Саранскоень 28 № школасо ули боевой славань музей, конась важоди вана уш 30 иень перть. Те шкастонть тозонь пурнавсь ламо материал, малав колмо тёжат экспонатт – фотографият, сёрмат, боецэнь курмот-кармот ды ламо мезе лия. Пелест экспонаттнэстэ школань музеентень максызь солдаттнэнь малавиксэст.
А вана кой-кона предметтнэнь, невтемакс, оружиянь пелькстнэнь, боеприпастнэнь, снаряжениятнень, муизь сынсь тонавтницятне, конатне эрьва иестэ яксить военно-исторической экспедицияв 1941-1945 иетнень Ине Отечественной войнань тюремань таркатнева.
Тешкстама, школань «Память» вешницянь отрядонтень кой-кона совицятне неень шкасто топавтыть эсь патриотической долгост СВО-нь боецтнэнь ютксо. Отпусков сазь, сынь свал содавтнить тиринь школаст. Невтемга, февраленть прядовомсто покш класстнэсэ тонавтницятне ды тонавтыцятне вастневсть те школань прядыцянть марто, конась казезель «За спасение погибавших» медальсэ. 1,5 иетнень перть штурмовой бригадасо фельдшерэкс улемань шкасто сонзэ позывноекс кармась «Жгут» валось.
Автоматтнэнь ды армейской каскатнень, солдатонь котелоктнень ды боеприпастнэнь ютксо сельметне апак учне лоткить мультфильмасто Чебурашканть лангс. Кода толковась школань музеень прявтось Александр Планкин, те экспонатонть музеентень аволь умок максызь минек ёнкссо чачозтне, конатне неень шкасто участвовить спецоперациясонть. Келя, сынст экспонатост свал ламолгавтовить СВО-нь артефактсо. Вейке боецэсь максызе тенст касканзо, конась пельнезь осколкасо. Ули рацияст, ракетань пелькс, мик ули тосонь кшнинь ярмакто пешксе кескав.
Неень казненть, покш пиле марто героенть, историязо лиятнень ёнов а молиця. Кие сонзэ теизе – кияк а содасы. Налкшкенть боень шкасто чувто прясто муизе Россиянь вейке боецэсь. Кода видькстась солдатось, сон, келя, нама, аволь карма эцеме мельганзо виев леднематнень ало, бути бу аволизе нее налкшкенть форманзо лангсто россиянь колмо тюсонь шеврононть.
Седе мейле, кода минек подразделениятне ВСУ-нть кедьстэ саизь те тарканть, боецэсь Чебурашканть кандтнесь мештьсэнзэ берянденть эсь прянзо ванстомга. Седе тов энялдсь максомс сонзэ школань музейс.