Среда, августа 05, 2020
Важное

Коень коряс, аштемковонь колмоце недлячистэнть минек масторсо тешкстави медицинасо важодицятнень чись. Тедеде те кенярксчинтень путови башка смусть: врачтне, медсестратне, фельдшертнэ, медицинасо весе важодицятне – неень шкань алкуксонь геройть, сынь весе виест путыть коронавирусонь од инфекциянть каршо бороцямонтень, идить ломантнень эрямост, лиясто эсест пряст апак вансто.
 Покш чинть каршо Республикань Кудосо ютавтовсь кенярксчинь промкс. Тедеде сон ветявсь коронавирусонь од инфекциянть марто сюлмавозь весе вешематнень топавтозь. Весе тердезетне ды инжетне ютасть тестт.

Видеосвязенть вельде кенярксчинь промксонтень вейсэндявсть ниле больницят, медицинань учреждениянь 50 ламо важодицятне кунсолость поздоровтнень онлайн лувсо.

Мордовиянь Прявтось Владимир Волков, поздоровонь валтнэнь ёвтамсто тешкстызе, тедеде те кенярксчинть седеяк покш смустезэ.
– Монь туртов покш мельспаро вастовомс мартонк – минек шкань алкуксонь геройть, – мерсь Владимир Волков. – Ютасть 12 недлят, кода республикасонть тешкстазельть коронавируссо васенце кавто сэредицятне. Неть колмо ковтнень перть врачтненень савсь топавтомс пек покш важодема.

Эпидемиянть ушодовомантень Мордовиясо ульнесь ансяк вейке инфекционной больниця. Ней ковидэнь госпиталекс ютавтозь лецямонь 17 учрежденият. Теезь малав 2 тёжат инфекционной таркат. Пурназь домка содамочить инфекциянть лецямонь коряс, улить эрявикс весе лекарстватне. Ней минек здравоохранениянь ёрокчись-виевчись лездыть бороцямс эрьва эрямонть кисэ, сехте стакасто сэредицятнень кисэ.

Секскак, весе стакачитнень лангс апак вано, минек здравоохранениянь системась цидярдынзе неть мелявкстнэнь. Цидярдынзе минек врачтнень, медсестратнень, медицинань лезксэнь куроксто явомань службань важодицятнень, больницянь, лабораториянь, поликлиникань, ФАП-нь весе сотрудниктнень, аволь штатной специалисттнэнь профессионализмаст ды кочказь тевентень весе виест максоманть вельде. Покш сюкпря тенк! Минь сеске чарькодинек: бути а лездатано, а ванстсынек медицинань важодицятнень, сестэ ёмавтсынек весементь. Ды аволь стяко Россиянь Президентэсь В.В.Путин кемекстась пандомс башка ярмакт медицинасо важодицятненень.

Федеральной ды республикань стимулирующей пандоматне уш явозь 4700 медроботниктненень, тень лангс ютавтозь пель миллиард целковойть. Рамсезь индивидуальной ванстомань средстват: ванстомань костюмт, респираторт, маскат, перчаткат, очкат.

– Теде башка, эряви видестэ ладямс важодеманть медучреждениятнесэ. Секскак мон пшкадян прявт врачтненень: ванстодо эсь сотрудниктнень, уледе мартост вейсэ, лездадо витемс весе стакачист, – мерсь республикань Прявтось. – Течинь чинтень кавтосядто ламо минек медицинань важодицятне сэредить коронавирусонь инфекциясо. Покш ризксэс, 6 специалисттнэ, лиятнень идемстэ, «палсть» сынсь. Те покш ёмавкс весень туртов. Минек тевенек – ванстомс сынст лемест ды тевест, лездамс семияст туртов. Ды аволь ансяк ней, седе товгак. Сюконян медицинань весе важодицятнень икеле.
Кулозь медицинань важодицятне ледстязельть чатьмонень минутасо.
– Врачтнень-реаниматологтнень виест вельде топавтозь алкуксонь дивань тевть, зярдо, марявсь, мезеяк уш а лезды, – тешкстызе Владимир Волков. – Истя, невтемакс, С.В.Катков лемсэ больницясонть сэредицясь цела ков ульнесь ИВЛ-нь аппаратсонть (токазельть пеледест ламо тевелявонзо). Стационарсо 42 чинь перть лецямодо мейле сон пичкась ды нолдазь кудов!

