Даволковонь 6-це чистэ Мордовиянь Прявтонь тевтнень топавтыцясь Артём Здунов якась Покш Березникень районов. Тесэ ваннызе, кода важоди «Специальное управление гражданской защиты» Мордовия Республикань ГКУ-нь тонавтомань-методической куншкакурось. сон ашти гражданской оборонань специалисттнэнь анокстамост туртов тренировкань базакс.
Мордовиянь Прявтонь тевтнень топавтыцясь истя жо ваннызе экспозициянть, конась алтазь Сурань ванстомань рубежентень. тей пурназь экспонатт, конат ёвтнить республикань эрицятнень важодемань подвигтест.
Седе тов Артём Здунов Покш Березниксэ якась «Теремок» эйдень кужов. 2019 иестэ тесэ строязь 60 таркас эштё вейке корпус. Сон ваннынзе актовой ды спортивной залтнэнь, группатнень, медпунктонть, истя жо кортась тонавтыцятнень марто, кармась содамо: эйдень кужосонть улить коштонь рециркуляторт.
Целанек дошкольной учреждениянть важодемась Артём Здуновонь мельс тусь – ули малав весемесь эйкакштнень кастомаст-тонавтомаст туртов, истя жо теезь нупаль беряньстэ якиця эйдетнень туртов, ансяк вана строямонь тевтне аволь весе таркатнесэ топавтозь парсте. Потолоксо штукатуркасонть уш неявить лазовкст, линолеумось таркань-таркань пувавсь. «Тердинк подрядчикенть ды кадык весементь витьсы! Тесэ эштё ламо иеть весемесь улезэ мазый!» – мерсь Артём Алексеевич Покш Березникень райононь прявтонтень Иван Игоновнень.
Гарт велесэ сон якась Ирина Кочинань крестьянонь-фермерэнь хозяйствав. Фермерэсь касты сомт. КФХ-сь теезь 2019 иестэ. «Агростартап» программанть коряс тензэ явозь грант малав 3 млн. целковоень покшолмасо. Артём Алексеевич ваннызе калонь ферманть, кевкстнесь, ков ды кода миеви продукциясь.
Мордовиянь Прявтонь тевтнень топавтыцясь истя жо якась «Вл. Марьяновский» спиртэнь заводов.
Седе тов Артём Здунов содавтызе Покш Березникень культурань-оймсемань куншкакуронть, конась витнезель 2019 иестэ «Культура» нацпроектэнть лувсо. Ней ДК-сонть улить гончаронь ды ремеслань коряс мастерскойть, стамонь мастерской, ИЗО-студия, эйкакшонь налксемань нупаль, тренажёр марто физкультурань зал, хореографиянь ды театрань студият. ДК-нть юрсо важодить клубонь комськотово кужинеть. Эрьва иестэ художественной самодеятельностень коллективтне яксить весероссиянь, регионъютконь, республикань мероприятиятнес, сайнить казнень таркат.
2020 иестэ «Культура» нацпроектэнть лувсо культурань-оймсемань куншкакуронтень явозь 5 млн. целковойть. Неть ярмактнень лангс кинозалонть туртов рамазь кинопроекциянь, кассань оборудованият ды кинотеатрань креслат. Кинов билетэнть питнезэ сядо целковойть.
Спортивной залсонть А.А. Здунов кортась од бороцицятнень марто, конат невтизь тензэ кедьвийсэ бороцямонь приёмтнень ды энялдсть рамамс бороцямонь ковёр. Сон макссь покш питне спортсментнэнь изнявкстнэнень ды алтась: ковёрось карми!
Покш Березникень районсо улемстэ Артём Здунов истя жо якась Парынзэлев. Те велесь содавикс раськень койтнень ванстомань коряс ушодкстнэсэ. 2016 иестэ те ёнкссо чачозесь Евгений Ледяйкин ды Парынзэлень, Бозаёвань ды Раужо Промзань эрицятне тейсть-пурнасть «Од веле» общественной организация ды анокстасть неть велетнень кастомань-кепетемань коряс программа. Колмо проекттнэнень явозь ярмаконь лезкс Президентэнь грантонь фондстонть. 2019 иестэ Евгений Ледяйкин пурнась-панжсь велень музей.
Мордовиянь Прявтонь тевтнень топавтыцясь кортась Евгений Ледяйкин марто те ёнксонть седе тов виевгавтомань ды туристтнэнь тердемань коряс арсематнеде. Грантонь ярмактнень лангс тесэ арсеви строямс кудоюрт, кастомс-кепетемс раськень ремеслатнень, панжомс туристтнэнь туртов вишка гостиница, теемс нурдосо ардтнемань ки. Покш арсемаст предпринимательтненьгак.
Евгений Ледяйкин ёвтнесь: веленть вельмевтемань проектэнть анокт кирдемс те ёнкссонть чачозь лия ломантнеяк, конат ней эрить лия регионтнэсэ, ды энялдсь лездамс теемс ки туристэнь объектэнть видьс. Региононь Правительствань Председателень полавтыцянтень – Велень хозяйствань ды продовольствиянь министрантень Владимир Сидоровнень кармавтозь совавтомс Парынзэлень туристэнь объекттнэнь федеральной программатнес, истя жо велень территориятнень виевгавтомань коряс, конатнень вельде мереви вадрялгавтомс социальной инфраструктуранть.
Парынзэлесэ Артём Здунов истя жо якась велень клубов, конась мелят педе-пев витнезь «Культура» нацпроектэнть лувсо. Витнемадонть мейле тесэ панжозь Ремеслань куншкакуро, косо невтезь викшницятнень ды кодыцятнень важодевксэст. Велень клубсонть важодить кемгавтово кужинеть: «Парынза» фольклоронь ансамблясь, «Родники», «Рябинушка», «Вдохновение» ансамблятне, декоративно-прикладной шкинемань кужинетне.
Тедеде велень клубось учи 500 тёжат целковойть, конат явовить «Единой Россиянь» «Местный Дом культуры» проектэнть коряс. Неть ярмактнень лангс велень клубсонть арсеви панжомс «Центр долголетия»: рамамс велотренажёрт, фитнес-оборудования.
Артём Алексеевич макссь покш питне Парынзэлень эрицятнень топавтозь проекттнэнень ды арсесь тенст изнявкст од цётавкстнэнь саемасо, конат сюлмавозь те ёнкссонть туризмань виевгавтоманть марто.
Татьяна Иконникова