Республикасонть прядовома лангсо яровой сюронь культуратнень видемась. МР-нь Велень хозяйствань ды продовольствиянь министерстванть невтематнень коряс, конат теезь панжиковонь 17-це чинтень, видезь малав 260 тёжат гектарт, мезесь аравтлувонть эйстэ 93 процентт.
Эрязасто моли ламбамо якстерькаень видемаськак. Эйстэнзэ видезь 19,6 тёжат гектарт, мезесь 89 процентт арсезенть эйстэ. Кемгавтово районсо моли кукурузанть видемазо, теке марто кевейкеесэ – сюрокс кукурузанть.
Отяжелень райононь «Сабанчеевское» велень хозяйствань предприятиясо тундонь видемань тевтне малав весе прядозь. Неть читнестэ минь ульнинек хозяйствасонть ды эсь сельмсэ неинек – мода лангсо важодицятнень туртов тундонь шкась шождакс а эрси. Ды кода мерсь мартонок вастовомсто «Сабанчеевское» ООО-нь растениеводствань коряс прявтонь полавтыцясь Вера Сергеевна Кочурина, ансяк тосо кармить вадря невтевкст, косо тундонь читнестэ ломантне важодить эсь вийтнень апак вансто.
– Тундонь шкась велесэ шождакс а эрси ды, эряви меремс, велень хозяйствасо стакачитнеде ды тевтнеде сатныть куш кодамо шкасто, – корты Вера Сергеевна. – Техниканть, видьмекстнэнь, ГСМ-нть анокстамат шкастонзо. Яровой сюронь культуратнень вадря урожаень саемань прявт ёнксокс ашти эрявикс шкасто видемась. Тесэ мельсэ кирдема аволь ансяк моданть летькечинзэ, ванома вегетациянь шкань кувалмонтькак, орматнень ды зыянонь кандыця унжатнень каршо сюротнень кемечист. Вана бажитькак хозяйстватне видеманть прядомс шкасто, эсь коряс содазь, тундонь чись ие анды.
«Сабанчеевское» велень хозяйствань предприятиянь пашнятнеде весемезэ 13 тёжат гектарт, видевицятнеде – 11 тёжадо ламо гектарт. Сюронть алов те иестэ саезь 5600 гектарт. Истя, озимой шуждонть видезь 2000 гектарт, яровой сюротнеде – 3600 гектарт. 900 гектарт хозяйствасонть максозь кукурузанть алов, теке марто 200 гектарт – сюрокс кукурузанть. Ламбамо якстерькайденть те иестэ арсевсь видемс 2100 гектарт, 150 гектарт – рапс. Веиень тикшетнеде 750 гектарт, ламо иенсетнеде – 1600 гектарт.
В.С. Кочуринань валонзо коряс, хозяйствасонть эрьва иестэ сюротнень алов явови малав кото тёжат гектарт мода. Зняро жо явозель тедедеяк.
Ломантне кортыть: «Мезе видят, сень саят». «Сабанчеевское» ООО-со тень чарькодить. Секскак тесэ покш мель явови видьмекстнэнень. Кода икелеяк, сынь ульнесть элитнойть, истя жо васенце ды омбоце репродукциянь.
– Минь кеме юр путынек сы иень урожаенть алов, – ёвтни «Сабанчеевское» ООО-нь прявтось Дмитрий Николаевич Игушкин. – Кавто тёжат гектарт видинек озимойть. Те тевенть топавтынек шкастонзо, кодамояк стакачинь апак сода. Яровой сюротнеяк ней уш весе видезь, видевсь рапсоськак. Вана прядынек ламбамо якстерькаенть видеманзо ды кадовсь аламошка сюрокс кукурузадонть. Видезь паксятнесэ уш ушодовсь подкормкась ды гербицидсэ обработкась. Пиземетне минек пек эзимизь лоткавто, весементь топавтомс кенеринек шкастонзо.
