«Формирование комфортной городской среды» федеральной проектэсь нолдави тевс «Жильё и городская среда» национальной проектэнть лувсо. Эрямос совавтомазо ушодозь 2019 иестэ.
Проектэнть прявт тевезэ – оштнень вадрялгавтомась, общественной таркатнень одкстомтомась. Лездамс регионтнэнень, эсь раськень ёнкстнэнь ды архитектуранть ванстозь, ладямс неень шкань эрямонть, косо эрьва кодамо иесэ ломантненень карми мелень коряс эрямс, важодемс ды оймсемс.
Неень шкань вешематнень коряс теезь общественной таркатне аволь ансяк лездыть мазылгавтомс оштнень ды райцентратнень, истя жо келейгавтыть эрицятнень культурной ды социальной содамочитнень, панжить экономикань од ёнкст.
Васняяк проектэнть тевс нолдамозо кемекстазель 2019–2024 иетнес. Ней Россиянь Президентэнть В. В. Путинэнь кармавтоманзо коряс программанть важодемазо поладозь 2030 иес.
Мезе жо теезель проектэнь тевс нолдамонь вете иетнень перть минек республикасо? Ёвтама, роботась ульнесь покш. Ды аволь ансяк Саранск ошсо, республикань весе районтнэсэ. Вана зярыя невтемат.
Покш Игнатовань муниципальной районсо «Формирование комфортной городской среды» федеральной проектэнть лувсо витнезельть-вадрялгавтозельть ламо этажсо эрямонь зярыя кудотнень перька таркатне ды общественной тарка.
Кода тешкстызе Покш Игнатовань муниципальной райононь энергетикань, строительствань ды жилищно-коммунальной хозяйствань кевкстематнень коряс прявтонь полавтыцясь Алексей Михайлович Левщанов, проектэнть тевс нолдамозо тесэ истя жо ушодовсь 2019 иестэ. Вете иетнень перть, 2024 иенть самс, теезель ламо. Васняяк витнемань-вадрялгавтомань покш роботат ютавтозь Покш Игнатова велень зярыя куротнесэ аштиця кудотнень перька. Вадрялгавтозь Советской куронь 46-це ды 48-це, Щорсонь – 39-це ды 41-це, Школьная куронь 2-це ды Новая куронь 8-це кудотнень перька таркатне. Неть иетнень перть весемезэ мазылгавтовсть-вадрялгавтовсть ламо этажсо кото кудотнень перька таркатне.
– Малав эрьвасонть теевсть-витневсть ардома китне, ютамо таркатне, одкстомтозь валдомтомась, подъездтнэнь икеле ладявсть эземть, шукшонь туртов урнат, максозь лезкс цецятнень озавтомга клумбатнень теемасо, – ёвтни Алексей Михайлович. – Эрицятне нейгак ёвтыть покш сюкпря. А мезть сёпомс, икеле ардома-ютамо китне ульнесть аволь вадрят, ней жо тевесь овсе лия. Ды весе те вадрячинть эрицятне сынськак ванстыть. Тунда озавтыть цецят, ванськавтыть кудотнень перька таркатнень шукшонть эйстэ ды кирдить мазычинть.
Истя жо проектэнть лувсо ютазь иестэ Покш Игнатовасо вадрялгавтовсь-одкстомтовсь эштё вейке общественной таркась – Советской куросо аштиця скверэсь. Тевтнень лангс ютавтозь 15 миллиондо ламо целковойть. Неть ярмактнень лангс одкстомтозь ютамо китне, путозь брусчатка, ладязь озамо таркат, шукшонь туртов урнат, теезь эйкакштнень туртов площадка ды оймсема тарка. Одкстомтозь скверэсь панжозель ютазь иень октябрянь 7-це чистэ. Райононть туртов те кармась алкуксонь кенярксчикс. Эдь скверэсь вечкевикс тарка кода вишкинетнень, истя покштнень туртовгак, тезэ свал пуромкшныть ламо ломанть. Ней жо седеяк ламо кармить сакшномо, эдь юткошкань ютавтоманть туртов тесэ ули весемесь.
Юлия Еремина