Ацамковонь 22-це чистэ, кувать сэредемадо мейле, тусь эрямосто Брыжинский Михаил Иванович, Народной писателесь, Мордовия Республикань Государственной премиянь лауреатось.
М.И. Брыжинский чачсь 1951-це иень ожоковонь 6-це чистэ МАССР-нь Кочкурбуень Од Тягловка велесэ тонавтыцянь семиясо. 1968-це иестэ прядызе Од Мурза велень средней школанть. 1977-це иестэ, армиясо служамодо ды Мордовской пединститутонь филфаконь прядомадо мейле, кармась важодеме эсь велесэ тиринь келень ды литературань тонавтыцякс.
М. Брыжинскоень «Половт» васенце повестьсэнзэ, кона печатазель 1983-це иестэ, невтеви эрзянь, мокшонь раськетнень XVIII-це пингень эрямост, сынст ды рузтнэнь вейсэнь тюремаст монголтнэнь-татартнэнь каршо, кавто раськетнень малавгадомань лисьмапрятне.
«Ради братий своих» (1986) М. Брыжинскоень повестезэ сёрмадозь рузонь кельсэ. Сёрмадеесь невти эйсэнзэ Разин Степанонь прявтсо крестьянонь войнасо равчирень раськетнень вейсэнь тюремаст.
«Поклонись борозде» (1988) романось ёвтни неень шкань велень стакачитнеде. М. Брыжинский парсте содасынзе велень эрямо койтнень, секс ламо мель яви сенень, мезе моли ломантнень оймесэ. Сёрмадеесь кочкась истят тевть ды геройть, конатнень вельде парсте удалась аволь ансяк артомс редявикс характерт, истя жо ёнсто невтемс велень эрямо ёнкстнэнь, конатнень кувалма аламонь-аламонь калады велесь, велень сех ёроков ломантне кадыть чачома таркаст. Романганть ютавтови велень хозяйствасо одкстомтомань эрявиксчиде арсема.
1991-це иестэ М. Брыжинский нолды «Эрямодо надобия» пусмо, ков совасть колмо ёвтнемат, Заку-ун« триптих ды «Пингень гайть» эссе. Седе пштистэ варштама «Заку-ун» триптихенть лангс. Эрзянь-мокшонь сёрмадейтнень ютксто М. Брыжинский васенцекс саизе те жанранть. Максовить ве темасо, идеясо ды сюжетсэ вейсэндязь колмо картинат. Тевесь моли чинь перть ды истя жо явови колмо пелькска – валске, чи, чокшне. Произведениясонть маряви геройтнень арсемаст-мелявксост эйстэ авторонь ёвтнеманть аявовомазо. Сёрмадеенть мелезэ-варштавксозо чарькодевикс, сон ливти лангс ломаньксчи асодыцятнень коест.
«Пингень гайть» (Мордкиз, 2004) эссесэнть сёрмадеесь варштась раськень стакачитнень лангс. Сон седе покш мель яви историянь ёнксонтень. М. Брыжинский зярыя ёвтни эрзятнень ды мокшотнень умонь эрямодост, научна панжи-невти лисьмапряст, чопавти валонь семантикас, ёвты кемевтиця валт этносонь коряс кона-кона варштавкстнэнь каршо. Эрьва тезисэзэ нежедеви научной даннойсэ, фольклоронь материалсо.
2009-це иестэ лиссь «Кирдажт» книгазо, ков совасть кавто повестть: «Кирдажт» ды «Эретник». «Кирдажт» повестьсэнть, фольклоронть лангс нежедезь, авторось художественна панжи кезэрьпингень койтнестэ вейкенть – инициациянь – цёрынетнень цёракс ды тейтернетнень од тейтерекс теевема коенть.
Михаил Иванович Брыжинский ульнесь раськень вельть ёроков сёрмадыцякс ды паро ломанекс. Книганзо умок вечкевсть ловныцятненень.
Республикань культурной общественностесь ризны.
Миненек сон карми вельть а сатномо…
ЯЛГАНЗО