МР-нь Някань государственной театрасо невтезель «Каргонь ки» спектаклясь, конась алтавсь Ине Отечественной войнасо Изнямонь 77 иетненень. Сонзэ авторось – минек драматургось ды театроведэсь В. С. Брыжинский.

Путовксонть ваномо сакшность ошонь школань тонавтницятне. Васенцеде сон невтезель 2014 иестэ, путыцязо – МР-нь заслуженной артисткась Лилия Шахова. Путовксось одс вельмевтезель, ней тесэ налксить од актёрт. Налксицятнень ютксо МР-нь заслуженной артисткась Галина Максутова, Иван Чиндяйкин, Ирина Рахманова, Диана Кит, Андрей Роганин.

– Мон тосо налксян Никитань роленть. Сон – велень эриця, тракторист. Туи войнав эсь масторонзо фашисттнэде ванстомо ды чавови. Ансяк те спектаклясь ёвксонь кондямо, тосо ламо цюдань тевть, секскак монь героесь куломадо мейлеяк кортни малавиксэнзэ марто, – ёвтни Иван Чиндяйкин.

Кода пачтясь театрань литературно-драматической пельксэнь ветицясь Елена Лугаськова, «Каргонь ки» спектаклясь пек виев. Сон канды покш смусть ды киньгак а кады мельтеме. Ломантне неизь войнань зыянонть, ансяк кадовсть ломанекс: вечкицякс, мелень ваныцякс, седеймарицякс. Улить таркат, косо а кирдевить сельведтне, ули мезе лангсо пейдемскак. Те спектаклясь натой невтевсь онлайн «PRO.Культура.РФ» сайтсэ.

Истя жо Някань театрась Изнямонь чинтень анокстакшнось ламо лия паро тевть. Те: «Квартал Победы» проектэнть лувсо республикань эйкакшонь библиотекасо невтевсь «Чудеса в решете» спектаклясь. Театрань официальной группатнесэ ветявсь «Читаем для вас о войне» рубрикась, тосо актёртнэ ловность стихть. Някань театрань фойесэ панжовсь «Этот день Победы» эйкакшонь выставка. Артовкстнэнь теизь ошонь 17 № ды 38 № школань тонавтницятне. Эряви меремс, маень 12-це чистэ саезь театрась карми важодеме кизэнь графиксэ. Эрьва цетьверькстэ спектаклятне невтевить 19:00 чассто. Субутасто – 11 ды 13 чассто.

Татьяна Маторкина

Фотось Эдуард Ретунскиень