Мокшэрзянь поэзиясо ламо иень перть, сиземань апак сода, сёрмадсь Мордовия Республикань заслуженной поэтэсь Павел Кириллович Любаев. Важодсь сон алкуксонь вечкема марто, шкинемань тевенть лангс домкасто ванозь, ловиль сонзэ эсензэ сехте покш тевекс тиринь раськензэ туртов.
Павел Кирилловичень поэзиясо эрьва строчкась ютавтозь седеензэ пачк. Вана кода сон сёрмадсь:
Палт, седей!
Иля сода сизема,
Палт чинь-чоп тон а мадиця толокс…
Неть валтнэнь коряс пингензэ перть эряськак эрзянь сёрмадеесь: лембензэ ломаннень максозь, тиринь масторонть ды пертьпельксэнь вечкезь, видечинть кисэ аштезь.
Поэтэсь сти икеленек аволь ансяк ёроков сёрмадыцякс, эрямонь превейчиде пешксе ломанекскак: ламо неезь, печтязь, ютавтозь седеенть пачк, секс ули тензэ мезе ёвтамс ломантненень.
Мордовиянь заслуженной поэтэсь Павел Кириллович Любаев чачсь 1919 иень декабрянь 24-це чистэ Нижегородской областень Покш Болдинань райононь Пикшня велесэ. Болдинась сравтовсь поэтэнть велензэ эйстэ колмо вайгельбень тарка. Покш кенярксонзо поэтэсь ёвтызе «Болдина» автобиографической стихотворениясонзо:
Кенярды седеем
Ды касы мелем:
Болдина маласо
Чачома велем.
П. К. Любаевень эрямосонть стака тешкс кадсь Ине Отечественной войнась. Кода мокшэрзянь ламо лия писательтне, сон тусь фронтов 1941 иестэ ды ульнесь тосо войнанть прядовомазонзо. Неть войнасо пултазь китнень ланга ютазь, Любаевень марто свал ульнесь А. С. Пушкинэнь аволь покш книгинезэ. Бойтнень ютксо сэтьме шкастонть сон ловнось ине поэтэнть произведениянзо. Кунсолость ялганзо – солдаттнэ.
Павел Кириллович эрямонь апак жаля тюрсь азарсь ятонть каршо. Сонензэ савсь улемс Сталинградонть кис тюрематнесэяк. Вана мезе Любаевень ёвтнемадонзо мейле сёрмадсь эрзянь сёрмадеесь А. М. Доронин: «Ошонтень сестэ понгат ансяк Саратов–Астрахань чугункань кияванть. Мейле тосто ялго ютамаль Рав чирень рудазов китнева. Джаныбек станциясо валдо ковов вестэ Любаев-мезень эшелоност лангс каявсть ятонь самолётт... Бомбасть апак жаля. Верь, кувсемат, пильгевтеметь-кедтеметь. Ранявозтнень велявтызь-ускизь Саратовав, живстэ кадовозтне сыргасть икелев. Капустин Яр ошонть маласо ялго молицятнень таго бомбизь... Сталинградось тол потсоль. Равонть тона чирев часттне уйсть баржасо. Лавшо катерэсь усксь эйсэст тыжнэзь-кижнэзь, мерят, аволь ломантькак усксь – масторонь весе стакачитнень. Берёков эзь кенере пачкодеме – таго бомбань сезневемат. Вейкесь прась баржанть лангс, кавтов лазызе. Солдаттнэ тусть потмакстомо ведентень. Эсенек лётчиктне кармасть идема кирьксэнь ёртнеме. Вейкентень Павел Кириллович кундась кавто кедьсэ ды ушодсь сонзэ берёков панеме. Ведесь кельмеде кельмель, толкунтнэ пандонь сэрьсэльть, ды тандавтозь ломанесь тоначистэяк оргодеви. Истя лиссь П. К. Любаев мартояк». Сонензэ зярдояк а стувтовиця шканть ёвтызе валморосо:
А стувтса, кода толсо гувнось модась,
Зярдо войнань китнень ланга ютынь.
Зяро майсинь –
Теде ансяк монсь содан,
Изнямонть кис а жалязь вий путынь.
Ламо чувсь мода монь солдатонь коймесь,
Понгонинь толс ды вайсинь ине лейс.
Солдатонь виесь ды поэтэнь оймесь
Ламо шкань ютазь умок валовсть вейс.
