Неть читнестэ Эрзянь-мокшонь раськень драмань театрасо ютавтозель промкс, кона алтазель Жилищно-коммунальной хозяйствасо роботникень чинтень.
МР-нь Прявтонть В.Д.Волковонь пельде отраслянь представительтненень ды сынст вельде жилищно-коммунальной хозяйствасо важодицянь весе тёжа коллективентень кенярксчинть кувалма поздоровт ёвтась МР-нь Правительствань Председателень полавтыцясь – Жилищно-коммунальной хозяйствань, энергетикань ды эрицятнень гражданской защитань министрась И.А.Чадов.
Сон тешкстызе, течи коммунальной хозяйствасо роботниктневтеме: дворниктеме, цецянь-мезень озавтыцявтомо, эрямо кудонь подъездэнь шлицявтомо, слесартеме, сантехниктеме ды отраслянь лия представительтневтеме – эрямс а кода. Те отраслясь пек сюлмавозь эрьва ломаненть, эрьва семиянть марто. Сынст тевест сюлмавозь ломаненть эрямонь условиянзо вадрялгавтоманть марто.
И.А.Чадовонь валонзо коряс, ЖКХ-со покш мель явови национальной проекттнэнь эрямос совавтомантень. Ютксост – «Жилье и городская среда», «Чистая вода» национальной проекттнэ. Мелят 349 эрямо кудотнесэ витнезельть лифттнэ. 2020 иестэяк те тевесь поладови, арсеви витнемс 227 лифтт. Эрямос совавтови аварийной кудосто ютамонь проектэсь. Истя, мелят эрямо таркаст вадрялгавтызь зярыя сядот семиятне.
Министрась И.А.Чадов сюкпря ёвтась весенень, кие алтызе эрямонзо жилищно-коммунальной хозяйствань отраслясо важодемантень, эдь сынь теить ломантнень эрямонть ваньксэкс, лембекс ды валдокс. Текенень, отраслянь ламо представительтне важодить кенярксчитнестэяк, оймсема читнестэяк.
Ламо лембе валт ёвтазельть ЖКХ-нь отраслянь ветерантнэнь лемс. МР-нь Прявтонть В.Д.Волковонь пельде сыненст максозельть цецят ды питней казнеть.
Жилищно-коммунальной хозяйствань сферань представительтненень кенярксчинть кувалма МР-нь Госсобраниянь Председателенть пельде поздоровт ёвтась сонзэ полавтыцясь Иван Москаев.
Кенярксчистэнть жилищно-коммунальной хозяйствань отраслясо ламо важодицятненень максозь государственной казнеть. Кенярксчись прядовсь концертной программасо, конань анокстызь республикань творческой коллективтне.
Пётр ЗИНОВЬЕВ