Неть читнестэ Анапа ошсо «Смена» эйкакшонь центрасо ютась Россиянь Од ломанень союзонь фестиваль, косо эсь пряст невтизь Мордовиянь тейтертне ды цёратне, конатне совить Мордовиянь Од ломанень центрантень.
2021 иень сентябрясто саезь те иень апрельс сынь ютасть «Мы Вместе: Разные. Смелые. Молодые» марафон, анокстасть заданиятнень лангс каршо валт, ёвтнесть тиринь ёнкстонть, сехте содавикс таркатнеде ды ломантнеде, эрзянь ды мокшонь ярсамопельтнеде.
Марафононть ютамодо мейле изнясть 40 командат, конатнень ютксо Мордовиянь «молодежкась». Тов совасть кемнилее ломанть: Биккулова Яна, Ежова Кристина, Волкова Софья, Федосеева Александра, Исайкина Алиса, Карнишина Ирина, Чубуков Игорь, Киселева Екатерина, Новикова Мария, Хомякова Софья, Вешнякова Елизавета, Радайкина Олеся, Петрунина Анастасия, Казанцев Ярослав. Кавто недлят сынь бажасть ёвтнемс вейкест-вейкест туртов эсь региондонть, невтнемс мастер-класст, ды аволь умок ёвтазельть марафононь изницятне.
Тематне весе сюлмавозельть тедеде тешкставиця Россиянь Раськетнень культурань сюпавчитне иенть марто. Васенце таркас лиссь Самарань ёнксось, Мордовиясь – омбоце таркасо. Колмоцесэнть – Томскоесь. Минек командась истя жо саекшнесь мартонзо республикань тешкст: флаг, газетат, журналт, ярсамопельть, някат, викшнезь нардамот, оршамо- ды карсемапельть. «Эрзянь правдаськак» ильтякшнось Весероссиянь фестивалев газетань зярыя экземплярт, конатнесэ мазылгавтозель Мордовиянь палаткась, ды сынь мейле явшезельть регионтнэнь участниктнень туртов вейсэ минек «сгущенканть» ды лимонадонть марто.