Вторник, марта 19, 2024
Важное

Ютазь недлясто Мордовияв важодемань коряс сакшнось Россиянь Просвещениянь министрань васенце полавтыцясь Дмитрий Глушко.
Сон ваннызе «Тавла» тонавтнемань куншкакуронть. Седе тов – Ицяло ёнксонь Рождествено ды Оброчное велетнесэ кавто школатнень, косо инжентень невтизь школань столовойтнень ды теплицатнень. Саранскойсэ Дмитрий Глушко якась 24 № средней школав, истя жо Электромеханической колледжев ды «Мира» эйкакштнень ды од ломантнень ёрокчист редямонь ды кастомань куншкакуронтень.
Пандемиянть шкасто Саранскоень 17 № школась важоди башка лувсо. Совамсто аштить медицинасо важодицят, конат онкстнить эйкакштнень температураст. Башка графикенть коряс сынст полавтнить тонавтыцятне. Дмитрий Глушко ды Владимир Волков истя жо ютасть термометрия, кедень дезинфекция ды оршасть маскат – вешематнень топавтомат весенень.

– Ней школань эрьва классонть туртов башка расписания. Эйкакштне кунсолыцят, сыть ёвтазь шкантень. Те лезды а пурнамс школасонть ламо эйкакшт ды а нолдамс коронавирусонть, – толковизе инжетненень «Тавла» тонавтнемань куншкакуронь прявтось Светлана Лиманская.
Седе тов ютавтовсь экскурсия школань кабинеттнэва. РФ-нь Просвещениянь министрань васенце полавтыцясь кевкстнесь, кода моли класстнэсэ коштонь ванськавтомась, кие тень мельга ваны. Дмитрий Глушконень толковизь, школань кабинеттнэсэ путозь мобильной бактерицидной лампат.

Светлана Лиманская невтинзе инжетненень мастерскойтнень, косо эйкакштне эсест кедьсэ стыть ды кодыть, теить чувтосто ды кшнистэ теевкст. Ваннызь биологиянь кабинетэнть. Дмитрий Глушконень невтизь спортивной залонть, бассейнанть, актовой залонть – истямо оснащения школатнесэ чуросто неят. Спортивной секциятне пек вечкевить тонавтницятнень туртов, сценась чаво а эрси.
Инжетне совасть школань столовойс. Сон покш, валдо ды ванькс. Таркат сатыть весенень, ванстови социальной дистанциясь. Ярсамс макссть рис марто котлета, ой марто бутерброд ды лимон марто чай. Эйкакштне ярсасть мельспаросо.

– Менюсь кемекстазь МР-нь Роспотребнадзоронть марто. Тетятненень-аватненень мереви варштамс школань сайтстэ, мезде ярсыть сынст эйкакшост. Вишка классонь весе тонавтницятне ды 80 % покш классонь тонавтницятне андовить пси ярсамопельде, – толковизе Светлана Лиманская.
Эйкакштненень мереви ярсамс аволь ансяк столовойсэ. Курок тесэ карми важодеме школань буфет.
Дмитрий Глушко ёвтнесь школасо ярсамопелень коряс тетятнень-аватнень марто сюлмавомань од сервистэнть, конась неть читнестэ нолдави Госуслугань порталсонть.
РФ-нь Просвещениянь министрань васенце полавтыцясь Дмитрий Глушко ванызе Мордовиянь товартнэнь выставканть.
Теке жо чистэнть покш инжесь республикань Прявтонть Владимир Волков, МР-нь Правительствань Председателень полавтыцянть Галина Лотванова, МР-нь Образованиянь министранть Галина Явкина марто якась Ицяло ёнксонь Рождествено ды Оброчное велень школатнес, тосо невтизь школань столовойтнень ды теплицатнень.
Рождествено велень школась – Ицяло ёнкссо сехте таштотнестэ вейкесь. Тесэ тонавтнить 218 эйкакшт, 52-тнень школань автобуссо усксить шабра велетнестэ.

