Масторлангсонть сехте содавикс симемапелесь – те чаесь. Нать, а стяко сонензэ алтави чи – декабрянь 15-це чись. Эдь телень якшамотнестэ те симемапелесь эждтянзат ды шумбралгавттанзаткак.
Дубёнкань авась, вишка классонь тонавтыцясь Нина Викторовна Аниськина чайденть содасы весементь. Тикшетнень те симемапеленть туртов аноксты сонсь. Умок а рамси лавкасто тюжа тюсонь «артовксонть», сонсь пурны вирьга, паксява эрявикс тикшетнень, аноксты-теи эйсэст ды иень перть вансты коське таркасо. Нама, тень туртов эрявить ламо содамочить –эрьва тикшенть содамат лемензэ, лезэв ды берянь ёнксонзо ды седе тов. Неть весе содамочитнень Нина Викторовна саи тикшетнеде энциклопедиятнестэ ды интернетэнь куротнестэ.
– Нина Викторовна, кода умок кармиде тынсь пурнамо чаекс тикшетнень ды косто сась те тевентень вечкемась?
– Эсень чайть мон анокстан кода уш кавксо иеть. А вана тикшетнень марто сюлмавозян весе эрямом перть. Авамгак тикшеть костнесь. Мейле монень вейке превей ломань мерекшнесь: «Лецямопельтне минек пильгенек алот, минь эйсэст чалгсетяно». Арсезевинь неть валтнэнь лангсо, эдь те алкукскак истя. Сестэ карминь седеяк домкасто тонавтнеме тикшетнень. Сайсынек неке цирей лопанть (подорожник), репс тикшенть (пастушья сумка), пейдельканть (ромашка), дуболгонть (таволга), шумбрачинь кис те питнейдеяк питней тикшеть.
– Ёвтнеде кой-кона тикшетнень лезэвчидест.
– Сайсынек вараканьпалонть (клеверэнть). Кияк эйсэнзэ а лови лезэв тикшекс. А эдь сонзэ юрсо седейде ламо лецямопельть теезь. Сон лезды вецакавтомс веренть. Ансяк те тикшеденть свал а мереви симемс. Бути эйстэдензэ секе-тев симемс, сон карми веренть вецакавтомо апак лотксе. Секскак вараканьбалонть мереви тевс нолдамс ансяк сэредема шкасто ды аволь ськамонзо. Васняяк чайникентень зярыя сурпрят каяма тикше чай (иван-чай), мейле – раужо шукшторовонь лопа ды ансяк нилешка вараканьпалонь прят. Меельцекс, истя меремс, катализаторонь таркас, эли лиякс, чайной специякс, каяма мята. Вана истя пурнави чаень пирамидась. Истямо чаесь сеске псилгавты ды шумбралгавты рунгонть.
А ней сайсынек пиципалаксонть. Весе содыть, сон тустомгавты веренть ды весе тень кувалт пелить эйстэдензэ симемс. А сон пек «превей» тикшесь, эдь пиципалаксось карми тустомгавтомо веренть семс, зярс те эряви организмантень. А бути сонзэ костямс ды ферментировамс, сестэ чайгак эйстэнзэ тееви. Тельня салатскак маштови каямс. Эдь К витаминэсь, конась эряви весенень, симема човор Д витаминэнть марто самай ней, потмура телень читнестэ. Пиципалаксось – лия ёнов а молиця тикше. Бути ваномс микроскопонь пачк, сонзэ пициця салмукскензэ молить ампула ёнов. Токамсто те «ампулась» «синдеви» ды эйстэнзэ пурги пициця веднесь. Истякак пиципалаксось – пек лезэв ды питней тикше, а эряви эйстэдензэ пелемс.
– Косто сайтядо неть содамочитнень?
