Орданьбуень райононь Луньгань Майдан велень почтань отделениянь почтальонось Оксана Никитина кармась изницякс «Лучший по профессии» республикань пелькстамосонть. Сонзэ лемезэ ёвтазель народной хозяйствань лия сфератнесэ сехте вадря важодицятнень ютксо.
Икеле иетнестэ сехте вадря важодицятнень тешкстасть Республикань Кудосо ютавтозь торжественной промкссонть. Ансяк те иесь эпидемиологиянь тевтнень коряс лиссь а шождакс, секскак эсь тевсэнть сехте вадрятнень казизь районтнэсэ ды важодема таркатнесэ.
Мордовия Республикань прявттнэнь пельде изницянь дипломонть ды «Лучший по профессии» парсеенть Оксана Никитинанень казизе Орданьбуень муниципальной райононь Администрациянь прявтось Александр Антипов. Сон тешкстызе почтань отделениянть социальной эрявиксчинзэ ды эрьва важодицянть путовксонзо.
– Россиянь Почтась ды сонзэ услугатне эрявить ломантненень эрьва чистэ, седе пек велетнесэ, косо лия инфраструктурадонть ней кадовсь уш аламо. А весе эрявикс тевтнень топавтыцякс жо аштить почтальонтнэ – истят ёроков ды вадря важодицятне, кода Оксана Владимировна Никитина. Сынь, кодамо илязо уле ушосо пертьпельксэсь, капшить минек эрицятненень, кандыть газетатнень ды журналтнэнь, пандоматнень, сёрматнень ды лездыть ломантненень свал кирдемс сюлмот эсь малавикстнэнь марто, – тешкстызе Александр Николаевич.
Истя жо 2019 иень сехте вадря почтальононтень поздоровт ёвтась Мордовия Республикань Связень важодицятнень профсоюзонь организациянь прявтось Нина Саютинская.
Оксана Владимировна Никитина почтасо важоди колмо иеть. Кундась тевентень, арсесь, те нурька шкас. Ансяк почтасо важодемась вечкевсь ды кармась аванть туртов покш ды эрявикс тевекс. Течинь чине сонзэ участкасо 220 эрицят, ютксост 123 пенсионерт. Эрьва чистэ почтальонось ютни эсь участканть, конань кувалмозо 7 вайгельпеть, ды покш мельсэ топавты эсь тевенть. Никитинань сумказо зярдояк а эрси чавосто, эрьва кудосо улить ломанть, конат получить пенсия эли газетат ды журналт, пандыть коммунальной услугатнень ды телефононть кисэ, кармавтыть рамамс ярсамопельть эли шлямонь-нардамонь туртов эрявиксэнть.
– Нама, роботась аволь ансяк а шождатнестэ, истя жо ответственнойгак. Кудова кандтнетяно аволь ансяк газетатнень, журналтнэнь ды сёрматнень, пенсиятненьгак кандтано кудос малав эрьва получицянтень, – ёвтни Оксана Владимировна. – Эдь пенсиясотне седе ламотне сыре ломанть, почтас пачкодемс тенст стака. Аволь аламо истяткак, конат эрить ськамост, малавиксэст арасть. Сынь минек эйсэ покш мельсэ учить теке сехте паро ялганть. Кортнить мартонок, кевкстнить кулятнень. Сеедьстэ кармавтыть мезеяк рамамс. Ламо иетнень перть ладявсь истя, што минь сынст марто эрятано ве эрямосо. Мон содаса эрьванть эрямонзо, стакачинзэ ды кенярксонзо. Сынст туртов почтальонтнэ, мерят, малавикс ломанть: потмоёжост тенек панжсызь, семиянь тевест марто явить, эсь орматнеде ёвтнить. Арсян, сыре ломантнень эряви кунсоломс, эдь сыненст пек а сатныть ломань марто кортамотне. Минь весе свал ков-бути эрязкалетяно ды малавиксэнек туртов а явтано сатышка мель.
Тешксты Оксана Никитина важодема лувонь полавтовомантькак. Корты, ней газетань ды журналонь ловныцятнеде кармасть ков седе аламо, сёрмат жо вейке-вейкенень малав овсе а кучнить.
– Минек весень эсь полонс саимизь Интернетэсь ды телефонтнэ. Ней апак мелявто гайневтть ков мелеть. Бути жо неевлик ломаненть, лезды компьютерэсь ды скайпесь. Кие арсекшнесь истямодо. Эйкакшпорасто ледстнян, икеле эрьва почтальононть сумказо акепедевикс ульнесь. Эрьва кудосо сёрмадстыльть зярыя газетат ды журналт. А зяро сёрмат кучнильть! Эрьвась учось сынст, учось кулят роднянзо-раськензэ пельде, – корты Оксана Никитина.
Авась а лови эсь важодеманть покш тевекс ды кода-бути виздезь ёвтни максозь казнеденть.
– Мон топавтан эсь тевенть истя жо, кода Мордовиянь сядот почтальонтнэ. Минь тейтяно весементь, штобу эрицятне а пеняцявольть почтанть важодеманзо лангс. Нама, мельспаро, што тевенек редявикс ды тешкстави покш казнесэ, – кемекстызе изницясь.
Юлия Еремина