Пандемиянть шкасто коронавируссо сэредицятненень теезь 48 экстренной операцият, ютксост эйкакшткак.
– Ёвтан сюкпря алкуксонь, профессиональной важодеманть кисэ Республикань клинической больницянь, С.В.Катков лемсэ больницянь ды Республикань эйкакшонь больницянь врачтненень-хирургтненень, – мерсь Мордовиянь Прявтось. – Башка тевть путозь Рузаевкань больницянь специалисттнэнь лангс. Тосо чачтыть коронавируссо сэредиця аватне. Кеняркс марто ёвтаса, те шканть перть тосо чачсть 6 эйкакшт (2 цёрынькат ды 4 тейтерькат). Сюкпря Пазонтень, весе эйдетне шумбрат. Аватненьгак ёжост вадрят.

Сюкпрянь башка валт Владимир Волков ёвтась васенце звенань ды медицинань лезксэнь куроксто явомань службань важодицятненень, участковой врачтненень, фельдшертнэнень, медсестратненень, машинань ветницятненень. Сынст важодемаст кассь зярыяксть.
– Кемтяно, тевтне вадрялгадыть. Эряви эскельксэнь эскелькс вельмевтемс аравтлувонть коряс медицинань лезксэнь явомань покшолматнень, велявтомс «Здравоохранение» нацпроектэнь тевтненень, одкстомтомс инфраструктуранть. Тедеде панжинек эйкакшонь од поликлиника Химмашсо, поликлиника «Юбилейный» микрорайонсонть. Панжиковсто эрязасто кундынек Республикань эйкакшонь больницянь хирургиянь од корпусонь строямонтень. Оснащениянть коряс сон карми ладямо Московсо Морозовской эйкакшонь больницянтень. Сы иестэ панжови онкодиспансерэнь од поликлиникась. Те объектэсь пек учовиця. Истя жо арсеви витнемс онкологиянь диспансерэнь зданиянть. Теде башка, строяви эйкакшонь поликлиника Рузаевкасо, покштнень туртов поликлиника Саранскойсэ, стационар ды поликлиника Краснослободскойсэ ды зярыя лия объектт. Тешкстаса, нацпроектэнть вельде тедеде республикантень пачтязь медицинань од техника.

Здравоохранениянь материально-технической юронь кемекстамось поладови. Аштемковонть прядовомс КТ-нь кавто од аппаратт путовить С.В.Катков лемсэ больницянтень ды Рузаевкань больницянтень. Эштё вейке од КТ путозь Республикань инфекционной больницянтень. Истя жо учовить ЭКМО-нь аппарат, 21 ИВЛ-т. Велетнесэ важодеманть туртов рамазь мобильной 9 маммографт ды таркасто таркас усксевиця стоматологиянь 4 кабинетт.
Кенярксчинь промксонтень пурнавозетненень видеоконференциянть вельде сюлмавсть Республикань инфекционной больницясь, Рузаевкань больницясь, С.В.Катков лемсэ республикань больницясь, Торбеевань больницясь.

Мордовиянь Прявтось ёвтась лембе валт медицинань весе важодицятненень алкуксонь тевдееманть кисэ.
– Покш сюкпря тенк! – мерсь Владимир Волков. – Содадо: тынь аволь ськамонк, мартонк весе Мордовиясь! Ды минь карматано тееме весементь тыненк лездамга.
Медицинань важодицятненень поздоровт истя жо ёвтась республикань здравоохранениянь министрась Олег Маркин.

– Врачтне, медсестратне, фельдшертнэ ванстыть эрицятнень сехте питнеест – шумбрачист. Лецицятнень тевест седеяк пек редяви ней, коронавирусонть каршо бороцямонь шкастонть. Эрьва чассто ашо халатсо ломантне, лиясто эсест эрямост апак вансто, теить весементь сэредицятнень идемга, – мерсь Олег Маркин.

Кенярксчинь промксонть лувсо медицинань ламот важодицятненень максозь покш казнеть. Профессионализманть, кочказь тевентень видечинть ды коронавирусонь од инфекциянть каршо бороцямонть шкасто весе вийтнень путоманть кисэ.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».