(А стувтса, кода толсо гувнось модась…)
«Мирэнь кис» поэтэнть сборникентень, кона лиссь 1950-це иестэ, совасть рузонь кельстэ ютавтозь зярыя поэттнэнь морост. Те – С. Алымовонь «Россия», «Тундонь садсо ламо мазый цецят», М. Исаковскоень «Вай, тумантнэ, монь шержей тумантнэ», «Катюша», «Балканской тештнень ало», А. Сурковонь «Конармейскоесь» ды украинской народной морось «Перьгавтынка, алят, лишменк». Теде башка, П. К. Любаевень сборниксэнть ламо эсензэ, седейс токиця стихензэ. Истя, «Мон нейгак солдатан» стихотворениясонзо поэтэсь толкови:
Нейгак солдатонь кондямо обуцям:
А вешнян таркат шождынеть ды
тевть.
Мон сынь, штобу теть путомс
вием-моцем
Ды теемс сехте вадря, стака тевть.
Павел Кириллович войнань стака иетнеде ёвтни эсь героической балладатнесэ. Истя, «Кепедезь теште» балладасонзо сон ёвтни войнань вейке фактто: минек полонс кундазь комбатонть Илья Потаповонь пилоткастонзо фашистэсь сезизе якстере тештенть, ёртызе пильгалов рудазонтень ды кармась шешкемензэ. Илья пурнынзе весе виензэ ды кепедизе тештиненть.
Ялгатнень седейс лембе теевсь,
Истя эрси покш бедань кардазь.
Те тештесь Модань шарокс неявсь,
Кона прок, мерят, толсто таргазь.
«Лисьмапря» балладасонть ёвтневи, кода авторось лелянзо марто моли сеть таркатнева, косо минек воинтнэ тюрсть ятонть каршо. Лелясь те шкас помнясынзе стака шкатнень ды апак капша ёвтни сындест. Сынь лисьмапря потмакссто мусть кружка. Лангсонзо ульнесь сёрмадозь «Вирясов». Те ульнесь авторонть лелянзо маштовозь ялганть кружкась. Ушодови героико-драматической ёвтнема Вирясовонь апелемадонзо:
Вирясов – эрзянь ульнесь алясь,
Сура леенть маласо эрясь.
Воёвась эсь прянь апак жаля,
Сон ламо душмант бойсэ керясь.
Павел Кириллович Любаевень лиссть ламо валморонь пусмонзо: «Ялгань вал» (1958), «Пичень гайть» (1967), «Валдо ведьбайге» (1971), «Толбандянь сяткт» (1979), «Кемема» (1990); рузонь кельсэ – «Голос сердца» (1961), «Сквозь свинцовые вихри» (1974), «Красота человека» (1977, коллективной), «Зерна радости» (1984), «Песни с берегов Суры и Мокши» (1988, коллективной) ды лият.
Пек домка смусть канды «Шинель» стихотворениясь. Те алкуксонь моро солдатонь сехте питней оршамонтень, седейшкавань ялгантень, кона ванстсь сонзэ кельмеденть ды вармадонть, ульнесь прялксокс ды алксокс, конань лангсо пулянь варятне кортасть солдатонтень, зяроксть куломась ютакшнось седеенть малава. Шинеленть лангс ванозь, поэтэсь нейгак марясы войнань качамов лексеманть, кода икелензэ несынзе фронтонь оянзо – чавозтнень ды живстэ кадовозтнень. Шинелентень пси валонь ёвтамсто, поэтэсь, мерят, одов арсемасонзо ютасы войнань кинть:
Поводезь тулос фронтовой шинель.
Кода и свал, сон серой, ансяк варяв,
Конатнень пельнизь пулят ды
кшни пелькст.
Сонзэ неса ды лембе ёжо марян.
П. К. Любаевень военно-патриотической лириказо пешкеди ризнэмань вийде сестэяк, зярдо сон снартни невтемс авань чачонть. Авась весемеде пштистэ ды домкасто маризе войнань зыянонть. Сон ильтинзе фронтов мирдензэ ды цёранзо, весе мелензэ-превензэ ульнесть сюлмавозь сынст марто, вечкемань ды ризнэмань ёжотне лездасть тензэ цидярдомс стакачитнесэ. Малавиксэнзэ чавовомадост кулятне сялгильть седейс, шержейгавтыльть а шкасто прячерть, саильть шумбрачинть. Ламо иес ёматотсь икелест чивалдось, ризнэмась нучк мендясь аванть. Маштовозь мирдтне ды цёратне сулеекс эрясть аванть чаво кудосо. Зярс аволь пота войнадо мейлень шкась, авась учось, сон яксесь вишка яннэва ды покш ки ланга, ваныль се ёнксонть пелев, ков умок ильтинзе малавиксэнзэ, стакасто таргилизе оймензэ ды мурдыль таго мекев.
Кодамо бу сёрмадеенть пусмонзо аволинек сае, сеске каявить сельмс стихотворениятне, конат алтазь войнантень ды раськень изнямонь подвигентень. Вечкевикс ловныцят, весе неть, Павел Кириллович Любаевень седейстэ молиця валморотнень мусынк А. С. Пушкинэнь НБ-нь национальной ды краеведческой литературань нупальсэ.
