Малав ие топодсь, кода Орданьбуень аватне ушодсть кодамо СВО-нь зонав кекшемань алтымат. Сынь пурнавкшныть райононь Культурань кудос, косо тенст явозель таркине. Кодамонть вети Редкодубье велень авась, кедьчелькев ломанесь Людмила Ерошкина.
– Мон васня ардтнинь Саранскоев, косо тенек ютавтсть алтымань кодамонь коряс мастер-класс. Тонавтымизь, ёвтнесть, кода ды мезе. Тосто самодо мейле аватнень марто карминек пурнавкшномо. Ушодынь кодамо Татьяна Уткинань марто. Цёратне тенек тейсть чувтонь решёткат, козонь понгавтовить алтыматне. Мон пшкадинь эрицятненень «ВКонтакте» ды «Одноклассники» социальной сеттнесэ. Тердинь лездамо. Райононь ветеранонь вейсэндявксонь прявтось М. Г. Апанина тердинзе ветерантнэнь. Истя, ней мартонок кодыть малав кемголмово ломанть. Неть: Н. В. Новикова, В. М. Дубинкина, А. А. Кудашкина, Л. В. Кириллова, В. П. Макеева, М. Г. Апанина, Р. Н. Кузьмина, Т. П. Новикова, А.И. Татаринова ды лиятне. Эрси, чизэнзэ кавто алтымат кодатано.
– Косто сайтядо материалтнэнь?
– Сынст рамсетяно Тюменень областьстэ. Керьсесынек, покшолмаст улезэ 2x3 метрат. Коцттнэнь-материалтнэнь кандыть тенек ломантне кудосто. Теленень, чарькодеви, эряви мезеяк ашо, секскак тевс нолдатано тюленть. Эйстэст керсетяно панкскеть ды уш мейле кодатано. Ламо коцт тенек усксть васоло велетнестэ – Ташто Орданьбуестэ, Орозбиестэ ды Кеченьбиестэ. Весе горобияст чамдызь. Покш сюкпря ёвтан тенст! Материалтнэнь рамамс ярмактнень пурнатано. Кие зяро максы. Минськак, пенсионертнэ, путтано ярмаконок.
– Кода пачтятадо алтыматнень СВО-нь зонав?
– Минек алтыматнень саить Саранскоев сетень кодамонь штабов, тосто уш кучить ков эряви. Минсь а кучтано, саить кедьстэнек. Аволь умок вана Орданьбуень вейке военноесь сакшнось тенек ды сайсь мартонзо. Сонзэ вельде уш зярыяксть кучнинек. Аволь умок максынек 26 алтымат. Тейнесть тенек заказ кизэнень, сёксенень. Ней вана таго 28 кучтано СВО-в. Цёратне пек вешить. Сёрмадыть тенек сюкпрянь валт.
– Орданьбуесэ косояк эштё кодыть? Улить лездыцянк?
– Улить ды те кецявты. Аволь умок кармасть кодамо Чукалонь аватне, уш анокстасть сисем сетть. Тургенева посёлкасо кодасть кавксо. Улить кодыцят Лесозаводсо, арсить ушодомс Низовкасо. Эдь сынь Орданьбуев а ардтневить. Весе пенсионерт. Алтыматнеде башка, кодатано понань носкат (450 парат уш кучинек), статано трусат, нардамот, пацинеть, пракстат. Минек покш меленек – сакшновольть тенек кодамо седе ламо ломанть. Вейсэнь вийсэ тееви ламось. Вейсэнь вийсэ саеви изнямоськак!
Татьяна Маторкина