Неть валтнэ пек ладить Кочкурбуень Семилеентень ды сонзэ маласо велетненень. Алкукскак, неть таркатне меельце 30 иетнестэ пек полавтовсть паро ёнов, самай зняро иеть те иень сёксня топодить «Норов» Аграрно-производственной фирмантень.
Те шканть перть ламо полавтовсь аволь ансяк велень хозяйствань продукциянть теемасо, паксятнесэ эрьва мезень кастомасо ды сонзэ тевс нолдамосо, истя жо ламо од ды лезэв строявсь Семилейсэ ды сонзэ перька уликс велетнесэ.
Тесэ ушодовсть ютавтовомо тонавтнемат, пелькстамот ды ламо лия кенярдовтыця ды мелень витемань тевть.
Кода пачтинек «Эрзянь правда» газетань ютазь номерсэнть, тосо аволь умок ютавтовсь чувтосто керсицянь раськеютконь васенце фестивалесь, конась ульнесь «Карнай» оймсема таркасонть.
Тешкстасынек, Кочкурбуень Карнай сёлтонть маласо оймсема тарканть мазылгавтомо састь масторонь сехте паро кедьчелькев ломантне. Неть: международной, россиянь, регионъютконь ды республикань фестивальтнесэ изницят ды призёрт.
«Эрьмезь» вейсэндявксонь прявтось, чувтосто керсицянь «Норовонь чилисемат» фестиваленть координаторось Пётр Рябов мерсь: «Истямо кенярксчинь ютавтомань арсемась сась «Норов» Агрокомпаниянь группатнень прявтонтень, МР-нь Госсобраниянь депутатонтень Александр Ильич Поздняковнень ютазь иестэ. Самай сестэ Кочкурбуень Вирь Тавласо ютавтовсь «Вейсэнь ундокст» чувтосто керсицянь фестивалесь, конась алтавсь Йовлань Олонень 70 иетнень топодемантень».
…Аволь умок Кочкурбуень Семилейсэ улемстэ Карнай сёлтонть чирестэ рединек чувтонь покш оровт (те ульнесь скульптурань теемань материалось). Сонзэ тов пачтизь минек республикань Темниковань районсто.
Ниле чинь ютазь те таркантень самсто, мельспаросо рединек, кода ламо сельмень кенярдовтыця скульптурат анокстасть фестивалень участниктне истямо нурька шкас. Саинек мель теевемс содавиксэкс ёвксонь геройтнень азорост марто.
Васенцекс кортазевинек Евгений Акимов марто. Эрзянь цёрась сась Чувашиясто, ундоксонзо минек республикань Отяжелень ёнкссто. Валонзо коряс, кода Пётр Рябов мерсь тензэ невтемс ёрокчинзэ те фестивальсэнть, согласясь апак кавтолдо. Чувтосто керсемань тевентень кундась умок, вейксэньгеменце иетнестэ Богородское училищасонть тонавтнемстэ. Эсь шкастонзо ульнесь ламо масторсо, ёрокчинзэ невтсь эрьва кодамо пелькстамотнесэ. Ней жо седе сеедьстэ карми якамо эсенек масторонь регионтнэва.
Чувтосто керсицясь Владимир Алманов сась тенек Марий Элстэ. Сон истя жо те тевсэнть колоньгемень иеде ламо шкань перть, эрямонь тевензэ вечкеме ушодсь эштё эйкакш пингстэ, эсь шкасто сон тенень тонавтнесь Национальной президентской ёроков эйкакштнень туртов школасонть. Тосо прась уцяска тензэ теевемс содавиксэкс ламонь содыця тонавтыцянть Юрий Морозов марто. Юрий Михайлович пек ламо од ломанть тонавтсь чувтосто керсицянь тевентень. Текенень поладсынек, Алмановтнень раськесэ улить аволь ансяк чувтосто керсицят, истя жо содавикс художниктькак. Сынст юткс сови тетязо Николай Петрович Алманов, кие пек кенярды цёранзо ёрокчинтень. Кода мерсь сонсь Владимир Николаевич: чувтось – те живой материал, сонзэ васня эряви парсте содамс, тонавтнемс ды ансяк теде мейле ушодома мартонзо важодеме.
