Неть читнестэ МР-нь Пресс-центрасо ютавтовсь промкс, конась алтавсь Крештениянтень анокстамонь кевкстематненень.
Вастовомасонть ульнесть МР-ва РФ-нь МЧС-нь Главной управлениянь прявтось внутренней службань генерал-майорось Сергей Репин, ведомствань антикризисной управлениянь прявтонь полавтыцясь внутренней службань полковникесь Александр Шепелёв, ГИМС-нь прявтось Александр Трегулов, общественной сэтьмечинь ванстомань коряс полициянь прявтонь полавтыцясь Владислав Пинаев, Саранск ошонь Коммунальной хозяйствань ды благоустройствань дирекциянь прявтось Игорь Маслов, МР-нь Минздравонь куроксто лезксэнь максомань коряс прявт аволь штатной специалистэсь, «Станция скорой медицинской помощи» МР-нь ГБУЗ-нь медицинань ёнксонь коряс прявт врачонь полавтыцясь Константин Свешников.
Кода тешкстась Сергей Репин, тедеде Крештениясто кармить важодеме экшелямонь 66 таркат, 16 эйстэст арсевить эрькетнень лангсо.
– Бути саемс ютазь иенть, Крештениясто экшелясть 5 тёжадо ламо ломанть, теке марто тень туртов анокстазь таркатнесэ пуромкшность эштё 8,5 тёжат. Те иестэ истя жо учовить 5,5 тёжат экшелицят ды эштё 9 тёжат экшелицятнень малавиксэст ды ялгаст, – тешкстась МР-ва РФ-нь Главной управлениянь прявтось Сергей Репин. – Секскак, а эряви стувтнемс ведь лангсо ды общественной таркасо прянь ветямонь ёнкстнэнь. Ды пшкадян весенень, бути Крештениясто ули меленк экшелямс, тееде весементь тень туртов анокстазь таркатнесэ.
Крештениянь мероприятиятнесэ покш важодема ветить МЧС-нь сотрудниктне, конатне кирдить экшелямо таркатнесэ зыянтомочинть, полициянь важодицятне ваныть общественной сэтьмечинть мельга, медицинань службатне – экшелицятнень шумбрачинть мельга. Ды весе службатне важодить вейке-вейкенень лездазь.
Кода пачтясь Саранск ошонь Коммунальной хозяйствань ды благоустройствань дирекциянь прявтось Игорь Маслов, Саранскойсэ кармить важодеме экшелямонь сисем таркат. Неть «Старт» стадиононь, «Лесное озеро», «Зелёная роща», «Огни Саранска» эрькетне, истя жо Макаровкасо, Полянкисэ ды Куликовкасо анксематне.
Кода Саранск ошсо, истя республикань районтнэсэяк экшелямонть туртов анокстазь таркатнесэ кармить важодеме пси чаень явшема ды эжнема таркат.
Весе экшелицятненень мельсэ кирдема вейкенть – ведь лангсо ды общественной таркатнесэ прянь ветямонь правилатнень.
Юлия Еремина