Покш Березникбуень Культурно-досуговой центрасо вана уш зярыя иеть важоди «Лукоморье» някань театрась. Эйкакштнень туртов сынь невтить сцена лангсо ёвкст ды лия мельстуиця невтемат. Репертуарось покш ды сон иеде иес седеяк сюпалгады.
– Някань театрась Покш Березниксэ панжовсь умок. Виев важодема эйсэнзэ кармась сестэ, зярдо панжовсь Культурань кудонь од зданиянок, улить ламо тарканок ды паро условият. Ды вана 2017-2018 иестэ саезь тевесь моли седеяк кеместэ. А. Е. Губанищев (ней МР-нь Культурань, национальной политикань ды архивень тевень министрань васенце полавтыця) лездась тенек муемс някат. Седеяк покш меленек чачсь теемс од путовкст, – ёвтни «Лукоморье» някань театрань ветицясь Татьяна Морозова.
– Татьяна Борисовна, кодат спектаклят путнетядо?
– Сеедьстэ путнетяно рузонь ёвкстнэнь ды баснятнень коряс. Репертуарсонок малав комсьветее спектаклят: «Колобок», «Репка», «Колодец», «Как Лиса Волка судила», «Красная Шапочка», «Сказка о золотом петушке», «Волчья песня», «Коза-дереза», «Глупый волк», «По щучьему велению» ды ламо лият. Свал бажатано теемс неень шкань лувсо, совавтомс мезяк од, тейнетяно музыкальной аранжировкат. Сцена лангсо невтемстэ важоди экран – тосо ашти кудыне, вирь эли пакся, те седеяк кецявты ваныцятнень. Экранось лезды тенек, сон седеяк мазылгавты спектаклянть. Од иенень путнетяно теленень ды од иенень алтазь спектакля. Эйкакштненень пек вечкевить ёвкстнэ, сынь вастыть эйсэст мельспаросо. Ковозонзо невттяно колмо спектаклят. Теде башка, путтано Интернетс, улезэ онлайн ванома. Культурно-досуговой центрав путовкстнэнь ваномо сакшныть эйдень кужов якицятне, вишка классо тонавтницятне. Пандемиядонть икеле сеедьстэ ардтнинек велетнева. Тосонь эйкакштне седеяк лембестэ вастыть минек. Сельминест палыть, апак лотксе цяпить, ризныть ды кенярдыть геройтнень кисэ. Невтемадо мейле минекак ёжонок витеви.
– Зяро артистт важодить някань театрасонть?
– Весе артистэнек важодить Культурно-досуговой центрасо: кие морси, кие киштиця, кие жо методист. Алкуксонь энтузиастт. Сынь покш мельспаросо налксить някань театрасо. Ёвтасынь леместкак: Ирина Губанищева, Елена Зайцева, Наталья Адлейба, аволь умок састь юткозонок Юлия Ворожейкина, Алексей Кудряшов. Мартонок важодсь Сергей Гаврюшов, ней сон морси «Мерема» ансамблясо. Ды аволь ансяк артистт ютксонок, ламо лездыть звукооператорось, художественной руководителесь, методисттнэ. Весенень ёвтан сюкпря! Монськак яла налксян, пек вечкеви тень те тевесь. Видьстэ меремс, неть спектаклятнесэ минек ойменек оймси.
Татьяна Борисовна чачсь Покш Березникбуень Мариуполь велесэ. Кавксо класстнэнь прядомадо мейле поладызе тонавтнеманзо Ицялонь педагогической училищасо. Тоско лиссь мирденень, чачсть кавто эйкакшонзо. Мейле семиянек састь эрямо Покш Березникев. Сон важодсь эйдень кужосо воспитателекс, седе тов – кужонь прявтокс. 1997 иестэ сась важодеме райононь Культурань кудов. Кармась роботамо методистэкс. Сон мораськак, киштськак. Седе тов кундась «Лукоморье» театрань тевтнес.
– Минек покш мелявксонок – арасть ламо няканок. Конат улить, сетнеяк таштомсть. Улить истят няканок: овтыне, верьгиз, ривезь, нумоло, атякшке, ватракш, истя жо атине, бабине, тейтерне. Сынь вишкинеть, нама, паро бу седе покшт улевельть, сынь седе неявить эйкакштненень. Таштотнень минсь витнетяно. Нармунть-някат эрявольть. Спектаклянь кочкамсто тагояк арсетяно, мезе путомс, эдь арасть эрявикс няканок. Саемга, муинек сеельде мельстуиця произведения, ансяк тов эрявить кото-сисем сеельть-някат. Таштотнень статано одс. Сёрмадокшнынек проект, аламодо баллонок эзть сато изнямс. Сы иестэ таго варчасынек виенек. Меленек-арсеманок ламо. Бажатано путомс «Дочь и падчерица» ёвксонть ды лият.
Аволь умок путынек Г. Гребенцовонь пьесанзо коряс «Чаула верьгиз» спектаклянть. Эйкакштне пек лембестэ сонзэ вастызь. Сонзэ невтекшнинек натой Саранскойсэ, Эйкакшонь республикань библиотекасо. Васенцеде сакшнынек невтеме Саранскоев, ризнынек, нама, вастымизь парсте. Ваныцятнень ютксо ульнесть ошонь школань тонавтницятне, Донбассонь эйкакштне, нужачисэ эриця семиянь эйдетне, Ялгань эйкакшонь школань-интернатонь тонавтницятне, – пачтясь Татьяна Морозова.
Кемтяно, «Лукоморье» някань театрась келемтьсынзе сёлмонзо, кармить од някаст, мельстуиця од путовксост, конатне кенярдовтсызь вишка ваныцятнень.
Татьяна Маторкина