Пятница, марта 29, 2024
Важное


«Хоровой дирижированиянь педагог, МАССР-нь школань заслуженной учитель (1974 ие)» – ловнан Л.Б.Бояркинань «Мордовская музыкальная энциклопедия» книгань 132-це лопастонть (2011 ие). Кортамось моли эрзянь авадонть Лидия Фокеевна Кильдюшкинадо (тейтерькс Цыпкайкина). Эряви сеске меремс, ёвтазь энциклопедиясонть арасть косто понгсь саезь ломанень лемть. Тов совасть сеть ломантнень лемест, кить тейсть покш путовкс минек раськень культурантень, сонзэ кемекстамонтень. Лидия Фокеевна Кильдюшкинань лемензэ ульнесь мезень кис тешкстамс ды сёрмадомс истямо покш книгас. Сон, ловт, весе эрямонзо максызе эйкакшонь тонавтомантень.

1962 иестэ саезь 1995 иенть самс Лидия Фокеевна тонавтсь эйкакшт моронь морамо Саранск ошонь музыкальной школасо-интернатсо, вете иеть ульнесь народной музыкань кафедрань старшей преподавателекс Мордовской госуниверситетсэ. Сонзэ кедь алдо, кода мерить, лиссть аволь вейке кементь од ломанть, кинень сон лездась муемс вечкевикс тев, панжизе тенст кинть музыкальной искусствантень, макссь сёлмот вере тёкшс сынст куземасо.

Сехте покш изнявксозо – эйкакшонь хорось, конань сон малав колоньгемень иень перть ветясь музыкальной школасо-интернатсо. Сонзэ пингстэ те хорось васенцеде кармась морсеме эрзянь ды мокшонь кода кезэрень морот, истя неень шкань композитортнэнь ламо произведенияст. Парсте морамонть кисэ эйкакшонь те коллективентень максозель Мордовиянь комсомолонь премия (1974 ие), лиснесь изницякс Весемасторонь художественной самодеятельностень пелькстамосо (1990 ие).

Сонсь Лидия Фокеевна моронть ды музыканть марто сюлмавозь кинть лангс чалгась аволь апак учо. Моронтень вечкемась седейсэнзэ сыремсь вишка пингестэ саезь. Кудораськестэст весе, ловт, морыцяльть. Весемеде мазыйстэ морсесь авазо Мария Григорьевна Цыпкайкина (тейтерькс Петайкина).



Чачсь Лидия Фокеевна Кочкурбуень Мурань велесэ. Кудораськень юртост ульнесь Сурвелесэ (Сабаевасо). Покштянзо Цыпкайкин Пётр Евдокимовичень кудораськезэст велесэ мернесть Обранынькань. Келя, сюпавольть пек. Ней стака ёвтамс, кодамо тувталонь кувалма покштянзо кудораськентень савсь туемс эрямо Муранев. Семиясь кармась касомо. Эйкакштнень ютксто вейкенть лемдизь Фокеекс. Мейле, шкань ютазь, Фокей Петровичень чачить эсензэ эйкакшонзо. Козяйканзо, Лидия Фокеевнань аванзо, муизе Кочкурвелестэ. Сатотсь тензэ весть неемс тейтеренть ды сеске ваясь сонзэ сельмтнень потс. Сестэ авазо пиже цянавнель, топодекшнесть тензэ ансяк 16 иеть. Ды, улема, эсензэ седейскак цёрась педязь педясь. Секе иестэнть лиссь экшезэнзэ мирденень. Кавонест трясть-кастсть вейксэ эйкакшт. Лидия Фокеевна – кавксоцель. Чачсь Ине войнанть ушодовомадо икеле, 1939 иестэ. Тетянзо марто эзь саво кувать эрямс – Фокей Петрович тусь ятонть каршо тюреме ды эзь велявто мекев: 1943 иестэ маштовсь. Мельганзо фронтов тукшность покш лелянзо: Борис, Михаил ды Николай. Борис – пулемётчикель. Ялго сядонь сядо вайгельпеть савсь тензэ ютамс. Пачкодсь Кёнигсбергев (ней Калининград ош), тоско кадовськак эрямо. Кулось 1994 иестэ. Лия лелянзо-патянзояк тусть эрямосто. Тетянзо-аванзо вейксэ эйкакшост эйстэ кадовсть кавонест: Лидия Фокеевна ды ялаксозо Иван Фокеевич, кона эри Торжоксо.
Весемеде валдо ледстнемат кадсь покш лелязо Борис, кона Лидия Фокеевнань туртов ульнесь превень максыцякс, кинь невтицякс. Сонзэ пельде тонадсь книгань вечкемеяк. Сон сынст кучнесь Лиданень Калининградсто. Лида эйсэст аволь ловнось – нильнезь нильнесь. Те шкас Лидия Фокеевна а кадны книгань ловноманть. Теке марто вечки валморот. Соды сындест зяро, эстензэяк стака ёвтамс. Пушкин, Есенин, Полонский. Аволь кодаткак вишка валморынеть, цела поэмат. Ды весе сынст кирди эсензэ превсэ-удемсэ!