– Зярдо-бути ушодокшнынь книгатнестэ, вечкинь ловномо «Знание – сила», «Юный натуралист» журналтнэнь. Мейле, кода карминь школасо важодеме, ульнесь истямо предмет – природоведения, сонзэ ветямс рамсилинек эрьва кодамо лем марто плакатт: лециця тикшеть, вирень тикшеть ды седе тов. А ней Интернетэнть марто седеяк шожда тонавтнемс ды муемс эсь тевень содыця ломанть. Эрсить натой тикшень фестивальть, ютавтнить эрьва кодат вебинарт аволь тикшень содыцятне, а сынсь учёнойтне. Истя, Интернетэнть вельде муинь тикшень содыця ламо ломанть Ульяновскойстэ, Чувашиясто, конатнень марто карминек кирдеме ялгаксчи.
– Нина Викторовна, инескеть, ёвтнеде, кода видестэ анокстамс тикшетнень теленень?
– Васняяк, сынст аламодо пужовтомат семс, зярс эрьва лопинесь а тееви нулынекс. Нама, костямат аволь чинть ало. Мезеяк лангс човинестэ ацамат ды вельтямат кодамояк чова нулынесэ эли ашо коцтонь нардамосо. Пужолгавтомась саи зярыя шка. Ниле-вете частнэ а сатыть. Тагояк ванома, кодамо температурась ушосонть ды козонь ацазель тикшесь – лембе верандасо эли экше кудыкеле. Пужовтомадо мейле тикшетнень мерькамат. Кадовикс летькесь эйстэст седе шождасто ливтеви кельмевтемадо мейле. Ансяк тесэ ломантнень мелест явовить кавтов – кинень вечкеви ды кинень а вечкеви кельмевтемась. Мон монсь теян эрьва кода. Кельмевтемадо мейле тикшенть эряви таргамс морозилкасто ды ичемс чапакс ладсо, штобу ливтемс кадовозь соконть. Монь ули истямо лазом, конань лангсо шождасто пурдави тикшесь. Мейле матрави кодамояк эмалированной кедьгес ды вельтяви летьке нардамосо. Ферментированиянь шкась тагояк ашти коштонь температуранть эйстэ – бути ушосонть пси, сестэ човорявксось чокшнес карми анок. Те шкань перть аволь весе ваныть мерьказь тикшенть потсо температуранть лангс. Сон улезэ 26–28 градусто а седе ламо. Бути кузи седе верев, чаекс тикшесь лиси аволь паро, сон карми паломо, преямо. Зярдо пачкодсь температурась 26 градусос, сеске лоткавтома ферментациянть ды сорновтнема ичевксэнть. Бути карми марявомо стака чапамо чине, сестэ кавтошка часос эряви ливтемс чинть алов. Теде мейле чаесь костяви рамазь сушилкасо. Ансяк монень вечкеви се чаесь, конась костяви коштсо – верандасо эли кудосо. Неть тикшетнестэ чаесь лиси сехте паро, тантейстэ качадыця. Меельцекс, костямонь кис, кирдеви духовкасо.
Мезе меревлинь, зяро иеть тейнян тикше чай, ды свал танстезэ лия. Саемга, сентябрясто пурназь иван-чаесь лиси допрок якстере, эдь лопанзо семс якстерьгадыть, истя меремс, сынсь ушодыть ферментациянть ютамо, монень жо кадови ансяк аламодо преявтомс ды костямс.
– Косто пурнатадо тикшетнень?
– Эсенек Дубёнкань районось – те тикшень цела клад! Монь мирдень роднянзо Кобалень, секскак сеедьстэ якатано тов. Сонензэяк пек вечкевить монь чайтне, лавкансетнеде ней уш а симни, а тантеекс марявить. А вана Сайнелень виресь – те питнейдеяк питней тарка. Тосо натой идем цяпортикше (чабрец дикий) касы. Мон пиресэяк сонзэ кастан, ансяк чинезэ аволь истямо виев, кода Сайнелень виренсенть. Мон сонзэ ансяк мелят муия. Ды, ловт, весе тикшетнень тосто кандтано. Вана ансяк калганонть муия Николаевкань вирьстэ.
Минськак лиясто а содатано, зяро сюпавчи тенек максы пертьпельксэсь! Ансяк сайть, тонавтнек ды ульть шумбра!
Марина Агафонова