Октябрянь 6-це чистэ Республикань Культурань кудось вастсь Мордовиянь весе буетнестэ сазь тонавтыцятнень. Эйстэдест эрьвась уш совамсто казезель панжаткесэ (открытка), фойесэ налксесть музыкантт ды панжозель выставка, конасонть невтезель икелень шкань школатнесэ лувось: ташто партат, тонавтома кедьёнкст ды лият мезть, конат кармасть улеме мельстуиця фотозонакс сыцятненень.
Сцена лангсо васняяк путозель «Эрявикс кортамот» музыкальной прологось – ёвтнезель ды невтезель тонавтыцядо притча, конань анокстызь ошонь школатнесэ тонавтницятне. Покш экранонть вельде невтезель «Сюкпря, тонавтыця!» фильмась, косо Мордовиянь содавикс ломантне ёвтасть лембе валт эсест тонавтыцядост. Теде мейле сядо ломаньстэ кадетэнь хорось морызе РФ-нь гимнанть. Раськень оршамосо эйкакштне пурназельть республикань эрьва районсто ды Саранскойстэ. Видеонть теизе МР-нь «Движение первых» вейсэндявксось.
Седе тов сценанть лангс поздоровонь ёвтамо лисекшнесь Мордовиянь Прявтось Артём Здунов. Сон тешкстызе весе ломантнень туртов тонавтыцянь тевенть эрявиксчинзэ, эдь эрьванть эйстэнек ульнесть тонавтыцянок… Истя жо пельдензэ ёвтазельть сюкпрянь валт республикань тонавтыцятнень туртов весероссиянь профессиональной конкурстнэсэ изнявкстнэнь кис ды явшезельть питней казнеть сехте ёроковтненень. Истя, РФ-нь Президентэнь Почётонь Грамотасо казезельть Саранскоень политехнической техникумонь преподавателесь Г. И. Денисова ды Зубова-Полянань райононь Жуковской средней школань прявтось В. А. Кисткин. «За заслуги перед Республикой Мордовия» медальсэ казевсь 1-це № Эйкакшонь музыкальной школань тонавтыцясь В.А. Стеньшин. «Народный учитель Республики Мордовия» почётонь лемесь максозель республикань Ёроков эйкакштнень лицеень прявтонь полавтыцянтень С. Н. Сабаевнень. Сергей Николаевичень прявтсо анокстазь физикань коряс школьниктнень ютксо весероссиянь олимпиадань меельце этапонь 18 изницят ды 82 призёрт. Сонзэ тонавтницянзо Россиянь Национальной пурназь командатнень составсо сайсть 11 сырнень ды 4 сиянь медальть.
«Заслуженный учитель Республики Мордовия» покш лемесь максозель кавксо тонавтыцятненень. Истя жо «Заслуженный работник образования Республики Мордовия» лемсэ тешкставсть кото тонавтыцят. Почётонь Грамотасо казезельть вете ломанть. «О денежном поощрении лучших учителей» премият явшезельть РФ-нь Президентэнть Указонзо коряс. Весероссиянь пелькстамотнесэ вете изницятненень максозельть 200 тёжат целковойть эрьвантень. Кемлянь аграрной ды Ковылкинань аграрно-строительной колледжтненень максозельть 2 миллионт целковоень покшолмасо МР-нь Прявтонь премият. МР-нь Прявтонть Указонзо коряс тонавтомань тевсэнть покш ёрокчинть ды образованиянтень покш путовксонть кис вейксэ тонавтыцятне казезельть Дипломсо ды 50 тёжат целковоень покшолмасо премиясо.
Седе тов пурнавозтненень лембе валт ёвтась МР-нь Государственной Собраниянь Председателесь Владимир Чибиркин ды мейле казинзе республикань кеветее тонавтыцятнень. Седе тов поздоровт ёвтась РФ-нь сенаторось Пётр Тултаев. Сон макссь РФ-нь Федеральной Собраниянь Федерациянь Советэнь Председателень Благодарность Теньгушевань средней школань прявтонь полавтыцянтень О. В. Лапинанень.