…Од шкасто снимазь фототнесэ – пава-а пава. Мазый чачонзо лангс ванозь, теке ванькс лисьмапрясто эрексиянь ведте корштнят ды а пешкедят. Мерят, те тейтеренть эрямозо ойсэ ды медьсэ ваднезь. А варминеть эзть пува, а пиземеть эзть вало лангозонзо. Те аволь истя. Аволь вармат – даволткак пряванзо ютасть, аволь пиземеть – цярахманткак чавсть-тапасть эйсэнзэ. Се шкасто кода лиятненень, истя сонензэяк сатотсь войнасо киртазь эйкакшпинге. Войнадо мейлень стакачитне эзть юта сынст кудонть вакскаяк. Эрьва мезть савсь цидярдомс, эрьва мезень пачк ютамс. Сестэ лавшокс улемс а кодаль. Эрявсь цидярдомс. Истя кемекстась Лидань обуцязо, кона мейлеяк лездась тензэ а мендявомс, а прамс кумажа лангс, зярдо стакачитне килькштязь килькштясть эйсэнзэ, эзть максо ойме таргамс.
Эйкакшпингстэ уш Лида тонадсь а ёмавтнемс шканть стяко. Свал кирдсь превсэнзэ арсеманть: мезе лангскак апак вано, эряви тонавтнемс, муемс эрямосо эсь кинть. Муранень школасо 8 класстнэнь прядомадо мейле кармась якамо Кочкурвелень школав. Автобуст сестэ арасельть. Яксесь ялго. Эрьва чистэ вейксэшка вайгельпеть тов ды зняро жо – мекев. Тонавтнемадо башка, кармась морсеме школань художественной самодеятельностьсэ. Ды сестэ уш редязель морамонь ёрокчизэ. Се шкастонть эрьва косто вешнесть морыцят «Умарина» морокуронть туртов. Маризь сонзэ вайгелензэ ды… састь мельганзо кудов. Ды сон 9-це классонть прядомадо мейле тусь Саранскоев,
Ие морсесь ошонь од морокуросонть. Содыця ломанть путызь превс молемс тонавтнеме Саранск ошонь музыкальной училищав. Сестэ консерваториянь прядомадо мейле училищав сась од тонавтыця – Фроловский Михаил Иванович. Сонзэ кедьс понгсь Лидаяк, мезенть кис те шкас сюкони Инешкипазонтень. Келя, весемесь, мезес тонадсь, сась тензэ М.И.Фроловскоень пельде. Ды аволь ансяк сонзэ туртов, Фроловский пек ламо макссь весе од ломантненень, кить тонавтнесть сонзэ кедьсэ. Омбоце курсонть прядомадо мейле сась музыкальной театрав, кармась морсеме тосонь хорсо. Истямо ладсо весень марто (сынст ютксоль Р.Беспаловаяк) налксесь истят оператнесэ, кода «Евгений Онегин», «Пиковая дама», «Риголетто», «Кармен» ды ламо лиясо. Заочна тонавтнесь культурань Московонь институтсо. Тонавтнеманзо эзизе кадно мирденень лисемадо мейлеяк. Паро, мирдезэ, Николай Сергеевич Кильдюшкин, чарькодицяль. Эзь карда ды эзь лоткавто эйсэнзэ. Мекевлангт, лездась тензэ эрьва мейсэ. Сэредемась эзь максо тенст кувать эрямс вейсэ. Ниленьгемень сисем иесэ кадовсь ськамонзо. Ней, кода эрьва аванть, сехте вечкема ломанензэ – Сергей цёразо ды Арина нуцьказо. Сынст туртов Лидия Фокеевна анок максомс весе виензэ ды эрямонзояк.

