Пельиеде икеле, маень 31-це чистэ, Мордовиясо эсь важодеманзо ушодызе «Защитники Отечества» фондонь филиалось. Ледстясынек, Российской Федерациянь Президентэнть Владимир Путинэнь Указонзо коряс специальной военной операциянь участниктненень лездамга теезель государственной фонд.
Фондонть прявт тевезэ – боевой действиянь демобилизованной ветерантнэнень, истя жо Луганской ды Донецкой народной республикатнесэ милициянть юрс совицятненень (2014 иестэ саезь) государственной эрьва ёндонь лезксэнь максомась. Эштё вейке категориясь – чавовозь боецтнэнь семиятне. Тезэнь кандовить нись эли мирдесь, кемгавксово иеде седе вишкине эйкакштне ды эйкакштне-инвалидтнэ, истя жо тетятне-аватне, конатне тиринь масторонь ванстыцянть чавовома шкантень эрясть мартонзо.
«Защитники Отечества» фондонь региононь филиалсонть важодицятне явовить кавто покш пельксэс: Фондонь эсест специалисттнэ ды социальной министерстватнень специалисттнэ. Омбоцетне важодеманть топавтыть эсь министерстватнесэ ды ведомстватнесэ. А вана Фондонь специалисттнэстэ седе покш пельксэсь – те социальной координатортнэ, конатне неень шкасто улить республикань малав весе районтнэсэ.
Неть читнестэ минь вастовкшнынек «Защитники Отечества» фондонь Мордовиянь филиалонь Покш Игнатовань районга социальной координаторонть Юлия Александровна Бочкаева марто. Сон ёвтнесь СВО-нь ветерантнэнь, участниктнень ды сынст семиятнень марто важодемадонть.
– «Защитники Отечества» фондонь филиалось минек республикасо важодеманзо ушодызе пельиеде икеле. Ансяк вана специалисттнэнь пурнамось-тонавтомась ушодозель икелепелев, – тешксты Юлия Бочкаева. – Фондонть панжомадо кавто ковдо икеле важодицякс саимизь минек, васенце кемень соцкоординатортнэнь, конатненень эрявсь ютамс тонавтнема. Тонавтнемась ульнесь дистанционна. Теке марто кавто недляс кучокшнымизь Нижней Новгородов, косо ютынек анокстамонть. Тонавтнеманть ютамодо мейле весенень максозельть сертификатт.
Кода тешкстась Юлия Бочкаева, тонавтнемс ды ванкшномс эрявсь пек ламо информация. Эдь весемесь ульнесь од ды икеле тень марто эзть вастневкшне.
– Ёвтаса, васень шкасто а шождаль. Ниле районс мон ульнинь ськамон. Мельган кемекстазельть Покш Игнатовань, Ицялонь, Орданьбуень ды Отяжелень районтнэ. Ды ломантненень эрявсь ёвтнемс Фондтонть, кемевтемс, сынь аволь ськамост эсь кевкстематнень ды мелявкстнэнь марто. Ули истямо ломань, конась тенст лезды. Сыненст самай те эрявськак, – корты Юлия Александровна. – Лиясто ламот сыльть ансяк кортамо, чамдомо эсь оймест. Эдь малав уш ие СВО-нь участниктнень семиятне ульнесть истямо ёжосо, зярдо эзть сода, мезе учомс. Аламонь-аламонь кармасть пшкалеме кевкстема мартояк. Лездамс бажинек весенень. Ды витинек мелявтовтыця ламо кевкстемат.
Нама, Фондонть панжомазо – пек покш тев. Пек паро, Саранскойсэ улить весе эрявикс специалисттнэ. Районтнэсэ тень коряс аламодо седе стака, теке марто минь свал сюлмавтано эрявикс специалисттнэнь марто, кортнетяно. Юристтнэ, министерстватнень ды ведомстватнень важодицятне свал лездыть лисиця кевкстематнень витемасо.