Меельцекс сценанть лангс тердезельть эйдень кужонь кемголмово тонавтыцятне ды колледжень колмо важодицятне, конатнень туртов явшесь казнеть МР-нь Правительствань Председателень Васенце Полавтыцясь Галина Лотванова.
* * *
«Эрзянь правдантень» макссь а покш интервью Пётр Семёнович Прокин – педагогической важодемань ветеранось, Мордовиянь келес содавикс марафонецэсь – шожда атлетикань коряс 36-ксть чемпионось. Эрьва валске чийни 10 вайгельбеть. Сон чачсь Отяжелень районсо. М. Е. Евсевьев лемсэ МГПИ-нть (ней – университет) прядомадо мейле вана уш 54 иеть важоди Покш Березниксэ. Те шканть перть мезекс ансяк эзь ульне: химиянь ды биологиянь тонавтыцякс, организаторокс, директорокс, натой министрань васенце полавтыцякс. Ней ДЮСШ-нь прявт. Тензэ 77 иеть. Нинзэ Татьяна Николаевна марто, конанень умок максозель «Мордовиянь заслуженной тонавтыця» лемесь, весе эрямост алтызь тонавтома тевентень.
Васняяк Пётр Семёнович пек кецясь, зярдо пшкадинек тензэ эрзякс, прок умонь ялгань туртов кармась ёвтнеме:
– «Эрзянь правданть» мон ловнан, свал сёрмадстнян. Пек вечкса эрзянь келенть. Ламо ловнан книгат эсенек Покш Березник ёнксонь автортнэнь – К. Абрамовонь, В. Коломасовонь, М. Брыжинскиень. Кузьма Григорьевич марто лична вастневкшнинь, Михаил Брыжинский ульнесь ялгам. Коломасовдо а весть марсинь, келя, чудак ульнесь. Мезе ансяк «Лавгинов» романозо ашти…
– Мелезэнк тукшны школасо важодемась?
– Вай, ды монь школавтомо, эйкакштомо арась эрямом. Сынтемест кодаяк. Ней мон 13 иеть кода ДЮСШ-нь прявт. Эрьва чистэ валскестэ саезь чокшнес мартост налксян эрьва мейсэ: футболсо, волейболсо, каратэсэ… Каясынь пиджаконть, галстуконть, оршан форма ды мартост чийнян, кирнявтнян, сэрь кепсян. Аволь кода лият: «Мон начальник, мон мартост а карман мезеяк тееме…» Эйкакштнень эряви вечкемс, пиемс-паломс мартост велувсо. Бути сынст вечксыть, тонетькак кармить путомо питне.
– А кода теемс истя, штобу сынст мельс туезэ предметэсь?
– Тонавтыцянтень эряви улемс артистэкс. Сынь ваныть, кодамо вановтот, оршамопелеть… Эряви чарькодемс пеедькшнемат ды маштомс мизолдомо. Нама, эряви, штобу тоньгак чарькодевлидизь, аволь истя: эзить чарькоде – «кавто» теть… Тон совить, варштак весень лангс, шумбракстнек мартост, косо-бути эрявить шнамс, аволь сеске – ват, теть, «кавто» ды весе. Эрьва ломаненть улить потмоёжонь паро ёнксонзо, эрявить сынст муемс, панжомс ды ансяк сестэ кармат алкуксонь тонавтыцякс.
– Кодат стакачить вастневить тынк а шожда тевсэнть?
– Нусмакавты, велетнесэ аламо тонавтницят. Икеле 35 эйкакшт аштесть класстнэсэ, а ней вейке! Мезе мартонзо теемс ниленьгемень минутатнень перть? А бути сон допрок лавшо? Те аволь важодема – стяко шкань ютавтнема. Вана мезес пачкодинек. Стакачись теньсэ – курок овсе чамить велетне, а кинь карми тонавтомс.
Марина Агафонова