Саранск ошсо кавто эрицятне ёмавтсть малав 75 тёжат целковойть Интернетсэ айфононь ды стамо машинкань рамамсто.
Саранск ошка Россиянь УМВД-сь панжсь уголовной тевть манчемань коряс. Ошонь эрицятне понгсть зыянс Интернетэнть вельде товартнэнь рамамсто.
Истя, Саранск ошка Россиянь УМВД-нь 1-це № ОП-в пшкадсь 46 иесэ цёрась, конась пачтясь сонзэ кедьстэ 49500 целковойтнень манямодо. Зыянс понгозенть валонзо коряс, «Вконтакте» социальной сетьсэнть сонензэ понгсь айфононь миемадо яволявтома. Микшницянть марто сёрматнень вельде кортамонть ветямсто весемесь решазель. Асодавиксэсь цёрантень кучсь ссылка, конань вельде пандомат ярмактнень. Ссылкантень ютазь, яволявтыцясь зярыя пандомасо кучсь малав 50 тёжат целковойть. Теде мейле микшницясь лоткась сёрмадомо пачтямотнень каршо.
Эштё вейке истямо тевень коряс полицияв пшкадсь Саранск ошонь 32 иесэ эрицясь. Тесэ манямонь тевесь лиссь 24 тёжат целковойс.
Те цёранть валонзо коряс, яволявтоматнень сайтсонть сонензэ понгсь пачтямо стамо машинкань миемадо. Асодавиксэнть марто кортамодо мейле, конась максынзе пандомань туртов реквизиттнэнь, рамицясь кучинзе товаронть кис ярмактнень, манчицясь жо теде мейле ёмась.
Мордовия Республикава МВД-сь тагояк ледсти интернет-микшнемань зыянтомочинь ёнкстнэнь:
-зярдояк илядо ёвта лиянень эсь банконь картань даннойтнень ды икелепелев илядо пандо ярмакт яволявтомань коряс муезь товаронть кисэ;
-илядо юта кучозь ссылкатнес, куш тыненк кортыть, што те ярмаконь пандомань туртов ёнкс;
-товартнэнь рамадо ансяк официальной сайттнэстэ;
-микшницянть марто весементь кортынк сайтонь мессенджерсэнть, аволь телефононь эли лия сайтонть вельде.