А. С. Пушкин лемсэ библиотекасо ютась «Тонавтыця, поэт, ломань» книгань презентациясь. Сон алтавсь поэтэнть Илья Кривошеевень ледстнемга. Книганть авторось-пурныцясь – низэ, Анна Семёновна Кривошеева. Сон умок уш арась ютксонок, ансяк пингензэ перть ванстсь Илья Петровичте материалтнэнь. Книгантень совасть Кривошеевде малавиксэнзэ, ялганзо, тонавтницянзо ламо ледстнематне. Истя жо улить поэтэнть эсензэ валонзо.

Илья Петрович Кривошеев – МАССР-нь заслуженной тонавтыця, РФ-нь народной просвещениянь отличник, сонзэ ловить эрзянь поэзиянь ушодыцякс. Тедеде чачома чистэнзэ саезь топодить 125 иеть.
Книгань презентациясонть ульнесть поэтэнть тейтерезэ Ольга Ильинична, нуцьказо Анжелика Горбунова. Самай сынь ламо иеть бажасть нолдамс те книганть. Сынь ульнестькак те вастовоманть ушодыцякс.

– Авам, Анна Семёновна, умок уш нолдыксэлизе книганть. Ков ансяк эзь пшкале, кияк эзь лездакшно, яла ярмакт эзть муеве. Теке марто сон свал ёвтнесь творчествадонзо, яксесь школав, библиотекав, косо вастневсь школань тонавтницятнень марто. Авань эрямозо а шождаль, сон 8 иесэ кадовсь урозокс. А уш мезе савсь тензэ печтямс, зярдо тетянь стяконь кис пекстакшнызь, сонсь ансяк соды… Минек кудонок свал панжадоль весень туртов. Кедьсэнек ульнесть содавикс морыцят, артистт, писательть. Нейгак мельсэнь кирдян, кода весть телень вестэ сакшнось И. М. Яушев, – кортась О. И. Горбунова.
Ламо лембе ды паро валсо ледстязель Илья Петрович Кривошеев, кона кадовсь весень седейс валдо ды чевте ломанекс. Кодамо алкукс ульнесь – теде пачтяви книгасонть.

Вал сайнесь МР-нь Писателень союзонь правлениянь прявтось Т.П. Швецова. Сон тешкстызе, пек паро, зярдо эйкакштне ды нуцькатне а стувтнить, кирдить мельсэ малавикс ломанест: ютавтнить ледстнемань чокшнеть, нолдыть сындест книгат. Истя седе кувать карми эрямо ломаненть лемесь.

Паро ёжо весенень казсть МР-нь заслуженной артисткась Елена Воронина (сон морызе И. П. Кривошеевень «Тундодом» моронть) ды Саранск ошонь округонь Культурань кудонь морыцясь Сергей Сонин.

Татьяна Маторкина