Саранск ошсо юты вайгелень максома общественной территориянь кочкамонть коряс, кона витневи-петневи 2025 иестэ «Жильё и городская среда» национальной проектэнь «Формирование комфортной городской среды» проэктэнть лувсо.

Вайгелень максомась поладови апрелень 30-це чинть самс. Теемс тень мереви 13.gorodsreda.ru сайтсэнть ды волонтёртнэнь лезксэст вейльде, конатне неть читнестэ важодить ошонь куротнесэ ды МФЦ-сэ. 

Кодамо лувсо моли вайгелень максомась пачтясть важодиця волонтёрттнэ. Эрицятне жо ёвтызь эсь мелест кочкавт таркатнень коряс.

Волонтёрось, М. Е. Евсевьев лемсэ МГПУ-нь СПО-нь студенткась Вера Поливцева общественной таркатнень кисэ вайгелень максомадонть ёвтнесь Мордовия Республикань МФЦ-в сыцятненень. Сон тешкстызе, сынст важодемась пек эрвикс, эдь ламот эрицятне а содыть ошонь тракатнень вадрялгавтоманть кисэ вайгелень максомадонть. Конатне жо содыть, теемс тень а муить шка. Куш весементь лангс а юты минутаяк.

– Вайгеленть максомга волонтёронтень эряви ёвтамс эсь телефононь номерэнть, козо кучови код (сонзэ пачтяма волонтёронтень), фамилиянть ды лементь. Ды кочкама общественной тарканть. Мезеяк лия а эряви, – тешксты Вера.

Васняяк тейтересь вайгелень эрьва максыцянтень пачтясь витнемань туртов явозь таркатнеде. 

Сынст ютксо Саранск ошонь икелень Военной базань территориясо аштиця Скверэсь, кона ловови гарнизононь зодчествань памятникекс, вечкеви маласо эриця ломантненень. Тесэ сынь оймсить, истя жо тесэ тешкстыть эрьва кодат покш чить. Скверэнь площадесь саи малав вейке гектар, перьканзо аштить Красноармейскоень, Невскоень ды Мордовская куротнень ламо этажос зярыя кудотне. 

Вечкевикс оймсема таркакс ошонь ломантнень туртов истя жо ловови Московская куронь Фонтанной валгома таркась, кона теезель ютазь пингень 80-це иетнестэ. Эйсэнзэ зярыя покш ды вишкине фонтант, конат валгить Советской ульцястонть Саранка леентень. Иень лембе шкатнестэ ды кенярксчитнестэ тесэ важодить сувенир марто палаткат, тесэ жо ютнить ошонь мероприятиятне. Маласонзо аштить администрациянь кудотне, А. С. Пушкин лемсэ паркось ды П. Ф. Рябов лемсэ 1-це № художественной школась. 

Саранскоень сехте покш общественной таркась – Советской площадесь – теевсь ошонть стявтоманзо марто малав вейке шкасто. Тесэ ютавтовить ошонь ды республикань эрьва кодат мероприятиятне. Икелензэ – Республикань Кудось, конань Московонь архитектортнэ теизь лымбаксниця флагонь ёнов молицякс. Ловови ошонь достопримечательностекс. Перьканзо таркась учи витнема ды инфраструктуранть одкстомтома.

Саранск ошонь эрицясь Мария Петровна эзь юта вакска ды максызе эсь вайгелензэ вадрялгавтомань тарканть кисэ.

– Саранск ошсо ламо вадря таркат ютко шкань ютавтоманть ды оймсеманть туртов. Нама, сынст эрявить витнемс ды теемс эштёяк седе мельстуицякс ошонь эрицятнень ды инжетнень туртов. Мон эсь вайгелем максынь Московская куронь Фонтанной валгома траканть кисэ. Сон нейгак пек вечкевикс, витнемадонть мейле жо карми пурнамо эштёяк седе ламо ломанть, – тешкстызе Мария Петровна.