Инжетне ваннызь 80 таркас школань столовоенть, сон витнезь «Здоровое питание» программанть коряс. Нупалесь покш ды валдо.
Школань прявтось Сергей Учеваткин ёвтнесь, весе тонавтницятне андовить пси ярсамопельде. Сывеленть рамсить «Оброченский» сывелень комбинатсто, ловсонть – «Ичалковский» сырань теемань комбинатсто, эмежтнень – 80 % эсест пирестэ. Школанть ули пельгектаронь покшолмасо пирезэ, косо путозь кавто теплицат.
Дмитрий Глушконень невтизь тонавтнемань класстнэнь. Тедеде школасонть карми важодеме «Точка роста» цифровой ды гуманитарной профилень тонавтнемань куншкакуро. Школасо важодицятнень марто кортамсто РФ-нь Просвещениянь министрань васенце полавтыцясь кевкстнесь, кода школасонть ладязель дистанционной тонавтомась, ульнесь-арасель эйкакштнень Интернетэст. Школань прявтось Сергей Учеваткин тешкстызе, весе эйкакштнень ульнесь Интернетэст. Сеть семиятнесэ, косо арасельть компьютерт, максокшнызь школань ноутбуктнень.

Оброчнойсэ инжетне ванызь школань садпиренть ды колмо теплицатнень, кавтотне эйсэст уштовить. Теплицатнесэ кенерить помидорт, перецть, сонсь школась ваясь цеця потс. «Те – Россиясо сехте цецяв школа!» – мерсь Дмитрий Глушко.
РФ-нь Просвещениянь министрань васенце полавтыцясь теевсь содавиксэкс «Точка роста» куншкакуронть марто, конась панжозь Оброчноень школасо. Сон теезь «Образование» нацпроектэнь «Современная школа» федеральной программанть лувсо.
Кода ёвтнесь школань прявтось Вера Шарова, Оброчноень школасонть тонавтнить 188 эйкакшт, 25-тнень школань автобуссо усксить маласо сисем велетнестэ.

Теде мейле инжетне валгсть школань столовойс – валдо, вадря столь-озамо марто. Оброчноень школасонть, кода республикань весе школатнесэ, питневтеме пси ярсамопельде андовить 1-4-це класстнэсэ тонавтницятне, истя жо лавшосто эриця семиясто эйкакштне. Ярсамопелень пидемстэ тевс нолдавить тосконь производительтнень продуктатне, эмежтне – школань пирестэ. Столовойсэ эйкакштне ярсасть ямдо, модамарь марто котлетадо, салатто ды йогуртто. Дмитрий Глушко ды Владимир Волков эйкакштнень марто вейсэ варчизь ярсамопельтнень. «Пек вадря ямось! Весемесь тантей», – мерсь Дмитрий Глушко. Мордовиянь Прявтось ды РФ-нь Просвещениянь министрань васенце полавтыцясь пандызь обедэст школань столовойсэ.

Дмитрий Глушко тешкстызе, Мордовиясо вадрясто топавтови школатнесэ эйкакштнень пси ярсамопельде андомань программась.
– Неян, те важодемась ушодовсь аволь таштамковонь васенце чистэ, а уш зярыя иеде икеле. Россиянь Президентэнть Владимир Путинэнь 1-4-це классо тонавтницятнень пси ярсамопельде питневтеме андоманть коряс кармавтоманть топавтомга важодемань прявт ёнксокс ашти комплексной программатнень кемекстамось, – мерсь Дмитрий Глушко. – Неть школатнень лангс ванозь, неяви, те ёнкссо важодемась ладязь пек вадрясто. Ярсамопелесь пидеви тесэнь велень хозяйствань продукциясто. Ярсамопеленть вадрячинзэ мельга ваныть тетятне-аватне, эряви кирдемс мартост сюлмо.

Дмитрий Глушко мерсь, сы шкастонть эряви топавтомс покш важодема тонавтнемань учреждениятнень инфраструктурань виевгавтоманть коряс: одкстомтомс пищеблоктнень, столовойтнень, сынь ладявольть Роспотребнадзоронь весе вешематненень. Сон истя жо тешкстызе, школань ярсамопелень пидицятненень эряви свалшкане кастомс квалификацияст.
– Прявтось, те ярсамопелесь улезэ вадря, продуктатне – свежат. Монень маряви, Мордовиясо тень коряс путозь кеме юр, ули мезес тонавтнемс федеральной министерствантень ды лия регионтнэнень, – тешкстызе Дмитрий Глушко.
Мордовиянь Прявтось Владимир Волков башка тешкстызе, образованиянь системанть икеле течи аштить покш тевть од ломантнень трямост-превс путомаст коряс.
– Те тевенть тешкстызе Россиянь Президентэсь Владимир Владимирович Путин. Прявтось – кастомс ды тонавтомс шумбра ломань. Вадря ярсамопелесь тенень лезды, – тешкстызе Владимир Волков.
Седе тов инжетне ваннызь Саранскоень тонавтнемань зярыя учреждениятнень.

Татьяна ИКОННИКОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».