Н.П.Огарёв лемсэ МГУ-со ютась вастовома, косо пачтязельть приёмной кампаниянь цётамотне. Журналисттнэнь марто вастневсть МГУ-нь ректорось С.М.Вдовин ды приёмной кампаниянь ответственной секретаресь О.О.Томилин.
– Те иесь сови историяс. Университетэнть юрсо минь панжинек лицей. Тосо «Физика. Химия» ды «Математика. Информатика» ёнкстнэнь коряс кармить тонавтнеме кавто класст, весемезэ 50 ломанть. Ней минек улить образованиянь весе юртнэ, – кортась Сергей Михайлович.
Неень шкане школань прядыцятненень мереви максомс яволявтомат Россиянь вете вузс. Ламот апак пеле истя тейнитькак. Тедеде минек МГУ-с электронной формасо састь 2042 яволявтомат (2018 иестэ – 1142). Мезе парось, бути ломанесь эри васоло, а эряви ардтнемс.
Истя, Н.П.Огарёв лемсэ МГУ-с саезь тонавтнеме 4898 ломанть. Пелест бюджетэнь таркас. Од ломантне ламот кочкизь медицинань институтонть. Тов максозь 2571 яволявтома. Вешевикст кармасть естественно-научной ды технической специальносттне. («Теплоэнергетика и теплотехника», «Электроника», «Оптоэлектроника»). Покш конкурс ульнесь юридической ды экономической факультеттнэс.
– Минь талнозь учинек аграрной специальностень коряс приёмной кампаниянть. Тосо максыть социальной лезкс ды вузонь прядомадо мейле алтыть важодема тарка, зарплатанть марто пандыть башка ярмакт. Школань прядыцятне кочкасть «Ветеринариянть», «Зоотехниянть», «Агрономиянть». Те кецявты. Лия регионтнэсэ неть таркатнес стакасто пурнавсть абитуриенттнэ, – пачтясь ректорось С.М.Вдовин.
Тедеде целевой тонавтнемас саезельть 193 ломанть. Те ёнксонть коряс студентэнть ды организациянть ютксо сёрмадстови договор, максови тонавтнемань целевой направления, пандови стипендия. Вузонь прядомадо мейле эряви молемс те таркантень важодеме. Истямо лувсо предприятиясь аноксты эстензэ кадрат.
737 ломанть састь тонавтнеме Россиянь 48 регионтнэстэ. Сехте ламо Нижней ёнкссто – 303. Мельганзо молить Пензань, Ульяновскоень ёнкстнэ, Москов ошось ды областесь, Чувашиясь ды Самарань ёнксось.
Н.П.Огарёв лемсэ МГУ-со тонавтнить кавто тёжадо ламо омбо масторонь студентт. Тедеде састь тонавтнеме 44 масторсто 589 ломанть. Сехте ламо Туркменистансто ды Индиясто. Сынь кочкизь мединститутонть ды лия факультеттнэнь.
– Примамонь кампаниясь, кода икеле иетнестэяк, ульнесь аволь шожда. Минь топавтынек сень, мезес бажинек. Вузонть парсте содасызь лия регионтнэсэ ды омбо масторсо, сонзэ мельспаросо кочкить тонавтнема таркакс, тесэ улить весе условиятне. Кемтяно, сы иестэяк кармить паро изнявксонок, – прядызе кортамонзо ректорось С.М.Вдовин.
Меельце кемень иетнень перть студенттнэнь туртов панжозельть кото од общежитият. Ламот бажить эрямс одтнэсэ. Од общежитиятнесэ эрямонь кисэ пандомась явови, сон аламодо седе питней. Ректоронть валонзо коряс, улить арсемат витнемс-петнемс ташто общежитиятнень.
Татьяна Маторкина