АПРЕЛЕНЬ 28-це ЧИСТЭ САРАНСКОЙСЭ ЮТАВТОВСЬ КЕНЯРКСЧИНЬ ПРОМКС, КОНАСЬ АЛТАЗЕЛЬ МЕДИЦИНАНЬ ЛЕЗКСЭНЬ КУРОКСТО МАКСОМАНЬ СЛУЖБАНЬ ВАЖОДИЦЯНЬ ЧИНТЕНЬ. ПРОФЕССИОНАЛЬНОЙ КЕНЯРКСЧИНТЬ КУВАЛМА МЕДИКТНЕНЕНЬ ПОЗДОРОВТ ЁВТАСЬ МОРДОВИЯ РЕСПУБЛИКАНЬ ПРЯВТОСЬ АРТЁМ ЗДУНОВ.
Ледстясынек, кенярксчись кемекстазь 2020 иестэ Россиянь Президентэнть Владимир Путинэнь мелензэ коряс. Самай сестэ медицинань лезксэнь куроксто максомань службань важодицятнень лангс путозель покш сталмо, конась сюлмавозь коронавирусонь кезовонь пандемиянть марто.
«Течи минь ёвтатано поздоровт службань ламот специалисттнэнень: врачтненень, фельдшертнэнень, медсестратненень, диспетчертнэнень ды машинань ветицятненень. Тынь васенцекс ушодтадо бороцямо стака орматнень каршо, явтадо лезкс ДТП-с ды апак учонь лия зыянов тевтнес понгозтненень. Ломантне оймсить, ансяк медицинань лезксэнь куроксто максомань службась важоди свал – тынь аштетядо передовойсэ», – пшкадсь пурнавозтненень Артём Здунов.
Сон тешкстызе, коронавирусонь пандемиясь тень вадрясто невтизе. Мордовиянь медицинань лезксэнь куроксто максомань службасонть важодить малав тёжа ломанть. Весенень сыненст пандемиянть шкасто савсь важодемс эсь пряст апак вансто, весе виест макссть республикань эрицятнень шумбрачист ды эрямост ванстомантень. Службанть лангс путозь сталмось кассь зярыяксть – ансяк 2020 иень ноябрясто тердематне ламолгадсть 5,5-ксть.
«Ней пандемиясь макссь тенек аламос лекстямс. Те лездась велявтомс свалшкань важодемантень: ютавтомс витнемань тевть лецямонь учреждениятнесэ, косо ульнесть ковидэнь госпитальтне, путомс эрявикс оборудования, неть больницятне совасть федеральной программатнес. Карматано ветямо диспансеризациянть», – мерсь Артём Здунов.
Мордовиясо покш мель явови эрицятнень медицинань обслуживаниянтень: «Здравоохранение» нацпроектэнть лувсо ветяви поликлиникатнень витнемась, оборудованиянь рамамось, вете иетнень перть одкстомтозь автопаркось – республикав пачтязь 100 ламо од машинат. Панжозь республикань онкологиянь од поликлиникась ды эйкакшонь больницясь. Маласо шкастонть эйкакшонь од поликлиника строяви Рузаевкасо.
«Тынк важодемась пек стака! Медицинань васенце лезксэнть явомсто эрявить аволь ансяк профессиональной содамочить, истя жо эряви содамс психологиянть. Сюкпря тенк цидярдоманть ды весе вийтнень путоманть кисэ. Сюкпря важодеманк кисэ ды арсян ванстомс аволь ансяк пациенттнэнь шумбрачист, истя жо эсенк ды тынк семиятнень!» – мерсь Мордовиянь Прявтось.
