Вторник, октября 27, 2020
Важное



…Ледстневить кавксоньгеменце иетне. Республикань велень хозяйствань ды перерабатывающей промышленностень предприятиятне пачтить эсь изнявкстнэде. Велькска топавтовить государствантень сывелень, ловсонь, сюронь миемань аравтлувтне.
Дубенкань районсо ансяк паро валсо кортасть тесэнь крахмалонь теемань заводонть ланга. Сон ашти мазыйдеяк мазый таркасо, Орданьбуе веленть вакссо. Предприятиясь эсь продукциянзо – крахмалонть – микшнесь аволь ансяк минек республикасо, сонзэ томбалеяк. Крахмал марто автомашинатне ардсть Самарав, Оренбургов, Нижней Новгородов, Ульяновскоев, масторонь лия оштнес.

Дубенкань крахмалонь теемань заводсонть важодсть аволь ансяк Орданьбуень, истя жо шабра Петровка, Кайбичева, Поводеле, Дубенка велень эрицятне. Тесэ сынь важодсть кавто сменасо. Сырьянть, модамаренть, тей усксть, республикань велетнеде башка, Чувашиянь Алатырьстэ, Нижней Новгородонь, Ульяновскоень областтнестэ.

Састь перестройкань иетне. Масторсонок каладомо кармасть колхозтнэ. Те кажось токизе Мордовиянтькак. Истя жо – Дубенкань крахмалонь заводонтькак... Шкась таркасонзо а ашти, ды зярыя иень ютазь заводось ушодсь таго важодеме. Полавтовсь лемезэяк. Ней сон «Дубенский» крахмалонь завод. Тевесь кадовсь теке – крахмалонь нолдамось. Нурька шкас пурназельть важодицятне. Покш мелесь, нама, явозель тескень, Орданьбуень, эрицятненень. Весемесь мольсь вадрясто, ансяк аволь кувать. 2011 иень апрелень 13-це чистэ заводонь азорось лоткавтызе предприятиянть важодеманзо.
2017 иестэ Дубенкань крахмалонь заводось таго вельмесь. Сонзэ весе оборудования марто (4 миллиондо) рамизе «Торговая Компания Агротон» ООО-сь. Те компаниясь ашти истямо адресэнь коряс: Россия, Воронежень область, Воронеж ош, Богдановонь ульця, 3 «Б» кудо, 207 офисэсь. Компаниянть прявтсо В.П.Капустин.
Владимир Павлович чачсь 1977 иестэ Белгородонь областень Старый Оскол ошсо. Тесэ тонавтнесь технической лицейсэ, конань прядомадо мейле вете иеть важодсь Осколонь электрометаллургической комбинатсо (ОЭМК). Мейле кундась коммерциянтень. 2016 иестэ теизь «Торговая Компания Агротон» ООО-нть.



– Васня рамсинек-микшнинек велень хозяйствань продукция. Велень хозяйствань предприятиятнес усксинек солярка-мезе, минек эсенек ульнесь бензинэнь усксиця машинанок, – ёвтни В.П.Капустин. – 2010 иестэ ютынь эрямо Воронеж ошов. Коммерческой тевенть седе тов виевгавтомга раминек Дубенкань крахмалонь заводонть.
«Торговая Компания Агротон» ООО-нь прявтонть В.П.Капустинэнь валонзо коряс, Орданьбуе велесэ сынст вастынзе предпринимателень лездыцясь О.В.Ганин.

– Олег Васильевич ванстсь заводонть, аволизь сала цехстэнть оборудованиянть, – ёвтни Владимир Павлович. – Васняяк раминек бульдозер, КамАЗ автомашина. Ванськавтынек предприятиянь вальмалксонть, аравтынек пенгесэ, угольсэ уштомань каштомо, «Ларсэн» фирмань центрифуга ды истя седе тов. Нурькинестэ меремс, заводонть нолдамга ютавтынек 1 миллион целковойть.
Дубенкань крахмалонь заводсонть васня важодсть ниле ломанть, течи тесэ комсь важодицят. Арсематнень коряс, 2020 иестэ важодицятне ламолгавтовить 35 ломаньс.
Тешкстасынек, заводонть важодемань васенце иестэнть, 2017-18 иестэ, уш нолдазель 350 тоннат крахмал. 2018-19 иетнестэ – 1000 тоннат. Продукциянть мельспаросо рамить Отяжелень мясокомбинатось, истя жо ильтяви Ставропольской краев.

Предприятияв модамаренть ускить аволь ансяк Мордовиясто, истя жо Чувашиясто, Пензань, Нижней Новгородонь, Ульяновскоень, Тамбовонь областтнестэ. Арасель истямо тев, штобу модамарень арасьчинь кувалма предприятиясь аштевель тевтеме.
– Минек продукциянок ильтяви Московонь компаниятнес, конат пештнить крахмалонть пачкава. Ютксост – «Лента», «Магнит», «Пятерочка» ды лиятне, – ёвтни Дубенкань крахмалонь заводонь управляющеесь М.Ю.Якшамкин. – Предприятиясонть, Орданьбуенсетнеде башка, важодить Дубенкань, Петровкань, Чеберчинань, Поводелень эрицят.
Михаил Юрьевич тескень, Орданьбуень. Сон важоди предприятиянть теемань васенце шкасто саезь. Валонзо коряс, предприятиясонть парсте важодить «ПГУ-200» (гидроустановкань) операторось Алексей Малкин, костямонь линиянь операторось Николай Суханов, сталмонь-мезень кепсиця тракторонь ветницясь Юрий Еряшев, фасовщикесь Александр Кашкин.

Предприятиясонть важодицятнень зарплатаст 25 тёжат целковойстэ саезь…
…Минь заводонь цехсэнть. Тесэ тевтне лаказь лакить. Чистэ тевс нолдавить 100 тоннат модамарть, эйстэст лиси 10 тоннат крахмал.
Котельнойсэнть оймамонь апак сода важоди Э.А.Буцков.
Совиндерят предприятиянть утомс, косо ванстови продукциясь, сеске редяви азорксчись. Тесэ ванстови байтяк продукция.
Заводонь управляющеенть М.Ю.Якшамкинэнь валонзо коряс, предприятиянть виевгавтомга маласо шкасто путови-аравтови эштё вейке котельной, кона карми уштовомо газсо.

Пётр ЗИНОВЬЕВ.
Эдуард Ретунский
Дубенкань райононь Орданьбуе веле

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».