Неть читнестэ Владимир Волков тевень коряс содавтызе Теньгушевань райононть, косо Барашева посёлкасонть панжсь эйдень од кужо. Объектэсь ульнесь учовикс. Икелень зданиясь, кона теезель пельпингеде икеле, пек таштомсь, кевкстеманть эрявсь решамс. Федеральной центранть марто важодеманть коряс удалась муемс ярмакт ды топавтомс кочкицятнень кармавтомаст. Эйдень кужонть тееманзо лангс ютавтозельть 67 миллиондо ламо целковойть.
Мордовиянь Прявтось ёвтась велень эрицятненень поздоровт эйдень кужонть панжоманзо коряс ды тешкстызе, те тевесь топавтовсь программанть вельде, конань кемекстызе РФ-нь Президентэсь Владимир Путин.
«Меельце 7 иетнень перть минь панжтано 59-це эйдень кужо, – мерсь Владимир Волков. – Барашевасо эйдень кужось – те васенце дошкольной учреждения велесэ, конань минь панжтано тедеде. Нацпроекттнэнь юрсо ветяви покш робота яслянь таркатнень тееманть коряс. Уш 2021 иестэ республикасонть а карми очередь 3 иес эйкакштнень туртовгак. Теевить эштё 13 эйдень кужот, ды седе ламотне – велесэ. Невтемга, неень шкане эйдень кужот строявить Ромоданова, Белозерье, Пензятка, Покш Березник велетнесэ ды Комсомольской посёлкасонть. Те иестэ истя жо строямонь тевть ушодозь Дубёнкасо, Луховкасо ды Ялгасо».
Эйдень кужонть стявтомсто теевсь весемесь, штобу эйкакштнень тосо улемась молевель вадрясто ды зыянтомо.
«Эйкакштнень трямонь-кастомань кевкстемась течи ашти пштистэ. Сень эйстэ, кода анокстазь эйкакшось сы школав, ашти седе тов сонзэ вадрясто тонавтнемась, – тешкстызе Владимир Волков. – Ёвтаса, «Образование» национальной проектэнть тевс нолдазь покш полавтомат учить Барашевань школантькак. Маласо шкастонть тесэ панжови Цифровой ды гуманитарной профилень центра. Проектэсь одкстомтсынзе истят предметтнэнь, кода «Технологиясь», «Информатикась», «ОБЖ-сь». Башка мель явови информационной технологиятнень тонавтомантень. Од оборудованиясь школантень уш рамазь. Улиця программадонть башка эйкакштне кармить тонавтнеме 3D-моделированиянть, компьютерсэ черчениянть, робототехниканть ды сышкань лия профессиятнень. Минек туртов пек эрявикс ёнксось, штобу тонавтомань уровенесь, условиятне, конатнесэ тонавтнить эйкакштне, мейсэяк авольть явово ошонь школатнень эйстэ».