Мордовиянь эйкакшонь библиотекатнесэ важодицятне МР-нь Культурань, национальной политикань ды архивень тевень министерстванть лезксэнзэ вельде ютавтсть «Библиотечное краеведение – территория больших возможностей. Сохраняя традиции – создаём будущее» Профессиональной мастерствань школань выездной занятия.
Вастовомась мольсь Отяжелень райононь центральной библиотеканть юрс совиця эйкакшонь библиотекасонть. Школасонть важодсть Покш Березникень, Ицялонь, Кочкуровань, Лямбирень, Ромодановань, Чаунзань муниципальной районтнэнь ды Саранск ошонь округонь библиотекатнень специалисттнэ.
Мероприятиянтень пурнавицятненень шумбракстнемань вал марто пшкадекшнесь Отяжелень райононь социальной кевкстематнень коряс прявтонь полавтыцясь – Образованиянь управлениянь начальникесь Наталья Михайловна Бухаркина. Сон тешкстась, неень шкасто пек эрявиксэкс ловови краеведениянь ёнкссонть эсь содамочитнеде лиятненень ёвтнемась. Библиотекась жо – самай истямо тарка, косо эйкакшось мусынзе тиринь ёнкстонть, содавикс ломантнеде эрявикс кулятнень.
Школанть панжизе Республиканской эйкакшонь библиотекань научной важодемань коряс прявтонь полавтыцясь Светлана Анатольевна Грибова. Школань программанть лувсо пурнавозтненень теезель экскурсия Отяжелень райононь библиотекаванть, ёвтнесть краеведениянь коряс важодемадонть. «Творческая мастерская» площадкасонть участниктне вейкест-вейкест содавтсть, мезе тееви келенть ванстомга, эрзя-мокшонь писательтнень творчествадост весенень пачтямга, ёвтнесть историко-краеведениянь тонавтнематнень-ванкшноматнень невтевкстнэде. Истя жо ёвтнесть проекттнэнь, программатнень коряс важодемадост, писательтнень творчествадост лиятненень пачтямга мероприятиятнеде, библиотекань мини-музейтнеде.
Краеведениянь мини-музейтне – куш кодамо эйкакшонь библиотеканть башка каштанчи. Учреждениятнесэ сынь теевить тов сакшныцятнень иест мельс саезь. Экспонаттнэяк пурнавить тень коряс. Невтемакс, Чаунзань эйкакшонь библиотекасонть пурназь кавто мини-музейть: «Предметы старины» ды «Не гаснет памяти огонь».
Вирь Тавла велень библиотекань, конась сови «Кочкуровская центральная районная библиотека» МБУК-нть юрс, библиотекаресь Н. Д. Баляйкина ёвтнесь, мезе сынь теить тиринь келенть ванстоманзо ды виевгавтоманзо коряс: пачтясь В. И. Ромашкин лемсэ «Этно-кудо» музеенть марто вейсэнь проекттнэде, «Комикссэ эрий кель» арт-проекттнэде, «За красоту родного языка» акциядонть. Н. Д. Баляйкина тешкстась: «Минь кемтяно, сыть сеть шкатне, зярдо минек эйкакштне, нуцькатне апак визде кармить кортамо тиринь кельсэст ды каштансто ёвтасызь эрзянь содавикс поэтэнть Артур Моронь валонзо: «Мон эрзян! Прясто пильгс эрзян!»
Писателесь ды сонзэ творчествазо неень шкасто лововить ламот библиотекатнень брендэкс. «Работаем с именами. Бренд-мероприятия как способ продвижения творческого наследия писателя-земляка» теманть коряс кортасть Ромодановань райононь ды Ицялонь райононь эйкакшонь библиотекатнесэ важодицятне Н.А. Метыженко ды Т. А. Верендякина.
Профессиональной мастерствань республиканской школань участниктнень туртов ютавтсть экскурсият Отяжелень райононь краеведениянь музейганть ды Раськень культурань ды ремеслань центраванть.
Коень коряс Профессиональной мастерствань школасонть важодицятненень максозельть методико-библиографической материалонь комплектт, конатнень нолдынзе «Мордовская республиканская детская библиотека» ГБУК-сь.
Татьяна ПАНИШЕВА,
МРДБ-нь раськень ды краеведениянь литературань отделэнь прявт библиотекарь.