Кода мерсь Юлия Александровна, васень шкасто седе сеедьстэ пшкалильть истят кевкстематнень коряс: кодат лезксэнь ёнкст улить СВО-нь участниктнень семиятнень ды эйкакштнень туртов, кодат льготат эли пандомат. Васняяк мелявтовтсь те. Эдь эйкакш марто ламот семиятнестэ тетятне тусть тиринь масторонть кисэ аштеме ды ярмаконь эрявиксчинть коряс кевкстемась аштесь васенце таркасо.
– Мон лездынь боевой тевтнень ветеранонь удостоверениянь, чавовозенть семиянь членэнь удостоверениянь получамосо, пандоматнень максомасо. Вейсэ Фондонь лия специалисттнэнь марто лездынек «Орден Мужества» медальсэ казезенть семиянтень удостоверениянть получамосо. Орденэсь яла сы икелев, удостоверениясь жо шкань ютазь. Минек жо лиссь истямо тев, удостоверениянть эзть максо уш пельиеде седе ламо шка. Лездынек семиянтень сонзэ максомасо. Лездынь семиянтень получамс калмамонть лангс пандоматнень. Тесэ тевесь ульнесь а шожда, эдь неть пандоматнень тешкстыть воинской часттне. А сынст эсест важодемань лувост. Трицянть-кастыцянть ёмавтомадо пенсиянь ладямонть коряскак васень шкастонть ульнесть кевкстемат. Миненек савсь кувать учомс ярмаконь аттестатонть, штобу максомс те пенсиянть. Ульнесь эштё истямо тев. Чавовсь СВО-нь участник, конась трявсь опекас саицятнень семиясо. Закононь коряс кемекстазь пандоматнень максомга жо эрявсь, штобу судонь коряс опекунось улевель кемекстазь фактической трицякс-кастыцякс. Ды минь вейсэ Фондонь юристтнэнь марто анокстынек исковой яволявтома судс, пурнынек весе эрявикс документтнэнь ды уш судсо аванть яволявтызь фактической трицякс-кастыцякс. Ней сонензэ максовить весе эрявикс пандоматне. Тесэ тевесь эдь аволь ярмактнесэяк. Ансяк, бути закононь коряс ули истямо ёнкс, сон улезэ топавтозь. Ёвтаса, минь эсь вановт алов сайтяно СВО-нь участниктнень эрьва семиянть ды важодтяно мартонзо. Башка мель явтано СВО-нь участниктнень нитнень, аватнень марто важодемантень. Бажатано сынст совавтомс кодамояк тевс, мездеяк пештямс юткошкаст. Седе пек те токи чавовозтнень семиятнень. Истямо покш зыянсто ськамонзо ломаненть кадомс кодаяк а эряви. Сон пекстави те апаронтень ды уш таргамс сонзэ карми пек стака, – корты Юлия Александровна.
Истя жо социальной координаторось тешкстась, пек ламо пшкадемат СВО-нь участниктнень тетяст-аваст ды нист пельде, штобу сынст цёраст ды мирдест нолдавлизь отпусков. Закононь коряс, кото ковонь перть службанть ютамодо мейле эряви максомс отпуск кавто недляс. Ульнесть жо истят тевть, иень ютазьгак цёратнень эзизь нолдакшно кудов. Соцкоординаторось вейсэ семиятнень марто кучокшность яволявтомат военной прокуратурас. Ды ансяк теде мейле зярыя ломанть сакшность отпусков.
Ульнесть мелявкст пандоматнень коряскак. Пек сеедьстэ пшкалить контрактонь коряс служицятнень семиятне. Секс што, алтавсть истят суммат, алкукс жо пандовить лия ярмакт. Фондонь важодицятне толковить неть кевкстематнень ды ёвтнить, мейстэ ды кода пурнавить пандоматнень покшолматне, ды мекс сынь аволь весень вейкеть.
