И. Д. Воронин лемсэ краеведениянь музейсэ ютавтовсь вастовома, конась алтазель «Вышитая карта «Мордовия многонациональная» проектэнть топавтомантень.
«Ламораськень Мордовия» викшнезь картась кармась Мордовия Республикань лия ёнов а молиця теварсевксэкс. Ледстясынек, сонзэ лангсо важодсть региононь эрьва районтнэстэ кедьчелькев аватне. Важодемась топавтовсь вете ковонь перть. Те шканть перть викшнезь 23 пелькст, 35 200 кавонзазь сантиметрат. Важодевкссэнть вейсэндявсть эрзянь, мокшонь, татаронь раськень тешкстнэ. Те проектэнть тевс совавтыцясь – Н. П. Огарёв лемсэ МГУ-нь Раськень культурань институтонь тонавтыцясь, РДНТ-нь прикладной искусствань коряс методистэсь Вера Ковалева, кона эсензэ вановтонзо алов саинзе республикань эрьва буень ёроков викшницятнень ды важодсь мартост чинек-венек. Ды, окойники, викшнезь картась теевсь краеведениянь музеень экспозициянь пельксэкс!
Вастовоманть панжизе МР-нь Культурань, национальной политикань ды архивень тевень министрась Светлана Баулина. Сон тешкстась: «Мордовия многонациональная» викшнезь картась – те минек раськень сюпавчинек, конань коряс аштетяно покш каштанчисэ!».
Кенярксчинтень эрьва райононь викшниця авась сакшнось эсензэ кедьсэ стазь ды викшнезь оршамопельсэ. Истя, Отяжбуень Сабанцелень кедьчелькевесь Анастасия Сидорова ёвтнесь: «Те теварсевксэнтень путозь ламо вийть ды важодема. Мелявксось ульнесь покш, ансяк кодамо мазый ды киньгак ёнов а молиця тев минь топавтынек! Мон вишкапингестэ саезь викшнян. Минек кудораськесэ викшницят арасть, истямось мон ськамон. Важодинь малав 1,5 ковт. Васняяк артыя конёв лангс ды ансяк мейле те артовксонть кандыя коцт лангс. Эсень важодемасон невтезь Отяжбуенть сюпавчизэ: розень паксянзо, вирензэ, церьковазо, «Атяшевской» МПК-сь», «Каменка» сокссо кирякстнемань комплексэсь ды раськень тешксэсь».
Меельцекс Светлана Никитовна покш казнесэ тешкстынзе кедьчелькев аватнень. Ды седе тов макссь кармавтома: «Маласо шкастонть минь арсетяно эрямос совавтомс истямо арсевксэнть: стамс ды викшнемс региононь эрьва райононтень совиця велетнень оршамопелест».
Алена Артемьева