Ютазь субутасто «Россия» телеканалсо «Привет, Андрей!» передачанть учость весе ваныцятне. Тов инжекс тердезель Орданьбуень Чукало велень батюшкась Евгений Самаркин. Передачась алтазель содавикс композиторонть Александр Морозовонь 75 иень юбилеентень. Тей сакшность Россиянь эрьва кодамо ёнкссто морыцят, конат морызь юбиляронть ламонень вечкевикс моронзо.
Отец Евгений морызе «Малиновый звон» моронть. Студиянь инжетне ды ваныцятне пек лембестэ вастызь сонзэ. Батюшкась эрзякс шумбракстнесь весень марто: «Шумбратадо, вечкевикс ялгат!». Ёвтнесь, Мордовиясо эрить эрзят, мокшот ды шокшот. «Сюкпря тердеманть кисэ. Эсь сельмесэ неян алкуксонь легенданть, конань моротнень марто минь касынек, конатнень вечксть морсеме тетянок-аванок», – кортась отец Евгений. Композиторонтень казсь пазават ды ёвтась тензэ лембе валт.
Съёмочной группась сакшнось Мордовиявгак. Сынь невтизь, косо эри отец Евгений. Протоиереесь ней служи Жаренки шабра велесэнть. Тесэ мелят кармасть стявтомо Казанень Пазонь Авань церькова. Сон ашти ташто клубонь зданиясо. Иень перть теезь пек ламо. Пазнэнь озноматне тесэ умок уш ютыть. Передачасонть невтсть, кода од мирдть-нить састь венчамо.
Отец Евгений Самаркин ёвтнесь аволь шожда уцяскадонзо: чачомадо мейле сонзэ авазо кадызе. Колмо иеть эрясь эйдень кудосо. Сюкпря Пазонтень, муевсть ломанть, конат саизь эстест семияс. Те – Чукалосто Михаил ды Клавдия Самаркинтнэ, эйкакшост арасельть. Васня сайсть тейтерне, мейле цёрыне. Ды ансяк зярдо о. Евгенийнень топодсть 19 иеть, авазо ёвтнесь теде.
Передачань ветицясь Андрей Малахов кевкстизе, марясь-эзь прянзо саезь эйкакшокс? «Зярдояк эзинь маря прям саезекс. Ансяк велесэ мезть-бути кортнесть, згилясть, мон тенень эзинь яво мель. Тетянь-авань лемест эрьва чи ледстнян озномасон. Кияк ней мода лангсонть истя а мелявты ды а ризны кисэнь, кода сынь», – мерсь батюшкась. Невтезель кудось, косо кассь о. Евгений, ней тосо лия эрицят. Тетязо тусь эрямосто 15 иеде икеле, авазо – колмо иеть уш ютасть. Студиянь инжетнень эзть кирдеве сельведест. Батюшкась тешкстызе, эрямосонзо Пазонь Авась свал вети эйсэнзэ, вансты, иди.
Отец Евгений морси умок. Сон сонсь сёрмады эрзянь морот, лиссть зярыя дискензэ. Улить нолдазь Пазнэнь озномань мороткак. Ламот путозь Интернетс, косо эйсэст кунсолыть весе. Неть моротне киньгак а кадыть мельтеме: сынь – седеень эждицят, оймавтыцят, кармавтыть арсеме эрямодонть.
Татьяна Маторкина