Те иень сёксня савсь улемс Кочкуровань муниципальной райононь кезэрень Сурвелесэ, умок тосо араселинь… Те эрзянь мазый велесь, конань кувалмозо таргавсь малав сисем вайгельбеть, допрок полавтовсь. А мезть сёпомс, республикасонок, кода масторонь келескак, улить истят велеть, косо кудотне кадовсть азортомо, каладсть-лондадсть, тесэ жо, мекевлангт, ламо од эрицят. Мельспаросо рединек кудотнень икельга эрьва кодамо тюсонь цецятнень касомаст, марявсь, теке ёвксонь масторга ютынек.
Башка а эряви толковамс, эрьва веленть вандынь чизэ васняяк ашти седе, улить-арасть тосо эйкакшт, школасонть ламо-аволь тонавтницятнеде.
Мельспарозонок, эштё советской шкасто веленть куншкас стявтозь школась аволь ансяк ванстовсь, тосо тонавтнить эйкакшт, кадык аволь истя пек ламо, зяро икелень шкатнестэ, ялатеке течи теяк кенярдовты. Тосо важодить тевест парсте содыця тонавтыцят. Те пек паро!
Вана пачкодинек средней общеобразовательной школантень, тосояк цецянь пандятнеде байтяк ульнесть. Сонзэ икеле вастовинек «Сабаевская СОШ» МБОУ-нь прявтонть Александр Николаевич Юркин марто.
Тешкстасынек, сон тонавтыцянь тевсэнть кармась важодеме эштё советской шкасто М. Е. Евсевьев лемсэ пединститутонть (ней – университет) прядомадо мейле тиринь ёнксонь Давыд велень (руз. Мордовское Давыдово) кавксо классонь школасо. Те ульнесь 1989 иестэ. Аламо шкань ютазь мастор лангсо тевтнень одс ладямонь (перестройкань) иетнестэ весе ломантнень эрямосо ламо полавтомат ульнесть, сынь эзть юта Александр Николаевичень семиянть вакскаяк. Сонензэ савкшнось кадомс тонавтыцянь тевенть, тень лангс апак вано, ялатеке кемсь, зярдояк ды велявты одов важодеме школав, поладсы вечкевикс профессиянзо. Истя лисськак эрямосонзо, 2019 иестэ сон кармась важодеме Сурвелень средней школасо васня тонавтыцякс, 2021 иестэ саезь – те школанть прявтокс. Чарькодеви, теде мейле тевензэ ков седе ламолгадсть, тень лангс апак вано, эзизе кадо кадетэнь классонзо, поладызе классонь ветямонть. Важодемасонзо васень таркас аравты эйкакштнень патриотической лувсо кастоманть, тиринь таркатнень вечкеме тонавтоманть.
Александр Николаевич эйкакштнень марто сеедьстэ ульнекшнесь райононь, республикань ды мик весероссиянь пелькстамотнесэ, косо аволь весть лиснесть изницякс ды призёрокс. Истя, 2021 иестэ сынст кадеттнэ «Гордость страны» весероссиянь моронь пелькстамосонть сайсть васенце степенень диплом. Тонавтницятне невтнить ёрокчист школань, райононь олимпиадатнесэ истят предметтнэнь коряс: рузонь ды тиринь келень, литературань, биологиянь, химиянь ды физкультурань. «Ученик года» пелькстамосонть те школань эйкакштне аволь весть лиснесть изницякс муниципальной пелькссэнть. Истя жо ульнесть лауреатокс республикань конкурссо.
Тесэнь тонавтыцятне ды тонавтницятне свалшкасто пурныть Ине Отечественной войнань участниктнеде, тылэнь тружениктнеде, Афганонь ды Чечнянь войнатнень участниктнеде, педагогической трудонь ветерантнэде кулят. Сынст вийсэ нолдазь Сурвелень эрицятнеде «Ледстнемань книга» («Книга памяти»).
Музейсэнть ютавтовить ледстнемань чить
– Сурвелень средней школась республикасонок кезэренсетнеде вейкесь. 1889 иестэ тей сакшнось од тонавтыцясь Александра Петровна Лавровская, – ёвтнесь школань музеев совамсто Александр Юркин. – Сурвелев пачкодемстэ сон вастневсь ламо стакачи марто. Васняяк, Александра Лавровская эзизе сода эрзянь келенть (шкань ютазь тонавтнизе пек парсте), эзть сатно книгат ды тетрадть, сёрмас содыцятнеде овсе аламо ульнесть. Тонавтомась мольсь церьковань пельслондадозь помещениясо, васень шкасто содамочи мельга сакшность 40 цёрынеть ды ансяк 3 тейтерькат. 1899 иестэ те велень эрицятнень ярмак лангс стявтозель од школа. 1920 иестэ Александра Петровнань бажамонзо вельде велесэнть теезель народной библиотека. Самай се шкастонть саезь кодгеменде ламо иень перть сон важодсь Сурвелесэ тонавтыцякс, эйстэст 41 ие школань прявтоль. Те шканть перть Александра Лавровская сёрмас тонавтсь вете тёжадо ламо ломанть. Сонзэ покш путовксозо тейтерь-аватнень ловномо ды ловомо тонавтомасо, кить эзть саво школав, эйсэст тонавтсь кудосо.
