Тиринь масторонь Героень чинтень республикасонок ютасть аволь аламо мельстуиця вастовомат. Школань тонавтницятнень, поисковиктнень, юнармеецтнэнь марто вастневсть СВО-нь участниктне, боевой действиянь ветерантнэ. Ютасть «Геройтнень марто кортнемат». Сынст анокстынзе МР-нь Од ломанень тевтнень коряс госкомитетэсь.
Истя, И. Д. Воронин лемсэ краеведениянь музейсэ паро вастовома мольсь МР-ва РФ-нь национальной гвардиянь войскатнень вневедомственной охранань отделэнь полициянь батальононь ротань командирэнь полавтыцянть Сергей Максатов марто. Старшей лейтенантось кото иеть важоди те структурасонть. Сон домкасто ёвтнесь седе, кода роботы вневедомственной охранась. Сергей Сергеевич чачсь Покш Березниксэ. Школадо мейле тонавтнесь Н. П. Огарёв лемсэ МГУ-нь экономической факультетсэ. Седе тов колмо иес сёрмалесь контракт погранвойскайтнень марто. Служась Крымень границясо. Контрактонть прядовомадо мейле велявтсь Мордовияв, поладынзе тевензэ Нацгвардиянь войскатнесэ. Васня ульнесь полициясо водителекс, седе тов ладязель взводонь командирэкс ды ней – ротань командирэнь полавтыця.
– Эрьва чи ошсонок службаст кандыть зыянов тевень теицятнень кундамонь вейксэ группат. Вантано правопорядканть мельга, илязт лисне зыянов ды берянь тевть. Минек вановтонок ало школатне, эйдень кужотне, судтнэ, прокуратурась, стратегической объекттнэ. Эрьва косо ладязь тревожной кнопкат, охранно-пожарной сигнализацият. Сигналонь самодо мейле сеске ардтано тов, ванкшнотано, мезе теевсь, мекс лепштязель кнопкась. Ды мезе ансяк а эрси. Школатнес ды кужотнес совсить иредезь ломантькак. Договоронь коряс вневедомственной охранась вансты частной объекттнэнь. Аволь весть лиснесть истят тевтькак: кудонтень совасть салыцят. Минек важодицятне сеске тов ардсть. Преступниктне тенст панжизь кенкшенть, лемдизь пряст азорокс, натой оршасть лангозост кудазортнэнь оршамот. Ансяк минек а манясамизь, ютксонок улить покш опыт марто ломанть, – ёвтнесь Сергей Максатов.
39 № школань 8-це классонь тонавтницятнень марто вастовомасонть С. С. Максатов невтизе, кодамо экипировкаст ули сынст важодицятнень. Нама, те – каска ды бронежилет. Бути ушосо лиссь кодамояк зыян, сынь сыргить тов парсте анокстазь. Лангсост оршазь бронежилет, мартост оружия, сельведень нолдыця газ, резинань палка, наручникть. Школасо тонавтницятне ванкшнызь экипировканть. Кить эзть визде, оршнизь бронежилетэнть.
Истя жо тесэ кортась Саранск ошонь Ветеранонь советэнь прявтось А. С. Яшкин.
«Геройтнень марто кортнемат» мольсть 1941–1945 иетнень войнань ды трудонь мемориальной музейсэяк. Паро инжекс тесэ ульнесть Войнань, трудонь, Вооружённой вийтнень ды правань ванстомань органтнэнь ветерантнэнь (пенсионертнэнь) весероссиянь общественной организациянь МР-нь общественной вейсэндявксонь прявтонь полавтыцясь А. И. Подкатов, СОБР отрядонь икелень командирэнь полавтыцясь, Мужествань кавто орденэнь кавалерэсь, подполковникесь А. В. Журавлёв, «Аркуда» особой назначениянь отрядонь офицерэсь Виталий Алексеевич, специальной военной операциянь участникесь А. В. Владимиров.
– Россиянь эрицятне, кодамо бу региононь ды раськень авольть уле, вечксызь тиринь масторост ды анокт тюреме сонзэ кисэ. Кодамо стака илязо уле, сынь молить ванстомо. Истя жо паро мельсэ пачтян: вечкеде спортонть, анокстадо прянк эрьва кодамо стака тевс. Кочкадо эстенк бороцямот, сокссо ардтнемат, бассейнасо укшномат... Спортось максы вийть. Лиятнень коряс тынь ультядо виевть ды кеметь. Тынь – Ине Изнямонь саицятнень правнукт, илядо теде стувтне. Мон свал ледстнян покштянь лемензэ, кона пачкодсь Берлинс. Сонзэ ялаксозо кармась Советской Союзонь Героекс. Минек раськесь – Героень раське. Арсян тенк улемс алкуксонь цёракс ды тейтерекс, – кортась офицерэсь Виталий Алексеевич.
СВО-нь участникесь Алексей Владимиров ёвтнесь, тосо, передовойсэ, парсте неяви кодамо ломанесь. Сон панжови тунь лия ёндо. Героекс теевить аволь сетне, кить тенень пек бажить (истяткак улить). Алексей служась миномётной батареясо 2022 иень августсто саезь 2023 иень февральс.
Меельцекс од ломантне макснесть инжетненень пшти ды вадря кевкстемат: «Кодамо превспутома ёвтатадо тенек?». «Мезе илязо лисе, свал уледе ломанекс. Лездадо сетненень, кить учить лезкс. Лездадо валсо, тевсэ, мелень явомасо».
Татьяна Маторкина