Августонь 2-це чистэ ютась МР-нь Госсобраниянь сисемеце тердемань 26-це сессиясь. Эйсэнзэ важодсь Мордовиянь Прявтось Артём Здунов. Ваннозельть кемголмово кевкстемат.
Васняяк Мордовиянь Прявтось Артём Здунов пшкадсь пурнавозтненень. «Минек лемс сась Сюкпрянь сёрма РФ-нь Счётной палатань председателенть пельде, конась алтави МР-нь Счётной палатань председателентень Николай Сергеевич Ларьковнень. Ёвтан тензэ поздоровт те казненть кувалма. Сон максови Россиянь Счётной палатанть марто важодеманть виевгавтоманзо кис», – мерсь Мордовиянь Прявтось.
Сессиясонть примазель «О внесении изменений в Закон Республики Мордовия «О республиканском бюджете Республики Мордовия на 2023 год и на плановый период 2024 и 2025 годов» МР-нь Законось. 2023 иестэ доходтнэнь покшолмаст кастовсь 1,375 млрд целковойс. Сынь туить китнень витнемс, льготань коряс нолдавиця ормаменькстнэнь, Рузаевкань эйкакшонь поликлиникантень од оборудованиянь рамамс, уроз эйкакштненень эрямо таркань рамамс ды ламо лияс.
Истя жо ульнесть башка поладомат МР-нь налогонь коряс законтнэс.
Теде башка, примазель «О постинтернатном сопровождении отдельных категорий граждан в Республике Мордовия» Мордовия Республикань Законось, конань анокстызе Мордовиянь прокурорось. Те закононть коряс максови васень лезкс уроз эйкакштнень интернатто мейлень эрямо лувонь ушодомасо.
Совавтозь полавтомат «О регулировании отдельных вопросов в области обращения с животными на территории Республики Мордовия и наделении органов местного самоуправления государственными полномочиями Республики Мордовия по организации мероприятий при осуществлении деятельности по обращению с животными без владельцев» МР-нь Закононь 3-це статьянтень. Документэсь кемексты вешемат кудонь ракшатнень кирдемга.
2023 иень маень 2-це чистэ РФ-нь Президентэнть Кармавтоманзо коряс Од ломанень кенярксчинь тешкстамонь чикс ловома июнень меельце субутанть. Тень марто совавтозь полавтомат «О государственном регулировании розничного оборота алкогольной продукции на территории Республики Мордовия» МР-нь Закононь 7-це статьянтень. Примазель «О внесении изменений в Закон Республики Мордовия «О государственном гербе Республики Мордовия» МР-нь Законось, конась келейгавты МР-нь Государственной гербенть тевс нолдамонзо.
Сессиясонть ванновсть лия кевкстематкак.
* * *
Пси кортамот мольсть МР-нь Госсобраниянь сессиясонть «О запрете склонения женщин к искусственному прерыванию беременности на территории республики» закононть коряс. Тешкстасынек, законось примазь. Мордовиясь кармась масторсонть васенце регионокс, косо законодательной уровеньсэ кортасть аборттнэнь каршо.
Законопроектэнть совавтызе региононь Общественной палатась. Сондензэ пачтясь палатань председателесь Иван Капитонов, кона тешкстась, масторсонть демографиянь тевтне кадовить пштикс, ды ёвтась статистикань зярыя невтевкст: Россиясо кемень пекиямотнестэ вететне прядовить абортсо. Колоньгемень иетнень перть, 1991 иестэ саезь 2021 иес, масторсонть теезь 50 миллиондо ламо абортт, ды те частной клиникатнень апак лово.
«Россиясь ловови семиянь, духовной питнейчитнень, семиянь ды эйкакшчинь ванстомань флагманокс, – мерсь «Женщины за жизнь» Семиянтень, авакс улемантень ды эйкакшпорантень лездамонь коряс фондонь президентэсь Наталья Москвитина. – Мордовиясь – икелев молиця регион, кияк эзь тее зняро, зяро тейсь республикась. Течи авантень, конась чачтсь эйкакш, максовить республикань Прявтонть пельде поздоров марто сёрма ды эйкакшонть туртов оршамопельть. Ды уш улить невтевкст: аборттнэ киртявсть 42 %».
Эзизе кирде законопроектэнть ансяк КПРФ фракциясь, сон «кирдевсь», теде сеске сессиясонть яволявтсь местной коммунисттнэнь лидерэсь Дмитрий Кузякин.
Примазь закононть коряс кортась Мордовиянь Прявтось Артём Здунов: «Мордовиясь кармась Россиянь васенце регионокс, косо примасть истямо закон. Те закононть кисэ кеместэ аштицякс кармась «Женщины за жизнь» фондонь руководителесь Наталья Москвитина. Минь умок анокстынек те законопроектэнть примамонтень. Аборттнэнь а нолдамодо мелесь кортавсь общественной организациятнесэ «кругловой стольтнесэ». Минь кепсинек те кевкстеманть республиканть томбале: Россиянь Общественной палатасонть, религиянь вейсэндявкстнэсэ, Государственной Думасо, «Единая Россия» партиясонть. Тевтнень полавтомаст туртов эряви полавтомс федеральной законодательстванть, ансяк ушодомс эряви эсенек эйстэ. Мон ламо марякшнынь, эряви лоткавтомс аборттнэнь, эряви явомс тень лангс мель. Весе те кандтнесь кортамотнень научной эли общественной смусть. Кинень-бути эрявсь саемс смелчи примамс закононть. Мордовиясь саизе смелчинть, депутаттнэ максызь вайгелест те законопроектэнть кисэ. Сюкпря депутаттнэнень, общественной деятельтненень, Наталья Москвитинанень, мельявовикс Зиновий Владыкантень».