Александра Лавровскаянь парсте содасызь кода минек районсонть, истя жо республикань келескак. Нать, а стяко сонензэ максозь «Заслуженный учитель школы Мордовской АССР» почётонь лемесь.
Александр Юркин невтинзе тенек содавикс тонавтыцянть ули-паронзо, документэнзэ, конат ванстовить сынст музейсэнть. Неявикс таркасо понгавтозь Лавровскаянь портретэзэ, конань артызе те школань прядыцясь, Сурвелень икелень эрицясь.
Башка таркасо аштить Ине Отечественной войнасо ды Локальной конфликттнэсэ маштовозтненень алтазь выставкатне. «Ледстнемань парта» панжозь Афганистанонь тюремань паксятнесэ чавовозентень, сынст школанть прядыцянтень Евгений Трямкиннэнь. Истя жо вейс пурназь ды невтевить те школань ветерантнэнь, заслуженной тонавтыцятнень казнест ды Почётонь грамотаст.
Музеентень сеедьстэ сакшныть сеть ломантне, конатне умок прядызь те школанть, тесэ ледстнить тонавтыцяст, сеть шкатнестэ уцяскав эрямост ды тонавтнемасо изнявксост.
Неень шкадонть
Неень шкасто «Сабаевская СОШ» МБОУ-со тонавтнить 63 эйкакшт. Сурвеленсетнеде башка тей усксевить Татаронь Умысстэ, Кацялайстэ, Давыд велестэ, Рузонь Давыдовасто. Эйкакштнень школав пачтить специальной автобуссо. Уроктнень ветить кемготово тонавтыцят, колмотнень ули высшей категорияст. Неть: М. А. Гулягина, Н. В. Салдаткина, В.Н. Нуштайкина. Кемень тонавтыцятнень стажост комсьветее иеде ламо. «Российской Федерациянь общей образованиянь почетонь роботник» мештесэ кандтнемань тешкссэ казезь М. А. Гулягина, «Народной просвещениянь отличник» – И. Н. Гулягин, сыненст истя жо максозь «Мордовия Республикань заслуженной учитель» почетонь лемесь. Рузонь келень ды литературань тонавтыцятне С. А. Деряева, В. К. Филатова, Н. В. Салдаткина казезь РФ-нь Образованиянь ды наукань министерствань почетонь грамотасо. Биологиянь ды химиянь тонавтыцянтень М. А. Гулягинанень максовсь Кочкуровань райононь прявтонь грантось. 2016 иестэ географиянь тонавтыцянтень В. Н. Нуштайкинанень макссть МР-нь Прявтонь грант.
Малав 35 иеть школанть прявтсо ульнесь Народной просвещениянь отличникесь Иван Николаевич Гулягин. Пединститутонть (ней – университет) прядомадо мейле Мария Александровна нинзэ марто састь Сурвелев ды пингень перть тонавтсть эйкакшт.
Ансяк икелев!
2020 иень сентябрянь 29-це чистэ «Сабаевская СОШ» МБОУ-нть юрсо панжозель «Точка роста» цифровой ды гуманитарной профилень центрась. Колмо иень перть центрась теевсь вечкевикс таркакс кода тонавтыцятнень, истя жо тонавтницятнень туртов. Седе мельстуицякс кармасть улеме ОБЖ-нь уроктне. Ней тевс нолдавить тренажёртнэ-манекентнэ, конат молить покш ломань ёнов. Сынст вельде эйкакштне тонавтнить идеме зыянс понгозь ломанть, апак учонь кажосто лисеме.
Эйкакштне невтить ёрокчист технологиянь уроктнесэ, зярдо тонавтнить «Конструирование» теманть коряс. ЛЕГО конструкторось эйкакштненень лезды эрямос совавтомс эсь арсемаст, сынст вельде топавтовить эрьва кодат мелест ды неить невтевксэст.
«Технология» тонавтнемань предметэнть коряс оборудованиясь школасо тевс нолдави кода уроктнесэ, истя жо юткошкастояк. Эйкакштне тонавтыцяст Александр Николаевич Юркин марто невтить ёрокчист эрьва кодат пелькстамотнесэ. Сынст мельс пек тукшны «Эрьва нармунентень – эсензэ андома тарка» пелькстамось. Те конкурссонть изницятненень свал максовить дипломт ды питней казнеть.
Информатикань тонавтыцясь Р.К. Шабайкина ютавты урокт «Знакомство с VR-Технологиями» теманть коряс. Тонавтницятне теевить содавиксэкс неень шкань виртуальной реальностень технологиятнень марто.
«Точка роста» центрасонть ули шахматонь кружок. Тей тонавтницятне сакшныть покш мельсэ.
Классонь ветицятне тонавтницятнень марто вейсэ ютавтнить мероприятият, косо сынь шумбралгавтыть оймест ды нолдыть тевс эрямонь шумбра лувонть. Эдь те неень шкасто эрявикстнэстэ вейкесь.
Валентина Юдина