Те тундонь видемань тевтнесэ хозяйствасонть важодсть малав 150 ломанть. Вадря, техникадонтькак аволь аламо. Свалшкане важодсть видемань колмо комплекст: «Джон Дир», «Хорш», «Солитер», колмо агрегатт СЗУ-6, кото культиваторт, удобрениянь ёртнемань ниле агрегатт. Кода тешкстызе Вера Сергеевна, тедеде сынст хозяйствань тракторонь паркось топавтовсь неень шкань од техникасо. Рамазельть К-744 ды МТЗ-1221 тракторт, прицеп марто КамАЗ, кавто комплекст «Барон», кавто прикатной комплекст.
Ламбамо якстерькаень ды кукурузань видемасо важодсть эштё ниле агрегатт.
– Эрьва иестэ видемась юты 14-18 чить. Нейгак сон седе кувать эзь таргаво, – корты Вера Кочурина. – Неень шкань вадря техникась ды одкстомтоматне пек лездыть весе тевтнень прядомс шкасто.
Зярдо ульнинек «Сабанчеевское» ООО-нь паксятнесэ, мольсь ламбамо якстерькаень видемась. МТЗ-1221 тракторонть азорозо – механизаторось Виктор Петрович Федотов – эсь тевенть топавтсь кода эряви. Весе ряднэтне видеть, кодаткак чаво таркат арасть. Ды кода сыненст, неть чаво таркатненень, лисемаяк, эдь тракторось важоди спутник вельде. Неень шкань техникась пек превей, бути маштат сонзэ экшсэ роботамо, кодаткак мелявкст ды стакачить а лисить. Виктор Петрович жо те тевенть содасы пек парсте, весе эрямонзо перть роботы механизаторокс.
– Колхозсо роботан 1979 иестэ саезь. Прядыя школам, тоско жо получинь прават, сестэ эдь водителень тевентень тонавтсть школасо, ды озынь руль экшс, – ёвтни Виктор Федотов. – Нейгак ледстнян, макссть тень Дизель, кона нолдавсь 1976 иестэ. Сонзэ экшс озыньгак. Ней истямо Дизель ашти минек техникань парконь выставкасонть. Аламонь-аламонь весементень тонавтнинь. Мейле жо, важодемань весе шканть перть, кодамо ансяк техникасо роботамс эзь саво. Тесэ и К-700, «Беларус» трактортнэ, эсенек ды омбо масторонь комбайнатне. Весень варчнинь. Нама, неень шкань техникась вадря. Роботат эйсэнзэ мельспаросо ды тевеськак маряви седе шождакс. Покш сюкпря минек прявтонтень Дмитрий Николаевич Игушкиннэнь. Сон пштистэ ваны весе полавтоматнень мельга ды малав эрьва ие топавты минек парконть од техникасо.
Ламбамо якстерькаенть видемасо истя жо роботасть механизатортнэ В.И. Сорокин, А.Г. Чепухин, В.М. Пшеничников, А.С. Туров, В.Д. Иневаткин. Сюронь видицякс ульнесть В.И. Учеваткин, С.И. Фадеев, Н.Д. Иневаткин, А.Н. Фёдоров.
СЗУ-6 агрегаттнэсэ важодсть А.М. Бакшайкин, М.Ф. Удалов, А.Н. Виряскин. Минеральной удобрениятнень почодомасо роботасть А.Н. Данилов, В.М. Косынкин.
Механизатортнэ паксясо роботасть рана валскестэ саезь позда чокшнес. Шканть ванстомга ды тевтнень седе куроксто прядомга ярсамопелентькак тенст пачтясть видьстэ паксяв, важодема таркантень. Тень мельга тесэ ваныть пштистэ.
– Минек важодицятне шканть стяко ёмавтнеме а вечкить, – корты Д.Н. Игушкин. – Свал бажить теемс весементь шкасто, вадрясто ды теке марто ливтемс эсь хозяйстванть икельцетнень юткс. Тень кисэ тенст покш сюкпря! Лангозост ули кемема.
Минь жо карматано кемеме, «Сабанчеевское» ООО-нь аграрийтне кармить изницякс трудовой соперничествань республикань пелькстамосонть, конань изницятне ёвтавкшныть Велень хозяйствань ды перерабатывающей промышленностень кенярксчинть тешкстамсто. Секскак арсетяно хозяйствантень вадря ие ды сюпав урожай!
Юлия Еремина.
Фототне Э. Ретунскоень