Валентина БОЯРКИНА,
А. С. Пушкин лемсэ Национальной
библиотекань отделэнь прявт
библиотекарь.
Палт, седей!
Иля сода сизема,
Палт чинь-чоп тон а мадиця толокс…
Неть валтнэнь коряс пингензэ перть эряськак эрзянь сёрмадеесь: лембензэ ломаннень максозь, тиринь масторонть ды пертьпельксэнь вечкезь, видечинть кисэ аштезь.
Поэтэсь сти икеленек аволь ансяк ёроков сёрмадыцякс, эрямонь превейчиде пешксе ломанекскак: ламо неезь, печтязь, ютавтозь седеенть пачк, секс ули тензэ мезе ёвтамс ломантненень.
Мордовиянь заслуженной поэтэсь Павел Кириллович Любаев чачсь 1919 иень декабрянь 24-це чистэ Нижегородской областень Покш Болдинань райононь Пикшня велесэ. Болдинась сравтовсь поэтэнть велензэ эйстэ колмо вайгельбень тарка. Покш кенярксонзо поэтэсь ёвтызе «Болдина» автобиографической стихотворениясонзо:
Кенярды седеем
Ды касы мелем:
Болдина маласо
Чачома велем.
П. К. Любаевень эрямосонть стака тешкс кадсь Ине Отечественной войнась. Кода мокшэрзянь ламо лия писательтне, сон тусь фронтов 1941 иестэ ды ульнесь тосо войнанть прядовомазонзо. Неть войнасо пултазь китнень ланга ютазь, Любаевень марто свал ульнесь А. С. Пушкинэнь аволь покш книгинезэ. Бойтнень ютксо сэтьме шкастонть сон ловнось ине поэтэнть произведениянзо. Кунсолость ялганзо – солдаттнэ.
Павел Кириллович эрямонь апак жаля тюрсь азарсь ятонть каршо. Сонензэ савсь улемс Сталинградонть кис тюрематнесэяк. Вана мезе Любаевень ёвтнемадонзо мейле сёрмадсь эрзянь сёрмадеесь А. М. Доронин: «Ошонтень сестэ понгат ансяк Саратов–Астрахань чугункань кияванть. Мейле тосто ялго ютамаль Рав чирень рудазов китнева. Джаныбек станциясо валдо ковов вестэ Любаев-мезень эшелоност лангс каявсть ятонь самолётт... Бомбасть апак жаля. Верь, кувсемат, пильгевтеметь-кедтеметь. Ранявозтнень велявтызь-ускизь Саратовав, живстэ кадовозтне сыргасть икелев. Капустин Яр ошонть маласо ялго молицятнень таго бомбизь... Сталинградось тол потсоль. Равонть тона чирев часттне уйсть баржасо. Лавшо катерэсь усксь эйсэст тыжнэзь-кижнэзь, мерят, аволь ломантькак усксь – масторонь весе стакачитнень. Берёков эзь кенере пачкодеме – таго бомбань сезневемат. Вейкесь прась баржанть лангс, кавтов лазызе. Солдаттнэ тусть потмакстомо ведентень. Эсенек лётчиктне кармасть идема кирьксэнь ёртнеме. Вейкентень Павел Кириллович кундась кавто кедьсэ ды ушодсь сонзэ берёков панеме. Ведесь кельмеде кельмель, толкунтнэ пандонь сэрьсэльть, ды тандавтозь ломанесь тоначистэяк оргодеви. Истя лиссь П. К. Любаев мартояк». Сонензэ зярдояк а стувтовиця шканть ёвтызе валморосо:
А стувтса, кода толсо гувнось модась,
Зярдо войнань китнень ланга ютынь.
Зяро майсинь –
Теде ансяк монсь содан,
Изнямонть кис а жалязь вий путынь.
Ламо чувсь мода монь солдатонь коймесь,
Понгонинь толс ды вайсинь ине лейс.
Солдатонь виесь ды поэтэнь оймесь
Ламо шкань ютазь умок валовсть вейс.
(А стувтса, кода толсо гувнось модась…)
«Мирэнь кис» поэтэнть сборникентень, кона лиссь 1950-це иестэ, совасть рузонь кельстэ ютавтозь зярыя поэттнэнь морост. Те – С. Алымовонь «Россия», «Тундонь садсо ламо мазый цецят», М. Исаковскоень «Вай, тумантнэ, монь шержей тумантнэ», «Катюша», «Балканской тештнень ало», А. Сурковонь «Конармейскоесь» ды украинской народной морось «Перьгавтынка, алят, лишменк». Теде башка, П. К. Любаевень сборниксэнть ламо эсензэ, седейс токиця стихензэ. Истя, «Мон нейгак солдатан» стихотворениясонзо поэтэсь толкови:
Нейгак солдатонь кондямо обуцям:
А вешнян таркат шождынеть ды
тевть.
