензэ эзинзе нолда, лезды сэредицятненень, – ледстни Миша.
Ёвтнесь Миша эштё вейке тамашань тевде.
– Ней уш, нама, пейдян эсень прям лангсо, а сестэ истя тандадынь. Минек реанимациянь отделенияс усксть од цёрынька. Диагнозозо – клинической кулома. Нама, минь апак лотксе реанимировинек эйсэнзэ. Зяро ливезь ланганок чудсь, ансяк мезе-бути ялатеке кармавтсь эйсэнек апак лотка важодемс ломаненть лангсо. Зярыя шкань ютазь сон панжинзе сельмензэ ды секе минутастонть кирнявтсь таркастонзо ды пейдезь сыргась палатаванть якамо. Мон таймазкадынь. А мондень сыре коллегатне ансяк пейдезевсть те тамашанть лангс ванозь. Вейкесь эйстэдест вадяшимим лавтов ланга ды мерсь: «Минек отделениясо истяяк эрси, ускить кулозь ломань, шкань ютазь вельмевтьсынек. Ды те весе элексиртэме, минсь», – пейдезь ледстни цёрась.
Нама, а мезть кортамс, Мишань важодемазо стака ды пешксе эрьва кодамо пшти ёнксто. Бути эрьва важодема чидензэ карми ёвтнеме – аволь вейке книга лиси. Эрьва чистэ ускить од пациентт, малав эрьва чистэ масторонть лангс чачи кодамояк од орма, ды Мишань кондяттнэ чинек-венек анокт лездамо ломантненень.
РОССИЯНЬ ЧЕМПИОН
Цёранть эрямосо покш тарка саи спортось. Те тевденть Миша пек вечки кортамо. Эрямонь кинзэ лангсо сон варчнизе прянзо тренерэкскак ды те весе вейке паргосо медицинанть марто. Мон истямо ломань ланга свал кортан: «Алкуксонь мараля!»
– Спортонтень карминь явомо покш мель школасо тонавтнемстэ саезь. Кода весе цёратне, вечкилинь кепсеме рунгом, гирят ды ламо лия мезе варчнинь. Мейле, кода 2008 иестэ молинь тонавтнеме колледжев, эрьва чокшне Сергей ялаксом марто якинек спортзалов. Нама, васенце невтевкстнэс пачкодинь аволь курок. Пельие ансяк тонавтнинь техниканть, ванынь лиятнень лангс, ламо книгат ды журналт ловнынь, эдь се шкастонть монь арасель Интернетэм ды сенсорной телефоном, ансяк ульнесь покш мелем теемс спортивной рунго. Нама, медицинасо тонавтнемаськак макссь тень покш лезкс. Меельце курстнэсэ, зярдо ушодынек тонавтнеме анатомия, мон карминь нильнезь нильнеме весе статьятнень ды книгасто материалтнэнь. Пек покшоль мель тонавтнемс ды вадрясто чарькодемс, кодамо кельсэ кортни ломаненть рунгозо, штобу мейле весе неть содамочитнень маштозь совавтомс спортивной техникантень, – мельспаросо ёвтни цёрась.
Зярдо Миша сась важодеме Саранскоев, сон секе жо чокшнестэнть сёрмадстызе прянзо спортзалов. Ды истя аламонь-аламонь кармась виевгадомо спортонь килангсо.
– Тесэ, ошсо, мон васняяк ушодынь якамо «Олимп» эйкакшонь-од ломанень спортивной комплексэв. Мейле 2016 иестэ саезь ды течинь чис якан «Фитнес лайфс». Мельс ледстяса, кода молинек тов ды тосо тренертнэ кармасть пурнамо командат, штобу од спортсментнэ ардтневельть эрьва кодамо ошка ды невтевельть эсь рунгост эрьва кодамо пелькстамотнесэ. Се шкантень монь уш ульнесь спортивной рунгом ды ламо кодамо упражнениясо ды техникасо маштылинь прянь невтеме, секскак мон понгинь командас, конасонть ульнесть кемгавтово-кемголмово ломанть. Истя, 2017 иень сёксестэнть саезь команданок ушодсь ардтнеме Россиянть келес, – ёвтни Миша.
Васенце соревнованиясь ульнесь Нижегородской областень Дзержинскойсэ. Мишань команданзо пелькстамонь ёнксокс ульнесь «Пляжонь бодибилдингесь». Тевесь истямо: спортсменэсь лиси сцена лангс ды сти истя, штобу вадрясто неявольть рунгонь весе мышцатне. Ды спортивной жюрись кочкасы сехте вадря ды спортивной рунго спортсменэнть. Мишанень максокшность нилеце тарка, мезесь пек кецявтызе од цёранть. Се чистэнть саезь сонзэ седеяк кепедсь мелезэ важодемс эсензэ рунгонзо лангсо.
– Россиянь чемпионокс мон теевинь Курск ошсо. Нама, покш кенярксось ульнесь. Сестэ кувать эзинь кеме сеньс, што мон, велень цёрась, теевинь чемпионокс. Мейле Ростов-на Дону ошсо саинь васенце тарка, седе тов Московсо ульнинь васенце ды истя теевинь Россиянь колмоксть чемпионокс. Нама, мейле ульнесть ламо лия ошт ды саезь таркат, ансяк васенце изнямонь танстесь нейгак ашти мельсэнь, – корты Миша.
Седе тов од цёрась варчнизе прянзо тренерэкс. Кедь алонзо ульнесть зярыя ломанть. Эрьвась сакшныль эсензэ вешема марто. Ды эрьвантень эрявсь явомс ламо шка ды вий. Михаил эзь ацирьгале, сон тевензэ топавтсь мельспаросо. Ансяк 2019 иестэ, зярдо ушодовсь ковидэсь, ламо ломанень пурнавома таркатнень пекстнизь ды цёранть тренерэнь тевесь лоткась.
– А сёпан, мелем нейгак эзь юта улемс тренерэкс, ансяк зярс якан спортзалов ёжонь витеме. Ды кие соды, мезе учи эйсэнь вандынь чистэ, паряк, одов вельмевтьса те тевенть?! – пейди цёрась.
ВЕЧКИЦЯ ТЕТЯ
Ды, нама, самай прявтось Мишань эрямосо – малавиксэнзэ. Лена нинзэ марто сынь трить-кастыть эрзянь мазый кавто тейтерькат. Веженсесь чачсь аволь умок. Семиясонть эсь ютковаст од ломантне кортыть эрзякс. Кадык эйкакштне марить ды кортыть те гайтев ды теке чудикерьксэкс шольниця кельсэнть. Кортамонть поладомсто цёрась эзизе сёпо эсензэ кенярксонзо ды мерсь:
– Потмозон а кельгстяви мельспарось – мон таго теевинь тетякс! Лован прям пек уцяскавокс, эдь мон кавто тейтерень тетя. Те кодамояк лия мель марто а тапасак, улемс цёрынькань тетякс – те вадря, а вана тейтерькань кужинес зярдо понгат, те вана ёвкс, – лембе мизолкс марто корты Миша.
Нама, Мишань валонзо марязь, весень минек меленек явовить, ансяк кадык превс ды седейс токить валтнэ: косо бу тон илязат важоде, мезе бу тон илязат тее те эрямосонть – свал улест нежеть ды виеть кеместэ аштемс пильге лангсо, свал улест вакссот малавиксэть, конатне казитькак те эрямонь виенть.
Алёна Артемьева