«Защитники Отечества» фондонь Мордовиянь филиалось Од иеде икеле ютавтсь «Сёрмадт солдатонтень сёрма» патриотической акция. Сонензэ явсть мель республикань весе школатне.
Рузаевкань 10 № школань 4-це классонь тонавтницясь Ксения Суркова сёрмадсь сёрма спецоперациянь а содавикс боецэнтень. Конвертэсь кучозель фронтов ды понгсь рядовоенть Сергей Храмовонь кедьс.
«Сёрмась пек токизе оймем, – кортась сон. – А содавикс тейтернесь сёрмадсь, келя, сон ашти кувалман каштанчисэ, арсесь вийть, шумбрачи, цидярдома ды куроксто велявтомс кудов».
Отпусков самодо мейле Сергей бажась вастовомс сёрмань авторонть марто. Сон сась школав, косо тонавтни Ксения, Мужествань уроков. Казсь конфеткат ды фронтонь кружка. «Кувать арсинь, мезе теть каземс, Ксюша. Налкшкеть ды книгат тонеть рамить тетят-ават. А вана военной алкуксонь кружка, конась ульнесь фронтсо, казян ансяк мон», – кортась Сергей Храмов.
Спецоперациянь ветеранось ёвтнесь эйкакштненень эседензэ, СВО-до икеле важодсь школасо тонавтыцякс. Сон эзь кадово кудосо аштеме, сёрмадстсь военной контракт. Цёрась пачтясь школань тонавтницятненень войнань читнеде, боевой ёжодонть, алкуксонь ялгаксчиде ды стакачитнеде, конат эрсить передовойсэ.
Эйкакштнеяк анокстасть казнеть: някат, тикшень чай марто кескавнеть, артовкст ды паронь арсема марто сёрмат. Сергей весементь пачтясы СВО-нь таркатнес.