(22.10.1925–21.11.2023)
Дмитрий Васильевич Цыганкин – содавикс финно-угровед, эрзянь-мокшонь кельтнень тонавтнемасо покш учёной, филологиянь наукань доктор, профессор. Ламо иень перть важодемстэ сон ютась ки тонавтыцясто саезь Россиясо ды омбомасторонь наукасо эрзянь-мокшонь ды финнэнь-угрань лия кельтнень ванныцякс.
Дмитрий Васильевичень наукань топавксонзо пек келейть: фонетикасо ды лексикологиясо, морфологиясо ды синтаксиссэ, диалектологиясо, историясо, ономастикасо. Мокшэрзянь келень наукань ламо кевкстематне васняяк ванновсть сонзэ важодематнесэ. Кедензэ алдо лиссть 300-то ламо наукань, наукань-методикань важодемат, конатнень ютксто 5 монографият, вузнэнь ды школанень 8 тонавтомапельть, 5 валкст, ламодояк ламо статьят.
Неть важодематнень ютксто ламотне кармасть теориянь ды методологиянь лувокс эрзянь-мокшонь кельтнень тонавтомасо.
Кода содавикс финно-угровед Д. В. Цыганкин ульнесь Финно-угорской вейсэндявксонь член-корреспондентэкс (Финляндия), М. А. Кастренэнь лемсэ вейсэндявксос совиця (Финляндия), «Linguistica Uraliсa» (Таллинн), «Onomastika Uraliсa» (Дебрецен-Хельсинки), «Финно-угроведение» (Йошкар-Ола), «Сятко» (Саранск ош) журналтнэнь редколлегияс совиця.
Дмитрий Васильевич Цыганкинэнь лемезэ сырнень тешкссэ сёрмадозь Мордовской госуниверситетэнь историяс аволь ансяк кода содавикс учёноенть, превейдеяк превей тонавтыцянть, истя жо кода солдатонть, кона ютынзе Ине Отечественной войнань стака китнень.
Сон кадови мельсэнек кода алкуксонь интеллигент, покштояк покш профессионал, эсь келень ды раськень вечкиця, лия ёнов а молиця обуцянь, видечинь кисэ аштиця ломань, конань кургсто зярдояк эзь марсеве берянь вал, конань культуразо аволь невтемань кис – алкуксонь. Эрьва тевсэнть сонзэ мелензэ-арсеманзо ульнесть ды кадовить превспутомакс. Дмитрий Васильевич кадови миненек невтевксэкс наукасо важодемстэ, пряветямонзо ды эрямонь вечкеманзо коряс.
Н. П. Огарёв лемсэ университетэсь, мокшэрзянь келень кафедрась, тонавтницянзо печтить домка седейризкст эрямосто сонзэ туеманзо кувалма ды ёвтыть ризнэмань валт сонзэ малавиксэнзэ туртов.