Республикань Прявтось явшесь государственной казнеть республикань медицинань лезксэнь куроксто явомань службань эрьва кодамо ёнксонь специалисттнэнень: «За самоотверженный труд» отличиянь тешкст, Мордовия Республикань Почётонь грамотат ды МР-нь Прявтонь Благодарностть. «Заслуженный врач Республики Мордовия» лемесь максозь Саранскоень Медицинань лезксэнь куроксто максомань станциянь подстанциянь заведующеентень Светлана Аникинанень ды Саранскоень Медицинань лезксэнь куроксто максомань станциянь врачонтень Ольга Елховикованень.
Медицинань лезксэнь куроксто максомань службасонть Светлана Аникина важоди колоньгемень иеть, тешкстызе: «Важодемань иетнень перть мон вестькак эзинь янксе кочказь кинть кувалма. Весемесь секс, лавтовдо лавтовс монь марто свал важодсть покш профессионалт, конат свал анокт лездамс».
«Заслуженный работник здравоохранения Республики Мордовия» почётонь лемесь максозь Орданьбуень ды Теньгушевань райононь больницятнень медицинань лезксэнь куроксто явомань службань фельдшертнэнень Татьяна Иванованень ды Елена Кошелеванень.
Пурнавозтненень пшкадемстэ Мордовиянь Здравоохранениянь министрась Олег Маркин мерсь: «Кавто иетнень перть медицинань лезксэнь куроксто максомань бригадатне якасть малав 500 тёжат тердематнес, эрьва колмоцесь ульнесь ковидэнь. Сюкпря тенк, коллегат, профессиянтень кемевиксчинть, тынк панжадо ойметнень кисэ!»
Медицинань лезксэнь куроксто максомань службань важодицятненень казнеть истя жо явшесть Мордовия Республикань Правительстванть, Госсобраниянть, Здравоохранениянь министерстванть ды Мордовиянь Врачтнень региононь ассоциациянть пельде. Тесэ, «Ассоциация врачей Мордовии» региононь общественной вейсэндявксонь прявтось Анатолий Пинямаскин тешкстызе, течинь чине Мордовиянь весе врачтне совить Ассоциациянтень.
Истятнэнь ютксо Саранск ошонь Медицинань лезксэнь куроксто максомань станциянь врачось, Мордовиянь Врачтнень региононь ассоциациянь членэсь Марина Алексеевна Кадоркина. Врачокс Марина Кадоркина важоди вете иеть, сась сеске Н. П. Огарёв лемсэ МГУ-нь Медицинань институтонть ды интернатуранть прядомадо мейле. Сонсь тейтересь чачсь-кассь Чаунзабуень Медаева велесэ. Кода корты, кармамс врачокс кортызь тетязо-авазо.
– Мон кода-бути эзинь арсекшне врачокс улемадо, – корты Марина Кадоркина. – Тетям-авам жо кортымизь. Истя молинь тонавтнеме эсенек региононь Медицинань институтс. Тонавтнемам прядыя ды интернатурас понгинь Медицинань лезксэнь куроксто максомань станцияс. Ды тоско кадовиньгак. Вете иеть уш вана ютасть.
Ды, тейтеренть валонзо коряс, неть вете иетнень перть тердематне ульнесть ламо ды эрьва кодат.
– Минек эйсэ тердекшнить эрьва кодамо зыянсто. Ломанесь ормалгадсь, понгсь зыянс, лиссь ДТП эли лия тев. Минек тердить васенцекс. Ды медицинань лезксэнь куроксто максомань врачтнень эйстэ ашти пек ламось, – ёвтни Марина Алексеевна. – Нама, эрси стака, эрси пелема. Пелема сень коряс, сатыть-арась виеть лездамс ломанентень. Зярдо жо тон максат эрявикс лезкс, пачтят ломаненть больницяв ды пачтясак живстэ – те истямо уцяска, истямо кеняркс ломаненть кисэ ды эсеть кисэяк, эдь тон идить эштё вейке эрямо!
Вадря важодеманть кисэ Марина Кадоркина тешкставсь Мордовиянь Врачтнень региононь ассоциациянь Почётной грамотасо.
Юлия Еремина