– Монень сакшнось семия, косо авась ванстынзе пандоматнень коряс весе конёвтнень ды кандынзе ванномс. Лиссь истя, цёразо пельиеде ламо шкань перть ульнесь СВО-нь таркатнесэ передовойсэ ды сонензэ явовсть овсе вишка пандомат. Минь пшкадинек военной прокуратурав, лиякс ульнесь а кода. Улить кемекстыця весе конёвтне, а вана боецэнтень эзть явово эрявикс пандоматне. Военной прокуратурась ваннызе тевенть, ды мейле ковонь перть сыненст видестэ теезельть весе пандоматне, – кемексты Юлия Бочкаева.
Эряви меремс, соцкоординаторонтень пшкалить аволь ансяк мелявкстнэнь ды талновтыця кевкстематнень марто. Пшкалить кенярксов тевень коряскак.
– Зярдо Фондонок ансяк ушодызе важодеманзо, Орданьбуень районсто пшкадсь тенек пешксесэ ава, конась учось колмоце эйкакш. Мирдезэ ульнесь СВО-нь таркатнесэ, сонзэ жо маласоль чачтомань шкась. Тейтересь энялдсь мирденстэнь отпусконь максомадо. Минь те тевентень кундынек куроксто, пшкадинек частень командиртнэнень, косо служась цёрась. Ды эйкакшонть чачомадо кавто чиде икеле од тетянть нолдызь отпусков. Минь тенст теинек а покш казне ды арсинек чачтома кудосто вастомань кенярксчинть. Сынст туртов те ульнесь покш кеняркс. Миненек жо мельспаро, – корты Юлия Александровна.
Кода уш ёвтынек икеле, васень шкастонть Юлия Бочкаева ськамонзоль ниле районс. Ней сон важоди Покш Игнатовань ды Отяжелень районтнэнь марто.
– Свалшкане важодян Покш Игнатовасо, ансяк улить чить, зярдо ардан Отяжелев ды роботан тосо. Икелепелев яла гайневтян Отяжбуесэ эриця ломантненень, кие монень пшкадсь, ды пачтян, кодамо чистэ ды косо сынст марто вастован. Покш сюкпря Отяжелень райононь администрациянь прявтонтень Николай Константинович Николаевнень ды полавтыцятненень. Мон ламо важодян тосонь соцзащитань прявтонть Юлия Валерьевна Джалилова марто. Сынь лездыть эрьва кевкстеманть коряс. Мартост пек шожда важодемс, – тешксты Юлия Александровна. – Ней Отяжелесэяк ули соцкоординаторонь лездыця, сон зярс весементь тонавтни. Арсеви, сы иестэ монь кадови ансяк Покш Игнатовань районось.
Меельцекс Юлия Александровна тешкстась, «Защитники Отечества» фондонть ды тосо важодиця специалисттнэнь тевест пек эрявикс. Сынь путыть весе виест, штобу а кадомс вановттомо СВО-нь участниктнень ды сынст семиятнень, штобу лездамс чавовозтнень семиятненень. Те покш робота, конась веши аволь ансяк содамочить, истя жо ламо вийть. Ды те аволь эрьвантень виень коряс.
Юлия Бочкаева кеменде ламо иеть роботась Покш Игнатовань райононь вейкине диспетчерской службасонть. Васня пурнась эрицятнень пельде пшкадематнень 112 системанть вельде, мейле ульнесь прявтокс. Бочкаева парсте соды, пшкадицятнень мелявксост лангс куроксто мелень явоманть эйстэ ашти кевкстематнень шкастонзо витемась. «Мон сынь «Защитники Отечества» фондс важодеме, штобу лездамс эсь райононь ды республикань эрицятненень, – корты Юлия Бочкаева. – СВО-нь ветерантнэнь ды сынст семиятнень лиснить ламо кевкстемат, конатнень витемс тенст аволь виень коряс. Вейсэ жо минь изнясынек весе стакачитнень».
Юлия Еремина