МР-нь Пресс-центрасо ютась «Книга памяти Кочкуровского муниципального района» книгань презентациясь. Сон алтави Ине Отечественной войнасо Изнямонь 78 иетненень. Тесэ пурназь материалт сетнеде, кить тукшность ятонть каршо тюреме минек масторонть кисэ, сетнеде, кить чавовсть ды кить велявтсть кудов ды тейсть трудонь подвигест. Книгасонть ёвтневи Кочкурбуень велетнесэ чачозь малав 6500 ломантнеде, конат тюрсть фашизманть каршо.
Книгань авторось ды редакторось – Николай Фёдорович Сульдяйкин. 2017 иестэ сон нолдась книга Якстере Зорька велень эрицятнеде, кить ульнесть войнасо. Кавто иень ютазь Кочкурбуень администрациясо пшкадсть тензэ энялдома марто: пурнамс книга райононь весе фронтовиктнеде.
– Эрямом перть свал талнозь ды мелень ванозь арсинь ветерантнэде. Кить минь ультяно, бути стувтсынек лемест? Истя, ютавтынек книганть анокстамонзо коряс промкс, пурнавсть волонтёронь кавксо группат, весемезэ 75 ломанть. Минь вастовинек ды кортынек, кода карматано важодеме. Невтинек, кода эряви вешнемс фронтовиктнень лемест «Мемориал», «Память народа», «Подвиг народа» сайттнэстэ. Самай тосто муинек ламо информация тюрематнеде, наградатнеде, подвигтнеде. Материалонть пурнынек РФ-нь Миноборонань, РФ-нь Государственной, Россиянь зярыя ошонь архивтнестэ. Омбо масторсо чавовозтнень коряс ды кить понгонесть концлагерьс, сюлмавкшнынек вешнемань международной службанть марто (Германия). Мон кодаяк а чарькодьсынь сеть ломантнень, конат а содыть малавикстэст, а бажить содамс фронтовиктнень лемест. Те пек ацирьгавты. Книганть пурнамсто вастневинек велень сыре эрицятнень мартояк, конат ёвтнесть ветерантнэнь войнадо икелень ды войнадо мейлень эрямодост. Ней уш неть ломантне тусть юткстонок, – кортась Николай Сульдяйкин.
Авторось ванкшнось малав 20 тёжат документт, справкат, куломань конёвт, сёрмат, фотографият ды лия пачтямот. Эрьва биографиясь ютась кедьганзо. Те – 6,5 тёжат. Книгасонть ули материал Кочкурбуень кемгавксово велень поселениятнень коряс. Лиякс меремс, те – башка велетнень ледстямонь книгат.
Стакасто мольсь книгань нолдамс ярмаконь пурнамось. Паро, лездасть спонсортнэ Михаил Куслин, Василий Кияев, Иван Вельмискин, Рафаэль Манюров. Васня пурназель ярмаконь ансяк колмоце пельксэсь. Седе тов авторось вастневсь «Норов» агрофирмань генеральной директоронть Д. А. Поздняков марто (ней – МР-нь Правительствань Председатель) ды агрофирмань панжицянть А.И. Поздняков марто. Самай неть ломантне пек лездасть нолдамс «Книга памяти Кочкуровского муниципального района» книганть.
– Сюкпрянь валт ёвтавлинь издателентень К. И. Шапкариннэнь. Сон весе седейстэ явсь мель книгантень – важодсь лангсонзо кода редактор, дизайнер ды соавтор, – пачтясь Н. Ф. Сульдяйкин.
Вастовомантень сакшность МР-нь Прявтонь Администрациянь ды МР-нь Правительствань Внутренней политикань управлениянь прявтось – Администрациянь Руководителень полавтыцясь А.В. Ратников, историянь наукань кандидатось, Н. П. Огарёв лемсэ МГУ-нь тонавтыцясь Е. П. Лезина (сон вешнесь Булгаковань велень поселениянь геройтнень лемест).
– Савсь ловномс эрямонь ламо историят, весе сынь пек дивавтыть. Ёвтнян кавтотнеде. Дмитрий Ефимович Абросимов войнань ушодкссто ульнесь сержантокс, казевсь Сталинградонь оборонанть кисэ медальсэ. 1944 иестэ олякстомтсь Украинанть ды колмо ковонь перть тюремстэ сон казевсь ниле орденсэ: Якстере Тештень, Александр Невскиень, Якстере Знамянь ды Отечественной войнань. Те кодат подвигть савсь тензэ теемс! 1944 иенть прядовомсто Львов вакссо сон стакасто ранявсь ды госпитальсэ кулось.
Эштё вейке историясь. Василий Максимович Кудаев рядовоесь пачтнесь передовойс снарядт. Весть вастсь немецень отряд. Ловнотано эйстэнзэ награднойстэ: «Чавсь колмо ломанть ды сайсь полонс вете немецть». Кода вана те лиссь? А арсевияк. Ды истят историятнеде ламо. Пшкадевлинь лия районтнэнень, кадык сыньгак пурнасызь фронтовиктнеде материалтнэнь, – кортась Е. П. Лезина.
Нама, аволь весе лемтне муевсть. Кочкуровань районсто войнав тукшность 9 тёжат ломанть, кой-кить фронтсто самодо мейле эрясть лия ёнкссо, калмазь лия регионга. Архивтнесэ документтнэнь коряскак улить ламо ильведькст (ломантнень, велетнень лемест коряс). Тень лангс апак вано, теезь покштояк покш тев. Книгась максови Кочкурбуень ды Саранскоень школатнева ды библиотекатнева.
Татьяна Маторкина