…Саты весть совамс Лидия Фокеевнань кудос ды сеске чарькодят: тесэ эри эрьва мезень тееме маштыця ломань. Эрьва косо понгавтнезь картинат. Сынст эйстэ сельметь а саевить. Сеске а чарькодяткак: сынь аволь артозь, сынь викшнезь кудазораванть кедьсэ. Лия тевсэяк Лидия Фокеевна куш кинь лепштясы карксамонзо алов. Пидеме-панеме, стамо-каярдамо – неть тевтнень сельмень конязь топавтсынзе. А кодат свитрат-палят эстензэ коды – эряви неемс! Нурькинестэ, арась истямо тев, конань тееме аволь машто. Кудопотсонзо весемесь, келя, теезь-ладсезь эсензэ кедьсэ. Косто сайни шка ды зярдо кенеркшни кундсемс эрьва мезень тееме? Лидия Фокеевна те кевкстеманть каршо мерсь нурькинестэ: «А эряви нузялдомс». Седе видестэ а ёвтасак. Сонсь Лидия Фокеевна а соды оймамо. Кудосояк а вечки аштеме ды лужалеме тевтеме. Иензэ лангс апак вано, свал пии-палы тевсэ-мелявкссо. Весемеде аютко тензэ кизна. Ловось паро ладсо а кенери соламо, сон уш Мураньсэ. Тейнизе-витнизе аванзо ташто кудыненть. Тов сакшны, эсензэ валонзо коряс, седеень оймавтомо, рунгонь ливчакавтомо. Эмежень кастомадо башка, пек вечки цецят. Кода пирезэ, истя кудопотмозояк пешксеть эрьва кодамо цецядо. Содасы ды ёвтасы эрьванть лемензэ: хризантемат, георгинат, нарцисст, флоксат, глоксиният, ромашкат, циният.

Оймезэ яксемс вирьга. Кстыйтне кенерить, сон – васенцекс сырги. Панготнеде кортамскак а сави. Содасынзе весе таркатнень, косо мезе касы. Жаворонка-садов – кстыйс, Крутиць вирев – бояр пангс, Пазава чама или Угол вирьсэ седе ламо касыть опёнкат. Весе таркатнень ютынзе нучк-пачк. Тельня ули мезде таньшкавтомс кургонть.
Теке марто а стувтни вечкевикс тевензэ – морамонть. Яки Саранск ошонь Культурань дворецсэ ветеранонь хорсо морсеме. Ламо иеть ульнесь Муранень «Сюлгамо» ансамблясо морыцятнень ютксо. Морси ськамонзояк. Пек вечксы С.Люлякинань моронзо. Кодак серьгедьсы «Верьга-менельга» моронть, теке мерят, сонсь Люлякина эйсэнзэ моры. Чачонь коряскак сынь молить вейкест-вейкест ёнов. А, паряк, истя малацекс сынст теинзе морось, кона кода С.Люлякинань, истя Л.Кильдюшкинань туртовгак ульнесь ды кадови оймень нильксэкс ды эрямонь смустекс?

Тедедень ожоковсто Л.Ф.Кильдюшкина тешкстызе чачома чинзэ. Сонензэ топодсть 80 иеть. Арсетяно тензэ седе товгак молемс эрямонь кияванть кеместэ эскелязь ды икелев ванозь, улемс одтнэнь туртов превс путыцякс ды кинь невтицякс.

Раиса ЩАНКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».