Кода тенек ёвтасть АФУН-со, Финно-угрань раськетнень II-це Весероссиянь форумось «Этнокультурное многообразие России: современные вызовы и перспективы развития» лементь ало юты Саран ошсо августонь 16-19 читнестэ.

Васенцеде те форумось ютась Ижевск ошсо 2021 иестэ ды кармась учовикс мероприятиякс Российской Федерациянь национальной политикань ёнкссонть. Участниктне, конанть ютксо ульнесь Мордовиянь покш делегацияськак, кортасть цифровой ды информационной перть-пелькссэнть кельтнень келейгавтомадонть, од ломантнень мельдест-арсемадост ды проекттэст этнокультурань койтнень-кирдатнень ванстомасо ды кемекстамосо.
Тедеде сонзэ программанть коряс истя жо кармить ламо кортамот седе, кода кастомс вейсэнь важодеманть финно-угрань раськетнень ютксо наукань, культурань, информациянь, кельтнень ды лия ёнксттнэнь юрсо.
Форумонть шкасто юты пленарной промкс, кармить важодеме секцият, конатне алтавить этнокультурань сюпавчитнень, IT-технологиятнень кемекстамонть ды од ломантнень проекттнэнь ламочист кастоманть туртов. Кармить истя жо толковазь талновтыця кевкстематне государственой национальной политиканть топавтомадо, госвластень органттнэнь ды аволь коммерческой организациятнень вейсэнь важодемадост.
Форумсонть кармить евтазь од ломанень проекттнэнь пелькстамонть цетамотне, конатне явсть мель финно-угрань кельтнень, койтнень -кирдатнень ванстомантень.
Мордовияв сыть делегацият Россиянь 35 регионсто, ютксост федеральной ды региональной властень органттнэнь, этнокультурань общественной организациятнень, образованиянь ды культурань учреждениятнень представительтне.