Мон сынь, штобу теть путомс
вием-моцем
Ды теемс сехте вадря, стака тевть.
Павел Кириллович войнань стака иетнеде ёвтни эсь героической балладатнесэ. Истя, «Кепедезь теште» балладасонзо сон ёвтни войнань вейке фактто: минек полонс кундазь комбатонть Илья Потаповонь пилоткастонзо фашистэсь сезизе якстере тештенть, ёртызе пильгалов рудазонтень ды кармась шешкемензэ. Илья пурнынзе весе виензэ ды кепедизе тештиненть.
Ялгатнень седейс лембе теевсь,
Истя эрси покш бедань кардазь.
Те тештесь Модань шарокс неявсь,
Кона прок, мерят, толсто таргазь.
«Лисьмапря» балладасонть ёвтневи, кода авторось лелянзо марто моли сеть таркатнева, косо минек воинтнэ тюрсть ятонть каршо. Лелясь те шкас помнясынзе стака шкатнень ды апак капша ёвтни сындест. Сынь лисьмапря потмакссто мусть кружка. Лангсонзо ульнесь сёрмадозь «Вирясов». Те ульнесь авторонть лелянзо маштовозь ялганть кружкась. Ушодови героико-драматической ёвтнема Вирясовонь апелемадонзо:
Вирясов – эрзянь ульнесь алясь,
Сура леенть маласо эрясь.
Воёвась эсь прянь апак жаля,
Сон ламо душмант бойсэ керясь.
Павел Кириллович Любаевень лиссть ламо валморонь пусмонзо: «Ялгань вал» (1958), «Пичень гайть» (1967), «Валдо ведьбайге» (1971), «Толбандянь сяткт» (1979), «Кемема» (1990); рузонь кельсэ – «Голос сердца» (1961), «Сквозь свинцовые вихри» (1974), «Красота человека» (1977, коллективной), «Зерна радости» (1984), «Песни с берегов Суры и Мокши» (1988, коллективной) ды лият.
Пек домка смусть канды «Шинель» стихотворениясь. Те алкуксонь моро солдатонь сехте питней оршамонтень, седейшкавань ялгантень, кона ванстсь сонзэ кельмеденть ды вармадонть, ульнесь прялксокс ды алксокс, конань лангсо пулянь варятне кортасть солдатонтень, зяроксть куломась ютакшнось седеенть малава. Шинеленть лангс ванозь, поэтэсь нейгак марясы войнань качамов лексеманть, кода икелензэ несынзе фронтонь оянзо – чавозтнень ды живстэ кадовозтнень. Шинелентень пси валонь ёвтамсто, поэтэсь, мерят, одов арсемасонзо ютасы войнань кинть:
Поводезь тулос фронтовой шинель.
Кода и свал, сон серой, ансяк варяв,
Конатнень пельнизь пулят ды
кшни пелькст.
Сонзэ неса ды лембе ёжо марян.
П. К. Любаевень военно-патриотической лириказо пешкеди ризнэмань вийде сестэяк, зярдо сон снартни невтемс авань чачонть. Авась весемеде пштистэ ды домкасто маризе войнань зыянонть. Сон ильтинзе фронтов мирдензэ ды цёранзо, весе мелензэ-превензэ ульнесть сюлмавозь сынст марто, вечкемань ды ризнэмань ёжотне лездасть тензэ цидярдомс стакачитнесэ. Малавиксэнзэ чавовомадост кулятне сялгильть седейс, шержейгавтыльть а шкасто прячерть, саильть шумбрачинть. Ламо иес ёматотсь икелест чивалдось, ризнэмась нучк мендясь аванть. Маштовозь мирдтне ды цёратне сулеекс эрясть аванть чаво кудосо. Зярс аволь пота войнадо мейлень шкась, авась учось, сон яксесь вишка яннэва ды покш ки ланга, ваныль се ёнксонть пелев, ков умок ильтинзе малавиксэнзэ, стакасто таргилизе оймензэ ды мурдыль таго мекев.
Кодамо бу сёрмадеенть пусмонзо аволинек сае, сеске каявить сельмс стихотворениятне, конат алтазь войнантень ды раськень изнямонь подвигентень. Вечкевикс ловныцят, весе неть, Павел Кириллович Любаевень седейстэ молиця валморотнень мусынк А. С. Пушкинэнь НБ-нь национальной ды краеведческой литературань нупальсэ.
Валентина БОЯРКИНА,
А. С. Пушкин лемсэ Национальной
библиотекань отделэнь прявт
библиотекарь.