Мордовиянь Прявтонь тевтнень топавтыцясь Артём Здунов чадыковонь 17-це чистэ содавтызе Дубенкань енксонть. Сон ваннынзе велень хозяйствань ды промышленностень предприятиятнень, кода молить строямонь тевтне китнень лангсо ды ЖКХ-нь объекттнэсэ.
А.А.Здуновонь важодемань программань васенце пунктокс кармась площадкась, косо тедеде ушодови «Магма-Цемент» ООО-нь цементэнь заводонь строямось. Проектэнть арсеви топавтомс 5 иес, предприятиянть виензэ кармить 1 миллион 200 тежат тоннат иезэнзэ. Производствасонть теевить 150 важодемань таркат.
Артём Здунов кортась предприятиянь руководстванть марто строямонть ушодоманзо марто сюлмавозь кевкстематнеде.
Кочкурова велесэ школанть каршо ушодозь спортонь од площадканть строямось. Кода ёвтнесь Дубёнкань райононь прявтось Виктор Нефёдов, велень территориятнень комплексной виевгавтоманть коряс тесэ теевить кавто паксят: вейкесь футболсо налксемань искусственной вельтявкс марто, лиясь – волейболсо ды баскетболсо налксемс. Проектэнть питнезэ – 8,5 млн. целковойть. Ней ванськавтови площадкась ды анокстави юрось. Тевтне топавтовить сы иень умарьковонь 1-це чинтень.
Артём Алексеевичнень истя жо невтизь Поваделе велесэ Культурань кудонь проектэнть. Сон кевкстнесь строямонь материалтнэнь пачтямодост. Кшнинь конструкциятнень арсить рамамс лия регионсто. Республикань руководителесь эштё весть ледстизе, стройматериалтнэнь рамсема тескень производительтнень кедьстэ. Тешкстасынек, те уш аволь васенце тев, зярдо Артём Здунов явовты тень лангс мель.
Мордовиянь Прявтонть тевтнень топавтыцясь ваннынзе велень хозяйствань зярыя объекттнэнь.
Васенцекс якась Виктор Афонькинэнь крестьянско-фермерской хозяйствантень. Малав 800 гектартнэ видевить сюросо ды тикшесэ, истя жо модамарьсэ. 2020 иестэ кастсть 600 тоннат модамарь ды малав 2 тежат тоннат сюро.
Велень хозяйствасо коромокс кармасть андомо ванськавтозь ды керьсезь модамаренть. Артём Здунов КФХ-нь руководителентень мерсь ванномс районсонть истямо производствань нолдамонь кевкстеманть. МР-нь Правительствань Председателень тевтнень топавтыцясь Владимир Сидоров пачтясь, велень хозяйствань министерствась анок максомс грантонь лезкс проектэнь топавтомантень.
Седе тов Артём Здунов якась «Магма ХД» ООО-в. Тесэ кастыть кснав. Те культуранть алов районсонть явозь 8300 гектарт. Артём Здунов примась участия видемань кампаниянть ушодомасо, ардсь тракторонь кабинасо механизаторонть марто вейсэ. «Техникась вадря ды неень шкань, арды састо. Куш Ульяновской областенть видьс модатнень видть», – пейдезевсь сон.
Артём Здунов Дубенкань енкссо улемстэ ваннызе Поваделе велесэ водопроводонь строямонть. Проектэсь топавтови «Комплексное развитие сельских территорий» государственной программанть лувсо. Трубопроводонть кувалмозо ули 6,8 вайгельпеть. Важодематнень питнест – 20,9 млн. целковойть, сынст эйстэ 20,5 млн. – федеральной ярмакт. Строямонь васенце этапонть, аравтлувонть коряс, арсить прядомс те иень умарьковонтень. Важодемась жо, кода тешкстызе Артём Здунов, моли графикень икельдязь. Сон кармавтсь а таргсемс шканть, панжомс объектэнть строямонь тевтнень прядомадост мейле. «Объектэсь пек эряви веленть туртов, ломантне сонзэ учить!» – тешкстызе Артём Здунов.
Важодемань содавтома марто улемстэ, Артём Здунов ваннызе, кода Дубенкань райононь центрасонть моли общественной од тарканть строямось. Те тевенть ушодызь «Жильё и городская среда» национальной проектэнть лувсо. Тесэ вадрялгавтсызь-мазылгавтсызь прявт площадканть, ацыть брусчатка, озавтыть газон ды цецят. Эрицятнень ды инжетнень оймсемаст туртов путыть эрьва кодат эземть ды нурсемат. Эйкакштнень туртов путыть карусельть ды налксемань площадка. Важодемась прядови те иень умарьковонь 1-це чинтень.
