Суббота, ноября 28, 2020
Важное

«Сабан» эрзянь кельсэ мультипликационной фильманть, виськсэзэн, неия аволь умок. Кие-бути тейсь репост «ВКонтакте» социальной сетьсэнть. Сонсь жо ёвксось лиссь уш 2015 иестэ «Татармультфильм» творческой вейсэндявксонть вийсэ, ярмаксо лездась тенст Татарстанонь Культурань министерствась. Те мультфильмась нолдазель «Волжские богатыри» проектэнть юрсо. Эрзянь ёвкскеденть башка, тозонь совасть татаронь, рузонь, ветькень, маринь ды удмуртонь раськень фольклоронь произведеният. Весемезэ нолдазельть кото мультфильмат.


Сабан богатырденть сериясь пурназель эрзянь ёвкстнэнь коряс. Сюжетэнть коряс Сабан маралясь идесы Ялга кисканзо апаро вийтнень эйстэ. Эрзянь цёрась-ледницясь те мультфильмасонть невтьсынзе эсензэ ды тиринь раськенть сехте паро ёнкстнэнь: ялгаксчинть, кемечинть ды, кода эрси свал ёвкстнэсэ, вадрясь изнясы беряненть.
«Татармультфильм» вейсэндявксось нолдызе те мультфильманть ниле кельсэ: эрзякс, мокшокс, татарокс ды рузокс. 2016 иестэ эрзякс ды мокшокс ютавтомонзо Казанев якасть минек мокшэрзянь раськень театрань актёртнэ Алексей Егранов, Галина Гришуткина, Елена Гудожникова, Артем Якомаскин ды Анатолий Нуштайкин. Сынст вийсэ ды вайгельсэ мультфильмась седеяк теевсь седейс педицякс, эдь эрьвась маризе сонзэ тиринь кельсэ. Теньсэ сон питнейгак сеть ломантненень, кие корты эрзякс ды мокшокс. Отяжелень райононь Сабанцелень эрицятне, келя, те ёвксонть эсест велест марто сюлмизь, арсить, маралясь тостонь ды веленть лемезэяк пельдензэ тусь. Тешкстама, артовкстнэяк мультфильмасонть пек парт, музыкаськак путозь мельстуиця.

Мультфильманть ваномсто ледстия се шканть, зярдо тонавтнинь эштё университетсэ ды практикав кучнимизь Мордовиянь телевиденияв «Сияжар» раськень программань редакцияв. Тосо, сюжеттнэнь снимамодонть башка, ютавтнинек эрзянь кельс рузонь мультфильмат. Мелезэнь кадовсь мекс-бути ансяк вейкесь: весенень содавикс «Кстыень пиземесь». Мон ульнинь Ривезь левкскекс, ялгам Лариса Дряхлова – Ривезь тетякс, Наталья Светкина – Ривезькенть ялгинекс. Сонзэ ламоксть невтнизь «Сияжаронь» передачатнесэ, ней жо костояк а некшнян, арась сон Интернетсэяк. Ули энялдомам «Сияжаронтень»: паряк, муеви, паряк, ванстовсь? Теке марто пароль бу таго ушодомс истят проектт, эдь тевесь а пек стака, ансяк ломанть муема, мокшэрзянь актёртнэяк, арсян, лездыть. Мезе апарось, ней студентт стака муемс, конатне бу ваньксстэ содавлизь эрзянь эли мокшонь келенть. Минек «Эрзянь правдаськак» уш зярыя иеть майси тень коряс, а сакшныть тенек кияк а практикас, а важодеме. Косто седе тов муемс од кадрат, раськень журналистт? Кевкстемась пек стака!

Кенярдовтымизь меельце иетнестэ «НТМ» телеканалось, кармасть важодеме «Эрзянь вал» ды «Мокшонь вал» передачатне, «Тонавтнетяно эрзянь келенть», «Тонавтнетяно мокшонь келенть» уроктне. Анокставить сынь од технологиятнень тевс нолдазь. Арсян, мультфильматкак эйкакштнень туртов можна нолдамс, бути арсемс-теемс. Ушодоволь бу те тевесь, монсь савлинь Ривезькень вайгельсэ кортамо!

Марина ДЕВЯТОВА

Модас сюконявлинь мультфильманть нолдыцятненень. Секе шкасто ули кевкстемам: «Мекс сонзэ нолдыцянзо аволь эсенек республикасто?» Миненек эрявить передачат ды мультфильмат эйкакштнень туртов. Кевкстеманть ёран максомс сетненень, кинь кедьсэ минек культурась ды образованиясь. Тевесь натой пачкодсь семс: минек газетатне, журналтнэ, сонсь телевидениясь майсить журналисттнэнь а сатноманть кувалма. Икеле эрзянь ды мокшонь кельсэ газетатнес понгомс журналисттнэнь ютксо мольсь пелькстамо. Ней а кинь саемс. Тиринь кельсэ сёрмадыцятне истя аламолгадсть, сынь сурсо лововить. Монь те кулясь пек тандавтни. Минек раськенть уцясказо одтнэнь кедьсэ. Сась шка весенень, прявттнэненьгак, миненекак, общественной вейсэндявкстнэнень, лия сельмсэ варштамс сень лангс, кода эрить ды мейсэ лексить минек раськень од ломантне, кодамо лезкс тенст эряви. Ансяк истямо ладсо, кода мерить, кевесь сыргавтови таркастонзо.

Раиса ЩАНКИНА,
«Литова» эрзянь авань вейсэндявксонь прявт.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».