Видькстан, седеем сехте пек токизь «Гуси-лебеди» ёвкссто саевкс персонажтне. Истямо покш седейризкс Алёнушка ды Иванушка геройтнень сельмстэ редявсь, теке ойметь пачк сынст кажось ютась.
«Карнайсэ» чувтосто керсицянь раськеютконь васенце фестиваленть прядовомадо мейле Владимир Алманов тусь Якутияв. Сонзэ тердизь «Встреча шедевров ЮНЕСКО на земле Олонхо» международной IV фестивалентень, конась тосо ютавтовсь неть читнестэ. Сон совась Россиянь содавикс скульптортнэнь юткс, косо ульнесть сыцят Монголиясто, Индиясто, Азербайджансто, Турциясто ды ламо лия омбо мастортнэстэ.
Николай Гетьман сась тенек Московонь областьстэ. Важодеманзо лангс ванозь, мерят, теке налкшке теи, сеске неяви, эсь профессиянть содасы пек парсте. Истя лисськак. Мартонзо кортнемстэ карминек содамо – те тевсэнть ниленьгемень иеть. Эсь шкастонзо истя жо прядызе Москов ало уликс Богородскоень училищанть. Келя, весе вечкеманзо путы эсь важодевкстнэс. Алкукскак, тень минь рединек ансяк теезь «Русалка» важодевкссэнзэ.
Самарань областень Тольятти ошсто сыця мастерэнть Владимир Илюшинэнь чувтонть марто важодемазо ушодовсь аволь истя умок. Сон те тевентень сась апак учне. Икеле ульнесь лия профессиязо, сась заказонь тееме вейке ломаннень ды абунгадсь тосто мазый скульптурань неезь. Се шкастонть саезь ушодсь Интернет вельде тонавтнеме од тевентень. Ды истя парсте тонадсь, мик кармасть сонзэ тердтнеме фестивальтнес ды эрьва кодат пелькстамотнес. Вановтонзо коряс, самай неть таркатнесэ пурнавить содамочить ды таштави ёрокчи. «Водяной» («Ведень ава») скульптуразо тунь аволь кежей, мекевлангт, варштавкссонзо паронь арсема ды чачосонзо мизолкс.
– Лиякс а кода, – корты авторось. – Эдь минь тейтяно важодевксэнек васняяк эйкакштнень туртов. Кадык сынь кандыть тенст уцяска ды паро ёжо.
Фестивальсэнть ёрокчист невтизь аволь ансяк чувтосто керсицятне, истя жо меельце чистэнть тов сыця весе инжетне. Ламот бажасть тонавтнемс керсеме тосо ютавтовиця мастер-класстнэсэ. Весень кенярдовтызь музыкальной программасост Кочкурбуень киштицятне-морыцятне.
Фестивалесь прядовсь, чувтосто керсицятненень ёвтазь сюкпря ды максозь Сюкпрянь дипломт. Изницякс жо лиссть весе участниктне. Сынь эсь ёндо казнекс кадсть покш сюпавчи: эрзянь ды мокшонь раськетненень «Масторава» эпосонть эйстэ ды рузонь ёвкстнэнь мельс саезь теезь скульптуратнень.
Ней весе тей сыцятнень сельмест кармить кенярдовтомо «Норовава», «Эрьмезь», «Вирява», «Гуси-лебеди», «Золотая рыбка», «Садко» ды эштё чувтосто теезь сисем скульптуратне, конат мазыйстэ ладсезь эйкакштнень туртов «Ёвксонь кужо» оймсема таркасонть.
Самай истят скульптуратнень вельде тонавтневи эрзя-мокшонь эпосось, а стувтовить минек покштятнень-бабатнень коест-кирдаст.
Валентина Юдина