Те тарканть маласо ашти микшнемань комплекс. Артём Здунов тешкстызе, зданиянть ушо ёнксось аволь мазый. «Тесэ карми оймсемань тарка. Истямо мазычи теить! А ломантне кармить ваномо те зданиянть лангс? Те а тев. Пурнадо административной комиссия ды ваннынк те кевкстеманть», – кармавтсь Артём Алексеевич.
Артём Здунов ваннынзе китнень строямонть. Тедеде районсонть витневить зярыя китне ды сэдесь.
Истя, «Безопасные и качественные автомобильные дороги» национальной проектэнть лувсо витнемань тевтне топавтовить кинь колмо пелькстнэсэ, конат вейсэндить Отяжбуе поселканть Дубенка веленть марто.
МР-нь Прявтонь тевтнень топавтыцясь истя жо ваннызе Орданьбуе велесэ Ахматовка леенть трокс строявиця сэденть. Ледстясынек, 2018 иень ожоковсто тесэ 50 тоннадо стака автомобилесь яжинзе опоратнень ды вельтявксонть.
Неень шкане ташто сэдесь яжазь, путозь од опорат. Тедеде прядсызь сэдень полотнань путоманть, теить барьерт ды пирявкс, истя жо яжасызь объездной кинть. Проектэнть питнезэ 30 миллионт целковойде ламо. Сэденть ланга ардоманть арсить нолдамс панжиковонь 25-це чиденть мейле.
Артём Здунов якась Орданьбуе велев, косо ваннызе социальной куншкакуронь важодеманть, сон строязь «Устойчивое развитие сельских территорий» программанть коряс. Те проектэнть лувсо Орданьбуень велень поселениясонть 2017-2018 иетнестэ строязь спортонь площадка, вадрялгавтозь паркось, од курованть ветязь газ, ки, ведь.
Социальной куншкакуросонть важоди велень поселениянь администрациясь, фельдшерэнь-акушерэнь пунктось, велень библиотекась, музыкань ды киштемань класстнэ, музеесь, 160 таркас актовой зал марто велень клубось. Клубсонть ютавтневить концертт, массовой мероприятият, эрьва кодат кужинеть, дискотекат, пелькстамот. Кода евтнесть республикань руководителентень, тосонь велень администрациянь прявтось Алёна Еряшева, Орданьбуе веленть каштанчикс аштить «Эрзянь ава», «Лейне» ансамблятне.
А.А. Здунов кортась художественной самодеятельностень участниктнень марто, истя жо од артисттнэнь марто, макссь питне кедьчелькев ломантнень теевкстнэнень, теевсь содавиксэкс раськень ярсамопельтнень марто. Республикань руководителенть андызь «норовжорчто» – постной чапакссто панезь нармунть, коень коряс сынь паневить Ине постонть шкасто. Кезэрень коенть коряс, «норовжорчтнень» потс азораватне кекшить «салавачить». Мордовиянь Прявтонть тевтнень топавтыцясь потстонзо мусь трешник. «Те невти, иесь республиканть туртов карми вадря!» – мерсть велень эрицятне.
Артём Здунов истя жо якась «Хорошее дело» ды «Магма» компаниятнень группань предприятиятнес.
«Хорошее дело» агрогруппась касты ракшат, видни сюрот, тикше. Келейстэ невтезь ловсонь енксось. 2017 иестэ саезь ветяви «Дубенский» ловсонь комплексэнь строямось (6400 скалс). Проектэнть виезэ карми 52 тежат тоннат ловсо иезэнзэ. Панжовить 130 важодемань таркат. Строямонь тевтнень арсить прядомс 2023 иестэ. Комплексэнтень совить скалонь кирдемань 6 корпус, 2 потявтомань залт ды вазонь кирдемань 7 корпуст. Весе продукциясь пачтяви «Мечта» эсест перерабатывающей комбинатонтень. Те предприятиянть миемань рынкась – Россиясь ды СНГ-нь мастортнэ.
Артём Алексеевич ваннызе уш панжозь корпусонть ды кортась важодицятнень марто. Ней тесэ важодить 43 ломанть. «Веленть туртов зняро вакансият – те пек паро. Сехте прявтось жо – важодеманть кисэ пандост вадря зарплата. Сестэ ломантне кармить кадовомо эрямо ды важодеме эсест тиринь велетнес», – тешкстызе региононь руководителесь
МР-нь Прявтонть тевтнень топавтыцясь истя жо ваннызе «Магма Керамик» предприятиянть. Тесэ нолдыть зярыя видэнь ды тюсонь кирпецть, кев ды брусчатка. Сынь пачтявить РФ-нь 50 регионтнэс. Те кирпецесь пек эряви частной кудотнень строямсто. Предприятиянть ванномадо мейле Артём Здунов вастовсь «Хорошее дело» ды «Магма» ГК-нь прявттнэнь советэнь председателенть Сергей Сиушов марто.