«Всероссийское общество глухих» инвалидэнь общероссийской куронь минек ёнксонь отделениясь изнясь Президентэнь фондонь грант «Жестовый язык – родной и необходимый…» проектэнть кис.
– Советэнь шкатнестэ жестовой келенть эзь мереве тевс нолдамс тонавтомань лувсо. Сестэ ды нейгак тонавтыцятне, конат содасызь сурсо невтнемань келенть, бажить тевс нолдамс тонавтомсто. Сон лезды эйкакштненень седе шождасто ды парсте чарькодемс материалонть. Проектэсь алтави а мариця эйкакшонь колмо группатненень. Эйдень кужов якицятненень, вишка ды покш классо тонавтницятненень. Сехте вишкинетнень марто вастовоматне ютасть пандемиядонть икеле Саранскоень а мариця ломанень клубсо. Школасо занятиятне мольсть сурсо невтнемань келень кружоксо, ИЗО-нь мастер-класстнэсэ, – пачтясь «Всероссийское общество глухих» инвалидэнь общероссийской куронь Мордовиянь отделениянь прявтось О.С. Зубаровская.
Грантонь проектэнть вельде кеветее тонавтыцят ютасть жестэнь келень курсат.
– Минек Саранскоень а мариця эйкакшонь школанть-интернатонть юрсо мольсть «Основы жестового русского языка» кавто недлянь курсат. Сынст ветясь Московонь учебно-методической центрань прявтось Л.М. Осокина. Сонзэ пельде тонавтнесть воспитательтне, тонавтыцятне-дефектологтне ды тонавтыцятне-предметниктне. Курсатне лия ёнов а молицят ды мельстуицят. Сынь питнейть. Минек школантень ды республикантень а рамавить. Грантонть вельде истямо паро тевесь топавтовсь. Курсатне лездыть муемс кель-вал эйкакштнень марто, чарькодемс ды тонавтомс сынст. Ёвтатано покш сюкпря О.С. Зубаровскаянень. Самай сон сёрмадызе те проектэнть ды роботась минек эйкакштнень марто. Кружоктнень ветясь сонсь, лездасть тонавтыцятнеяк. Сон сакшныль анок тема марто. Аламонь-аламонь сайнесть кодамояк тема. Эйкакштне паро мельсэ тонавтнесть. Мезекс эряви сурсо невтнемань келесь? Васняяк, аволь парсте мариця ды тунь а мариця ломантне чарькодевельть вейке-вейкень ды мезде моли кортамось. Эйкакштне лездыть тетяст-аваст туртовгак, тонавтыть сынст. Эсь ютковаст эйкакштне кортыть сурсо невтнезь, – ёвтнесь Саранскоень а мариця эйкакшонь школань-интернатонь учебно-воспитательной тевень коряс завучось Г.Н. Симакова.
Эряви меремс, школань тонавтницятне сурсо невтнемань кельсэ путсть кавто видеоёвкст – «Кода кискась вешнесь ялга» ды «Превтеме атякш».
Татьяна Маторкина