«Национальная безопасность и наука» ИАЦ АНО-сь ды МР-нь беряньстэ неиця ломантнень специальной библиотекась прядызь Культурань инициативань Президентэнь фондонь (ПФКИ-21-1-000345) «Цятконят» арт-фолк театрась» грантонь проектэнь топавтоманть.

Библиотекань командань участниктнень марто кочказель «Сияжар» музыкально-драматической спектаклянь сценарийс литература. Мольсь покш важодема эйкакштнень марто, конатне тонавтнить Орданьбуень беряньстэ неиця эйкакштнень туртов общеобразовательной школасо-интернатсо. Сынь явсть мель «Сияжар» спектаклянь путомантень ды пек кецнесть актёронь тевень варчамонтень.

Спектаклясь невтевсь Эрзянь ды мокшонь национальной драматической театрасо офлайн- ды онлайн-форматтнэнь вельде. Ваныцятнень ютксо ульнесть библиотекань ламо ловныцят – неемань коряс инвалидт, лавшосто неицят, Орданьбуень беряньстэ неиця эйкакштнень туртов общеобразовательной школань-интернатонь тонавтницятнень тетяст-аваст, педагогост. «Сияжар» спектаклясь невтизе ваныцятненень, кодат легендат ды ёвтнемат улить эрзянь ды мокшонь раськенть. Истя, эйкакшонь национально-музыкальной театрась кармась лавшо шумбрачи марто ломантнень туртов лезэв тевекс, эсь прянь ды творческой маштомачитнень вадря невтемакс.